Lơ̆m jơ năr năm ngôi, bơ̆jang, Tổng Bí thư, Kơdră teh đak Tô Lâm hlôi pơma đam hăm Thủ tướng Nhật Bản Takaichi Sanae; pơma tơ̆ Quốc hội Nhật Bản, năm ngôi tơ̆ dêh char Kanagawa; Tơƀơ̆p pơma dơnuh hăm bơngai joăt jang, bơngai gơh hơgei, bơngai jang khoa hŏk hơgei bơngai Việt Nam tơ̆ Nhật Bản; Vang hop akŏm tơpôl kơdih găh jang hơdai mŭk drăm păng khoa hŏk kơmăy kơmŏk Việt Nam-Nhật Bản; Tơƀơ̆p 1,2 anih jang jên hu tih hloh Nhật Bản păng pơgơ̆r lơ ‘măng tơƀơ̆p pơma dơnuh kơdră kơpal gĭt kăl.

Tổng Bí thư, Kơdră teh đak Tô Lâm păng Thủ tướng Nhật Bản Takaichi Sanae drơ̆ng nơ̆r pơdrơ̆ng kiơ̆ Tơdrong tơchơ̆t Trĕng lăng atŭm Việt Nam-Nhật Bản vă pơtrŭt tơdrong pơvei “Jang hơdai gĭt kăl tôm tơdrong Việt Nam - Nhật Bản yua kơ tơdrong rơngei păng hơnŭk hơnoa tơ̆ châu Á păng lơ̆m apŭng plĕnh teh” tŏk ‘lơ̆ng ‘nao, kiơ̆ lơ̆m jơhngơ̆m đon “Teh đak vang yak hơdai, vang pơcheh, vang đei yua, yua kơ tơdrong jang tŏk ‘lơ̆ng, pơm tơm tơdrong jang păng hơdrin kơdih”. Pơtôch ‘măng năm ngôi, bơ̆jang đơ̆ng Tổng Bí thư, Kơdră teh đak Tô Lâm hlôi tơgop gĭt kăl hơnơ̆ng hơmet ming păng pơm ‘lơ̆ng hloh dơ̆ng tơdrong pơvei jang hơdai Gĭt kăl tôm tơdrong Việt Nam - Nhật Bản, akŏm pơtrŭt jang hơdai tơpă, tôm tơdrong lơ̆m đĭ đăng dôm tơdrong jang tơm, pơm dơ̆ng tơdrong hiôk hơtŏk tơiung kơ 2 teh đak, hơnhăk ăn đei yua ‘lơ̆ng ăn kon pơlei păng tơgop ăn tơdrong rơngei, sơđơ̆ng, hơnŭk hơnoa kơ tơring.