Ah pơgê hơtuch kơ giĕng, pơmai Siu Pin atŭm hăm rim bơngai jang lơ̆m Kou lak ƀô̆ Tang găn păng tơjră tĕch tơtông bơngai xah Ia Púch păng kang ƀô̆, khul linh tơ̆ Kơđông linh Ia Púch truh hơpong ngôi hăm unh hnam oh Siu Thảo. Đơ̆ng tơdrong hŏk pơhrăm, rim bơngai jang lơ̆m kou lak ƀô̆ tơroi gah dôm bơngai ƀơm đe pơhlŭ pơhlôm năm jang tơ̆ teh đak đe, đơ̆ng rŏng kơ noh pơđep pơgŏ pơm jang, phŏ noh athei kla jên răt tơvih bơngai. Kiơ̆ đơ̆ng dôm tơdrong đei ƀôh, đe oh đei pơtho tơbăt gah kơchăng hăm nơ̆r hơvơn hăm tơdrong jang kư̆ kă păng dôm tơdrong tơrĕk hơnơ̆ng lơ̆m mạng tơpôl. Siu Thảo ăn tơbăt, dôm tơdrong tơroi tơgŭm ăn đe oh hlôh vao hơdah hloh gah tơdrong hơlĕnh tĕch răt bơngai păng băt trong vei vêr kơdih po: “Đơ̆ng rŏng kơ tơmơ̆ng tơroi tơbăt đơ̆ng đe met ƀô đô̆i păng kang ƀô̆ drăkăn, inh băt khul kơnê̆ hrei ou đei lơ tơdrong pơhlŭ pơhlom đe hơdruh tơdăm, nhen tơdrong jang hơ-iơch xa jên khei lơ, dah mă 'nhăk năm jang tơ̆ teh đak đe. Đơ̆ng noh inh păng đe buăl băt vei vêr kơdih hơkou po mă 'lơ̆ng hloh"

Đei tơ-iung pơjing ah sơnăm 2010 hăm 40 'nu jang, Kou lak ƀô̆ Tang găn păng tơjră tĕch tơtông bơngai xah Ia Púch pơtoi tơroi tơbăt akŏm rim sơnăm, atŭm hăm noh asong bơngai jang truh rim unh hnam chă hơvơn tơbăt ăn kon pơlei. Hăm nơ̆r Jrai păng dôm tơdrong tơroi tơjê̆, rim bơngai jang tơgŭm ăn kon pơlei băt hơdah tơdrong pơhlŭ pơhlôm, mă kăl noh pơkăp tơdrong jang hơ-iơch, xa jên khei lơ vă 'nhăk bơngai năm tơ̆ teh đak đe.

Minh lơ̆m dôm tơdrong đei tơbăt lơ noh jing 'măng đei ƀôh tơ̆ xah sơlam Ia O, dêh char Gia Lai, ah khei 6/2022. Lui gah tơdrong tơroi năm pơm jang tơ̆  Tây Ninh hăm jên khei 20 triu hlj rim khei, 7 hơdruh tơdăm bơngai Jrai tơ̆ pơlei Kloong ƀơm 'nhăk ba truh Campuchia, ƀơm đe pơhlŭ kiơ̆ mạng, ƀơm teh dong păng athei krao điê̆n thuăi ăn unh hnam kla jên răt tơvih. Đei unh hnam athei tĕch mir na, tŏk iŏk jên vă gơh 'nhăk kon brŏk vih.

Dôm tơdrong tơroi đei tơpă tơgŭm ăn kon pơlei băt hơdah gah tơdrong tĕch tơtông kon bơngai pơtơm đei đơ̆ng minh nơ̆r hơvơn năm jang, minh tơdrong tơbôl pơm juăt đơ̆ng mạng dah mă tơdrong lui kiơ̆ nơ̆r pơkă 'ngam 'lơ̆ng. Hơdrol kơ iŏk tơdrong năm jang tơ̆ hơtaih, kon pơlei athei băt hơdah tơdrong jang, hơnih jang, bơngai iŏk hơpah jang; ưh gơh pơjao hla bar chih măt hơkou jăn po ăn bơngai mă ưh kơ juăt dah mă bơngai đei tơdrong ưh kơ 'lơ̆ng gah đon bơnôh.

