Hop akŏm sơkơ̆t hơdah, sơnăm 2025 jĭ minh sơnăm tơnap tap, ah mă tơdrong hơtŏk Mŭk drăm (GRDP) lơ̆m dêh char Đăk Lăk đei yua 6,68%, ưh đei jơnei nhen tơchơ̆t jang 8% hlôi tơlĕch. Tơdrong tơm pơm đei tơdrong ou noh, jên asong jang oei adar, hơdrô̆ đei pơhlom 43% tơdrong pơjao jang; kơsô̆ jên asong jang lơ̆m tơpôl đei 82,5%. Atăm kơ noh, dêh char pŭ răm kơtang đơ̆ng 'mi kial đak hơbông ah hơtuch sơnăm. Mă ưh đei jơnei nhen tơchơ̆t tơlĕch, mă lei sơnăm 2025 tơ̆ Đăk Lăk adoi băt hơdah dôm tơdrong jang tơnăp gah mŭk drăm – tơpôl.

Pơtêng hăm sơnăm 2024, tơmơ̆t jên mong ăn teh đak đei 16.490 tih hlj, tŏk 17%, tơmam tĕch ăn teh đak đe đei pơhlom 2,8 tih đôlar, tŏk 26%. Kiơ̆ tơblang tơdrong đei ƀôh, Hơnih jang Tĭnh uy hlôi drơ̆ng nơ̆r tơchơ̆t hơtŏk GRDP sơnăm 2026 đei 10% (hơtŏk truh 2 kơsô̆), tơƀôh tơdrong jang chĭnh trĭ khŏm mă akŏm đei trong hơtŏk tơ-iung đơ̆ng rŏng kơ 'mi kial đak hơbông pơrăm.