Đơ̆ng rŏng mĭnh khei jang kiơ̆ trong bơ̆ jang khul kơdră chĕp pơgơ̆r tơring ƀar kâp, Dak Lăk ‘nao tơbăt jang kiơ̆ kơtang găh ưng yŭng khoa hŏk-kmăi kmŏk, adoi jei tơjră muh măt hăm tơdrong ưh hơtŏ dih băl kơtang ƀar păh rim tơring, phương lơ̆m tơplih kơsô̆ păng hơmet ming bơ̆ jang. Dêh char hlôi jang keh đang 96 tơdrong jang kiơ̆ ƀlep trong tơlĕch ăn đơ̆ng Tơdrong tơchơ̆t 71 kơ Khul kơdră Teh đak, adoi tơmơ̆t jang kiơ̆ kmăi kmŏk hop akŏm trư̆k tuyên truh hăm đĭ đăng 102 tơring, phương păng tơgoăt camera lăng hơlen tơ̆ hơnih tơm bơ̆ jang teh đak rim tơring. Mă lei, tơpă yan ou đei ƀôh, dôm kmăi kmŏk kơsô̆ tơ̆ Dak Lăk oei tim mă hơtŏ dih băl. Lơ tơring oei tim mă đei kmăi kmŏk chih ăn kơsô̆, jĭ kmăi kmŏk kăl hloh kiơ̆ tơdrong tơchơ̆t. Pleh ploh dih băl găh hô sơ trư̆k tuyên ƀar păh rim tơring, phương oei tôch kơ lơ; đei tơring lăp sơng iŏk đei 3-5 hô sơ lơ̆m năr. Găh bơngai jang, đei tŏ sĕt kang ƀô̆ tơring, phương đei hŏk pơhrăm jang tơm găh kmăi kmŏk kơtơ̆ng ang. Hrei ou dêh char Dak Lăk tŏk bŏk tơ iung pơjing ƀar tơdrong vă jang găh atŏk tơ iung khoa hŏk-kmăi kmŏk, tơplih kơsô̆ tơchăr păng tơplih kơsô̆ lơ̆m dêh char vă pơjing hơyak kơtang ăn jăl jang atŏk tơ iung truh ou kơnh. Adoi, dêh char jei atŏk kơtang dăr lăng, hơmet ming khul bơ̆ jang trŏ lăp vă sơđơ̆ng jang kĕ dôm tơdrong đei pơjao, tơdrong jang ‘nao lơ̆m trong bơ̆ jang khul kơdră chĕp pơgơ̆r tơring ƀar kâp.