Tơdrong jang tơƀôh hơyak năm ‘nao lơ̆m tơdrong jang hơnhăk cheh phe ‘lơ̆ng Đắk Lắk gơh trŭh tơ̆ dôm anih tĕch mơdro apŭng plĕnh teh, hơdai hăm pơih ăn tơdrong hiôk hơtŏk ‘lơ̆ng kơjă tŏk ăn găr cheh phe Robusta Việt Nam.

Container cheh phe tĕch tơ̆ teh đak đe ‘măng âu tăh hloh 3,4 tấn cheh phe ‘lơ̆ng, hăm kơjă vă jê̆ 120.000 Đô la Mi, jĭ tơmam kơ Kŏng ti Aeroco Coffee. ‘Nâu jĭ tơƀôh ‘lơ̆ng lơ̆m tơdrong tĕch mơdro kơloăi cheh phe Fine Robusta, tơplih đơ̆ng jăl jang roi tơƀôh, hơlen lăng tơdrong ‘lơ̆ng tơmam jing hơtŏk tơiung tơdrong jang tĕch mơdro tơpă tơ̆ Mi - 1 lơ̆m dôm anih tĕch mơdro cheh phe tih păng đei kơsô̆ pơjei lơ lơ̆m apŭng plĕnh teh.

Ƀok Nguyễn Tấn Vinh, bơngai joăt jang cheh phe ‘lơ̆ng hơlen lăng, cheh phe ‘lơ̆ng tơ̆ Đắk Lắk hlôi đei hơyak hơtŏk tơiung ‘lơ̆ng. Ƀôh hơdăh ‘noh jĭ ‘Măng pơlong Cheh phe ‘lơ̆ng Việt Nam – Amazing Cup, đơ̆ng hloh 50 kơloăi vang pơlong lơ̆m dôm sơnăm blŭng pơgơ̆r sơnăm 2019, truh dang ei hlôi tŏk hloh 200 kơloăi. Lơ anih mơdro sa hlôi vang jang jrŭ hloh lơ̆m tơdrong jang âu păng ƀrư̆ ƀrư̆ hơnhăk cheh phe ‘lơ̆ng lĕch tơ̆ anih tĕch mơdro apŭng plĕnh teh. Kiơ̆ kơ ƀok Vinh, Đắk Lắk đei lơ tơdrong hiôk vă hơtŏk lơ kơjă cheh phe.

“Dôm tơdrong kăl vă hơtŏk tơiung cheh phe ‘lơ̆ng tơ̆ Đắk Lắk hlôi đei đơ̆ng sơ̆, ‘noh jĭ hơnăn đe ư hơnhang kơ hơnăn  Buôn Ma Thuột. Mă 2 ‘noh tơ̆ Đắk Lắk đei anih tơchĕng hơlen găh cheh phe Robusta. Mă 3 ‘noh teh kŭm nhen tơdrong joăt choh pơtăm đunh đai đơ̆ng kon pơlei. Dôm tơdrong kăl vă hơtŏk tơiung tơdrong jang cheh phe ‘lơ̆ng hlôi akŏm tôm. Gĭt kăl hloh ‘noh jĭ dang ei Đắk Lắk gô roi tơbăt, chă trong păng đei tơdrong vei lăng teh đak thoi yơ vă anih jang hơtŏk tơiung pran kơtang păng kơjăp ‘lơ̆ng”.

Tơ̆ lêh tĕch chehphe kăp gĭt ăn teh đak Mi, ƀok Đỗ Đức Hà, Kơdră Hơnih vei lăng kon pơlei phường Ea Kao, hơ-iă hăm tơdrong jang pơm tơlĕch chehphe kăp gĭt gô pơm trong vă rim hơp tak xah, hơnih jang mŭk drăm chă chih hơlen, hŏk pơhrăm, pơih să, pơjing đei lơ tơdrong jang păng hơtŏk iŏk yua ăn bơngai jang pơtăm chehphe. Phường Ea Kao đei sơkơ̆t hơdah jĭ minh lơ̆m dôm hơnih truh tơmang lăng kơ dêh char Đăk Lăk, kơyuơ 'noh tơring tơchơ̆t jang hơdai rim tơring jang chehphe hăm tơdrong jang tơmang pơhiơ̆, tơgop vă tơroi hơdah um rup chehphe Đăk Lăk truh hăm tơmoi truh tơmang lăng păng bôl buăl đơ̆ng teh đak đe băt truh.

“Nhôn hơpơi 'meh hơnăn chehphe Aeroco pơma hơdrô̆ păng dôm tơmam drăm chehphe nai kơ Ea Kao pơma atŭm gô yak hơdoi hăm dôm tơdrong jang chehphe kơ dêh char Đăk Lăk truh ou kơnh vă tơgop tơbang um rup chehphe kơ Đăk Lăk truh hăm rim teh đak lơ̆m apŭng plenh teh"