Pơmai Siu Pin, Kơdră Jơnŭm jang Drăkăn pơlei Goòng, xah Ia Púch ăn tơbăt, tơdrong tơroi tơbăt hăm nơ̆r kon kông, tơguăt hăm dôm tơdrong đei tơ̆ tơring tơgŭm ăn kon pơlei ƀônh vao, ƀônh băt păng kơchăng hloh:  “Nhôn atŭm hăm jơnŭm pơgơ̆r tơring, atŭm hăm đe met ƀô đô̆i, tơroi tơbăt ăn kon pơlei lơ̆m thôn, pơlei băt hơdah, mă kăl noh đe drăkăn păng đe hơ-ioh kon kông. Jơnŭm jang nhôn noh athei tơguăt kơjăp hăm tơring hăm tơdrong hơrih rim năr kơ kon pơlei, tơroi tơbăt hăm 2 nơ̆r pơma”

Xah Ia Púch tơkuh hăm sơlam teh Campuchia, hloh 70% kơsô̆ măt bơngai 'noh kon kông. Tơdrong hơrih kon pơlei oei ƀơm tơnap tap, tơrĕk hăm tơroi tơbăt ưh đei lơ, ƀônh ƀơm đe chă pơhlŭ pơhlôm, mă kăl noh hăm dôm bơngai 'meh năm jang hơtaih đơ̆ng hnam.

Lơ̆m tơdrong jang tang găn, jơnŭm jang drăkăn iŏk yua tơdrong tơguăt tơjê̆, hlôh vao nơ̆r pơma păng khôi juăt tơ̆ tơring; Ƀô đô̆i Kơđông linh vei sơlam teh tơroi tơbăt gah trong chă pơhlŭ pơhlôm đơ̆ng khul pơm kơnê̆, pơtho ăn kon pơlei băt hơdah tơdrong tơm păng chơ chă tơdrong tơgŭm. Rim khul oei jang hơdoi vă tơroi tơbăt gah dôm tơdrong mă đe drăkăn, đe hơ-ioh lĕch đơ̆ng tơring mă đei ƀôh ưh sơđơ̆ng vă dah tom băt hơdah păng tang găn.

Thượng úy Phan Đình Duy, Kơdră Khul jang Pơrô̆ pơrôp kon pơlei, Kơdră Pơrô̆ pơrôp kon pơlei, Kơđông linh vei sơlam teh Ia Púch, dêh char Gia Lai ăn tơbăt, lơ̆m tơring mă hơnih linh pơgơ̆r, tam mă băt đei tơdrong tĕch tơtông bơngai, mă lei tơdrong jang hơdoi chă tơroi tơbăt, tang găn hơdrol oei đei pơtoi jang hơnơ̆ng:  “Ƀô đô̆i Kơđông linh vei sơlam teh hơnơ̆ng jang hơdoi hăm jơnŭm jang đe drăkăn xah Ia Púch tơroi tơbăt kŭm nhen năm truh rim unh hnam chă tơroi gah tơdrong pơhlŭ pơhlôm đơ̆ng khul kơnê̆. Dang ei, dôm tơdrong pơhlŭ ou trĕng hăm đe drăkăn, chă pơhlŭ hăm trong tơhưch, tơdui, đang kơ noh chă tơtông tĕch răt bơngai. Jơnŭm drăkăn đei sơnong jang kăp gĭt hloh”

Đơ̆ng dôm tơdrong pơma dơnuh tơ̆ rim unh hnam truh tơdrong jang jang hơdoi hăm jơnŭm đe drăkăn păng Ƀô đô̆i vei sơlam teh, tơdrong tang găn păng tơjră tĕch tơtông bơngai tơ̆ Ia Púch tŏk bŏk đei iŏk jang đơ̆ng tơring. Ƀơ̆t mă kon pơlei băt hơdah tơdrong pơhlŭ pơhlôm 'noh gơh chă vei vêr kơdih po păng tơroi tơbăt ăn khul jang kơpal, tang găn đei tơdrong pơhlŭ tĕch răt bơngai đơ̆ng hrôih, tơgop vei sơđơ̆ng tơpôl tơ̆ tơring sơlam teh.