Thủ tướng ră hơdah, Jơnŭm pơgơ̆r teh đak hlôi kăt tơjur kơsô̆ tơdrong jang đơ̆ng jên mong Trung ương oei pă hloh 3.000 tơdrong jang dơnơm, gơh pơlan să hloh. Atŭm hăm tơdrong jang tơjur jên thuê̆ pơhlom 256 rơbou tih hlj, bơngai chĕp kơ̆l kơ jơnŭm pơgơ̆r teh đak pơkăp athei sơđơ̆ng kơjă hlak jên, pơtăl tơtom kang ƀô̆ klenh tơdrong jang păng pơm trong hơtŏk kơtang ăn sơnăm jang 2026–2030.

Vă akŏm jơhngơ̆m jang păng hơtŏk tơdrong tơgar jang mŭk drăm, Thủ tướng ăn tơbăt gô akŏm lơ̆m dôm trong jang dơnơm, hơdrin hơtŏk jên mong pơhlom 9%, mong kơtă 5% jên asong jang kŏng păng 10% jên huach hơnơ̆ng; hơtŏk tơring tĕch răt hăm jên jang đunh khei năr, pơtrŭt gah trăi phĭu hơnih jang mŭk drăm păng hơvơn jên mong asong jang lơ̆m apŭng plenh teh. Asong jang gah kŏng ngĭp dơnơm unh hơyuh, điê̆n tưh, bán dẫn; hơtŏk choh jang xa kiơ̆ trong 'nao, ưh đei tơpăr hơyuh 'mê̆ tơguăt hăm pơm tơlĕch tơmam drăm 'lơ̆ng; hơtŏk kơtang gah tơmang pơhiơ̆, logistics păng hơtŏk tơdrong iŏk yua. Atŭm hăm noh vei sơđơ̆ng tơdrong asong unh hơyuh, tơmam yua kăl, kăt tơjur jên huach brah brư păng pơjao hơlen kơjăp tơdrong pơhuach jên ăn rim tơring, vei sơđơ̆ng ăn rim kon pơlei gơh đei xa yua tơdrong jang jơnei đơ̆ng hơtŏk tơ-iung.