Dak Lak đei tơdrong 'lơ̆ng găh teh, tơmam đơ̆ng choh jang xa păng anih tơƀưh Tây Nguyên hăm tơring tơter đak dơsĭ găh Pơbăh kơ tơring Tŏk bŏk. Mă lei, vă hơtŏk kơsư̆k pơjei, dêh char kăl kơ tơplih đơ̆ng jang tŏk gơnơm đơ̆ng tơmam jing jang tŏk gơnơm đơ̆ng tơdrong hlôh vao, kơmăy kơmŏk păng kơjă kăp gĭt.

Tơ̆ hop akŏm, dôm bơngai tang măt pơma tơƀôh 1 lơ̆m dôm tơdrong tam mă 'lơ̆ng 'noh jĭ tơdrong vang tơchĕng hơlen khoa hŏk păng tơdrong 'mĕh vă jang hơdoi tơ̆ yăn âu tam mă kơjăp. Lơ tơdrong tơchĕng hơlen đei tam mă tơmât yua lơ̆m tơdrong jang xa, ƀât mă anih jang mŭk drăm, hơp tak xăh oei hơnat vă sơng đei bơngai juăt jang păng kơmăi kơmŏk lăp ‘lơ̆ng. Lơ tơdrong tơchĕng iung jang xa kŭm tơƀâp pơmat tat găh anih jang tŏk păng jên, tơmam vă jang.

Vă pơm tơjur ƀiơ̆ tơdrong ataih băl đơ̆ng tơchĕng hơlen păng tơdrong jang xa tơ̆ yăn âu, dôm bơngai juăt jang tơlĕch nơ̆r athei hơtŏk mă brĕ tơdrong jang hơdoi đơ̆ng Teh đak – hnam trưng – anih jang mŭk drăm, hơtŏk hơnăp jang pơm gơng tơƀưh đơ̆ng dôm anih dơ̆ng hơlam, hơtŏk tơdrong pơtho tơƀôh kơmăy kơmŏk păng tĕch pơdro dôm tơdrong tơchĕng hơlen đei, mă loi hăm dôm anih jang đei tơmam tơm nhen cheh phe, tiu, sâu riêng.