Hloh 120 km jĭ jăl trong ‘nhŏng Vũ Thế Lực kŭm hăm grŭp kon pơlei jang chŭn mir tơ̆ xăh Ea Ning, dêh char Đắk Lắk, năm klĕch vă truh tơ̆ pơgar hơdrĕch kơ ƀok Lê Tùng Linh tơ̆ xăh Trường Xuân, dêh char Lâm Đồng. Đe sư ‘meh băt hơdăh tơm a hơdrĕch tiu hơdrol kơ tơlĕch jên tơmơ̆t jang. Hăm bơngai pơtăm tiu nhen ‘nhŏng Lực, rơih hơvơ̆l hơdrĕch vă khan hơdai hăm hiong lơ sơnăm jang, athei pơtơm blŭng dơ̆ng 1 khei ‘năr jang sa.

“Chă hơlen lăng kiơ̆ lơ̆m mạng ‘noh lơ bơih mă lei răt hơdrĕch ‘noh năm chă hơlen lăng đơ̆ng tơm, truh tơ̆ pơgar tơm vă kơ ƀlep. Bơngai tơmơ̆t jên jang nhen ĭnh ‘noh hli hloh ‘noh jĭ tơlĕch jên răt hơdrĕch, pơtăm tiu 2-3 sơnăm, ƀơ̆t đei plei mă chă ƀôh đei ưh kơ trŏ hơdrĕch Tiu Tùng Linh, mă tă kơ hơdrĕch lai, hơdrĕch ya ‘noh kơplăh doh hiong jơ ‘năr bơih, ưh pă đei khei ‘năr jang ming dơ̆ng bơih”.

Tơdrong tơtăm, bơngơ̆t kơ hơdrĕch ya đơ̆ng ‘nhŏng Lực ‘noh jĭ tơdrong bơngơ̆t atŭm đơ̆ng kơ triệu kon pơlei jang chŭn mir tơ̆ Tây Nguyên, păng kŭm jing tơdrong ƀok Lê Tùng Linh tơchĕng lơ̆m tơdrong jang hơtŏk tơiung hơdrĕch tiu chĕp hơnăn sư.

Sơnăm 2014, ƀơ̆t vei lăng pơgar tiu kơ unh hnam, ƀok chă ƀôh 1 tơnơm đei bluh jing pha. Ƀok hlôi ‘măn lơ sơnăm răp hơlen, rơih iŏk păng pơm hơdrĕch. Truh sơnăm 2021, hơdrĕch tiu Tùng Linh đei tĕch tơ̆ anih tĕch mơdro. Hơdrĕch tiu ‘nâu đei rơh chăt pran, tơm bluh jing ‘lơ̆ng, kĕ tơjră hơdrông pơrang pơrăm ‘lơ̆ng. Đơ̆ng tơm blŭng a, ƀrư̆ ƀrư̆ pơjing pơgar pơm tơlĕch hơdrĕch, dang ei đei dang 8.000 jrăng tiu pơyua ăn pơm hơdrĕch.

Sơnăm 2023, tiu Tùng Linh đei drơ̆ng ăn ‘noh jĭ ‘long tơm; sơnăm 2025, pơgar ‘long đei drơ̆ng ăn ‘noh jĭ pơgar ‘long tơm, kĕ pơtruh dang 700.000 tơnơm hơdrĕch rim sơnăm. Tiu hơdrĕch Tùng Linh kŭm đei Anih tơm Khoa hŏk păng Kơmăy kơmŏk asong hla ar drơ̆ng ăn chih hơnăn.

Hăm ƀok Linh, hơtŏk tơiung đei hơdrĕch tiu ‘nao ‘noh jĭ 1 jơnei, mă lei hơnhăk hơdrĕch ƀlep tơm a truh ti bơngai pơtăm ‘noh jĭ tơdrong kăl kơ bơngơ̆t truh. Yua kơ tơdăh răt ƀơm hơdrĕch ya, kon pơlei jang chŭn mir ưh khan lăp hiong jên đĕch mă oei hiong hloi khei ‘năr păng tơdrong hiôk jang sa. Đei pôk hơnăn ‘noh jĭ Kon pơlei jang chŭn mir Việt Nam gơh hơgei 40 sơnăm Tơplih ‘nao, ƀok Linh oei bơngơ̆t, tơtăm kơ hơdrĕch ya păng ‘meh vă rim anih jang kơpal vang mơ̆t jang vă vei lăng kon pơlei jang chŭn mir.

“Đei rơih ‘noh jĭ bơngai jang chŭn mir gơh hơgei ‘noh tôch kơ hơiă, tôch chhôk ‘nă. Inh ‘meh vă akhan, anih jang kơpal vang jang hơdai pơm liơ hŭt lê̆ tơdrong hơdrĕch tiu ya lơ̆m anih tĕch mơdro. Vă hơnhăk hơdrĕch trŏ ƀlep truh hăm kon pơlei jang chŭn mir bơ̆n, oei tơdăh răt hơdrĕch ya ‘noh jĭ pơm mơmat ăn kon pơlei jang chŭn mir đĕch”.

Ƀok Nguyễn Văn Anh, Kơdră Khŭl vei lăng Kon pơlei jang chŭn mir xăh Trường Xuân, dêh char Lâm Đồng, tơbăt hơdrĕch tiu Tùng Linh tơm bluh jing pran, kĕ tơjră pơrang jĭ păng ăn plei ‘lơ̆ng:

“Nhôn tôch kơ chhôk hơiă ƀơ̆t ‘nhŏng Linh jĭ 1 lơ̆m 96 ‘nu kon pơlei jang chŭn mir gơh hơgei kơ Việt Nam sơnăm 2026. ‘Nhŏng Linh ưh khan lăp jing bơngai chă ƀôh, pơm lơ đei hơdrĕch tiu đei lơ tơdrong ‘lơ̆ng, trŏ lăp hăm tŏ ‘mi kial, teh tơ̆ Tây Nguyên pơma atŭm păng tơ̆ lơ tơring ‘nai. ‘Nhŏng Linh kŭm đei lơ tơdrong vang tơgop ăn tơdrong jang tơpôl, tơdrong chă tơgŭm ‘mêm mơnat tơ̆ tơring.”

Đơ̆ng 1 tơm tiu tơplih pha lơ̆m pơgar, ƀok Lê Tùng Linh hlôi hơdrin chă hơlen lăng, hơtŏk tơiung hơdrĕch tiu chĕp hơnăn sư, pơih dơ̆ng tơdrong hiôk ăn bơngai pơtăm tiu. Mă lei kơjă kăp gĭt đơ̆ng kon pơlei jang chŭn mir gơh hơgei ưh khan lăp đei tơ̆ jơnei mŭk drăm, mă oei tơ̆ jang tơnăp hăm tơpôl.