Lơ̆m dêh char Đắk Lắk dang ei đei 787 anih tep pơdơ̆h pơyoa ăn chă tơmang lăng hăm vă jê̆ 14.400 lăm tep; 51 anih jang găh tơmang lăng păng dang 28.100 ‘nu bơngai oei bơ̆ jang tơ̆ anih chă tơmang lăng. Lơ̆m 6 khei blŭng sơnăm, Đắk Lắk sơng đei hlŏh 5,3 triu ‘nu tơmoi, akŏm đĭ đăng jên đei iŏk yoa dang 9.600 ti, tŏk vă jê̆ 38% pơting hăm khei âu sơnăm sơ̆.

Tơ̆ jơ bơ̆jang, Khul dăr lăng đơ̆ng Jơnŭm pơgơ̆r kon pơlei dêh char Đắk Lắk athei Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng hơnơ̆ng jang hơdoi hăm dôm anih jang, tơring tơrang hơtŏk tơdrong dăr lăng tơdrong jang xa, tĕch mơdro, pơvih ăn chă tơmang lăng; hơtŏk tơdrong jang hăm kơmăy sô̆; hơtŏk tơdrong ‘lơ̆ng mưh pơvih pơvăn păng hơlen năng, tơlĕch nơ̆r athei hơmet pơ ‘lơ̆ng dôm tơdrong hơgăt đơ̆ng luơ̆t đei ƀơm truh vă pơjing tơdrong ‘lơ̆ng ăn tơdrong chă tơmang lăng tơ̆ tơring jang tŏk pran kơjăp.