Pơgê 11/11, tơ̆ phường Quy Nhơn Nam, dêh char Gia Lai, yua đơ̆ng ‘mi tih, dôm jĭt met khô̆i teh tơmo kŭm hăm ‘long tih ưh kơ ê păk jur tơ̆ Trong gre 1D. Vĭ teh, tơmo klơ̆p tơ̆ trong pơm ăn ưh kơ gơh yak vih vơ̆t tơ̆ trong tơƀưh hăm dêh char Đắk Lắk. Lăp đơ̆ng rŏng kơ ‘noh, anih jang kơpal dêh char Gia Lai hơvơn khŭl linh, kơmăy chưk kôch păng gre joăt jang truh tơ̆ hơnih âu hơmet pơ ‘lơ̆ng teh tơmo; hơdai hăm gak găn, pơtho gre năm kiơ̆ trong nai. Kŭm lơ̆m Trong gre 1D, trong kông krang Quy Hòa đei var găn, ưh kơ ăn gre kơdâu yua kơ hơmơt teh hơlih. Khŭl linh dŏng sar bar, dŏng tơgŭm hơmet ăn jê̆ dôm hơnih ưh kơ ‘lơ̆ng, ling lang dŏng iŏk, hơmet ăn tơgŭm yông kon pơlei. Đơ̆ng kơsơ̆ 11/11, rơbâu ‘nu hŏk tro tơ̆ phường Quy Nhơn Bắc păng dôm xăh Canh Vinh, Tuy Phước hlôi đei ăn pơdơh kơ hŏk yua đơ̆ng ‘mi tih, đak tŏk kơ jung, pơm krê hơmơt tơ̆ trong năm truh tơ̆ hnam trưng.

'Mi tih đunh 2 năr kơ ou pơm đak tơ̆ lơ đak krong, đak glung tơring hơlĕch dêh char Đăk Lăk tŏk blai, pơm đak lơ̆p lơ tơring kon pơlei. Tơ̆ dôm xah Xuân Lãnh păng Đồng Xuân, jơnŭm pơgơ̆r tơring hlôi tenh kuăng 'nhăk kơhrĕng unh hnam kon pơlei păng mŭk drăm truh hơnih oei sơđơ̆ng, atŭm hăm noh pơkăp dôm hơnih đak lơ̆p tơ̆ jăl trong 19C. Tơ̆ dôm xah Tuy An Tây păng Đồng Xuân, minh ƀar hnam trưng hŏk hlôi ăn hŏk tro pơdơh kơ hŏk. Khul juăt jang đei pơtruh tơ̆ dôm hơnih đei tơdrong kơchăng ăn tơdrong jang mưh đei tơdrong kăl. Hơnih jang hơlen chih tơroi gah tŏ 'mi kial tơroi hơmŏ gô đei đak hơbông, teh hơlih tơ̆ tơring groi kông păng đak lơ̆p jrŭ tơ̆ dôm tơring klŭng tơjih đak krong gah hơlĕch dêh char Đăk Lăk. Jơnŭm pơgơ̆r tơring păng hơnih jang kơpal athei kon pơlei kơchăng, ưh đei vih vơ̆t rok kiơ̆ tơring đak lơ̆p jrŭ, đak ro jăng, mă kăl noh tơ̆ dôm hơnih đak krong đak glung đak lŏk jroh kơtang ưh đei sơđơ̆ng. 

‘Mi tih pơdui đunh tơ̆ lơ tơring tơ̆ dêh char Quảng Ngãi pơm ăn đak lơ̆p, teh hơlih, pơm ăn lơ trong nơnăm ưh kơ gơh yak vih vơ̆t. Tơ̆ xăh Sơn Tây, trong Trường Sơn Đông đei ƀôh 3 hơnih teh hơlih, pơm ưh kơ gơh yak vih vơ̆t đơ̆ng ‘năr 11/11. Tơ̆ xăh Phước Giang, pơđĭ 10 pơlei tă kơ đei đak lơ̆p ngăl, 1,2 tơring đak tŏk kơjung hloh 1,5 mét. Rim khŭl linh hlôi tơgŭm kon pơlei tơ̆ dôm tơring đak lơ̆p jrŭ truh hơnih oei sơđơ̆ng. Tơ̆ xăh Ngọc Linh, khŭl kơdră tơring hlôi hăt hot yông tơklăh 115 unh hnam hăm 393 ‘nu bơngai truh tơ̆ hơnih oei sơđơ̆ng. Kăl kơ bơngơ̆t truh hloh ‘noh jĭ tơring Đăk Rế đei ƀôh lơ hơnih hơđang tơ̆ jih kông, tơ hli kơtă  96 unh hnam hơrih sa tơ̆ hơla jơ̆ng kông. Pơđĭ dôm unh hnam kon pơlei âu hlôi đei yông truh tơ̆ hơnih oei sơđơ̆ng tơ̆ hơnih hop akŏm kơ Anih vei lăng kon pơlei xăh.