Hloh 1 sơnăm bơ̆jang kiơ̆ tơdrong tŭn pran hŏk pơhrăm păng pơm kiơ̆ jơhngơ̆m đon ‘lơ̆ng ƀok Hồ, xăh kăn kư̆ kach mang Ea M’Droh, dêh char Đắk Lắk akŏm tơlĕch jang 2 tơdrong jang: “Rong nhŭng teh păng bơ̆jang kiơ̆ ‘mơ ‘met”, “Mĭnh chi ƀô̆ vang yak hơdai hăm unh hnam kon pơlei klăih đơ̆ng dơnuh hin”. Kang ƀô̆, đảng viên tơgop jên mong ‘mơ ‘met, dôm chi ƀô̆ iŏk tơgŭm rim unh hnam hăm dôm tơdrong jang hơdăh.

Lơ̆m sơnăm âu ki, tơdrong ‘mơ ‘met 1.000 hlak jên 1 ‘nu 1 năr hlôi pơm đei jên mong hloh 99 triệu hlak jên. Tơdrong jang rong nhŭng teh sơnăm 2025 hơvơn đei vă jê̆ 128 triệu hlak jên. Hơdai hăm dôm jên mong păng jên jang tơgŭm nai, xăh Ea M’Droh hlôi tơgŭm 5 tơdrong jang sa, man ‘nao păng pơm hơmet ming 5 tŏ hnam, tơgŭm ưh kơ ê 11 unh hnam.

Tơ̆ hop akŏm ‘năr 12/11, tang măt 27 chi ƀô̆ lơ̆m Đảng bộ xăh pơgơ̆r teh nhŭng teh sơnăm 2026, iŏk đei hloh 152 triệu hlak jên. Dôm jên tơgop iĕ đei tơnôm dơ̆ng jing jên mong tơgŭm bơngai mơmat tat. Ƀok Nguyễn Văn Hào, Bơngai pơgơ̆r pơlei plei Hiệp Kết, xăh Ea M’Droh tơroi.

“Tơdrong jang rong nhŭng lơ̆m ou jĭ tơdrong jang 'lơ̆ng, rim bơngai kăl mong lơ̆m minh năr noh 1.000 hlj đĕch 'noh đei bơih kơsô̆ jên vă tơgŭm ăn dôm bơngai tơnap tap, bơngai hin hŏk, pơm trong tơgŭm ăn đe sư găn hloh rim tơdrong tơnap tap lơ̆m tơdrong hơrih. Inh ƀôh tơdrong jang ou kŭm athei pơlan să truh lơ tơring  hloh”

Atŭm hăm tơra jên, xah Ea M’Droh jang hơdrol tơdrong jang “Rim chi ƀô̆ yak hơdai hăm unh hnam kon pơlei vă tơjur hin dơnuh” tơ̆ 4 chi ƀô̆: Rim hơnih jang Đảng, Hơnih vei lăng kon pơlei xah, Kŏng an păng Kul linh. Rim chi ƀô̆ iŏk tơgŭm minh unh hnam, chă hơlen băt tơdrong hơrih vă đei trong tơgŭm trŏ ƀlep. Đei unh hnam đei tơgŭm ăn rơmo yŏng, pơm hnam; đei unh hnam đei đe đảng viên ăn mơng teh choh jang vă jang hơtŏk pơyua.

Ƀok Trần Doãn Tới, Bí thư Đảng ủy xah Ea M’Droh ăn tơbăt, đơ̆ng rŏng kơ pơtôch tơdrong jang, xah pơih să tơdrong ou ăn rim jơnŭm jang, hơnih jang mŭk drăm vang jang vă tơgŭm unh hnam hin dơnuh:

“Đơ̆ng tơdrong jang hơdrol 'noh nhôn khŏmmă pơih să tơdrong jang, ưh hơdrô̆ jĭ hơnih jang Đảng hơdoi mă rim hơnih pơgơ̆r tơdrong lui khop, rim hơnih jang mŭk drăm, rim bơngai jang 'mêm bơnat, tơ-'ngla bơngai jang lơ̆m păng 'nguaih kơ xah, lơ̆m păng 'nguaih kơ dêh char vă atŭm jơhngơ̆m hăm Ea M’Droh keh đang jang kiơ̆ Tơchơ̆t Hop akŏm Hơnih jang Đảng xah 'măng mă mônh 'noh truh sơnăm 2030 xah Ea M’Droh pă đei oei unh hnam hin dơnuh păng tơjê̆ hin dơnuh”