Tơ̆ phương Buôn Ma Thuột pơgơ̆r ‘măng tơƀơ̆p dih băl tơgoăt mơdro sa dih băl Dak Lăk-Trung Quốc, vă pơtrŭt kơtang lang să jang hơdoi mơdro sa tơmam drăm choh jang sa Việt-Trung, mă kăl ‘noh lơ̆m tơdrong tĕch răt sâu riêng. Tơ̆ hop akŏm, rim bơngai tang măt chă pơma dơnuh, hơlen hơdăh tơdrong ‘meh vă răt iŏk ‘nhot plei ‘long, mă kăl ‘noh plei sâu riêng tơ̆ Trung Quốc. Sơnăm 2024, sâu riêng Việt Nam tĕch tơ̆ teh đak Trung Quốc đei 736.000 tân, tŏk vă jê̆ ƀar ‘măng pơtêng hăm sơnăm hơdrol. Kiơ̆ đơ̆ng hơnih mơdro sa Trung Quốc, ‘ngoăih tơdrong đei rơvơn đơ̆ng Tơdrong tơchơ̆t Jang hơdoi Mŭk drăm Tôm tong Tơring, “Trong hiôk” sơlam teh đak Việt – Trung tơgŭm ăn gơ̆h koa tĕnh koăng, tơdrong ‘meh vă răt iŏk đơ̆ng kon pơlei kơtang ‘noh tơdrong ‘lơ̆ng hơ iă kơ tơring pơtăm, plei ‘lơ̆ng păng tơdrong tĕch mơdro prăt sơnăm hlôi tơgop pơm tŏk mŭk drăm kơtang kơ tơdrong tĕch mơdro sâu riêng Việt Nam tơ̆ Trung Quốc. Rim hơnih jang, hơnih mơdro sa Việt Nam jei tơroi tơbăt găh trong jang, hơnih tĕch răt sâu riêng. Rim bơngai tang măt hơpơi ‘meh vă pơjing rim trong jang hơdoi, sơđơ̆ng trŏ lăp pơkăp ‘lơ̆ng đơ̆ng blŭng păng hơmŏ tơdrong răt iŏk sơđơ̆ng, trŏ lăp hloh. Jơ ‘năr ou, tang măt ăn rim hơnih jang vang kĭ pơkăp hla bơar ƀlŏk hơdơ̆r jang hơdoi lơ̆m tĕch răt tơmam drăm choh jang sa păng sâu riêng. Khul mơdro sa dêh char Dak Lăk atŭm hăm khul mơdro sa Trung Quốc hlôi kĭ pơkăp pơjing Hơnih tơm tech răt plei ‘long ASIAN pơjing tơ̆ dêh char Dak Lăk.