‘Nâu jĭ hơyăk hơmet ăn gĭt kăl vă vei sơđơ̆ng jang đang hơmet pơ ‘lơ̆ng trong tơgŭm ăn dôm bơngai hơdrol kơ khei ‘năr hơgăt tuch luch 31/8 Kiơ̆ Tơdrong tơchơ̆t 183 đơ̆ng Anih tơm Chĭnh trĭ. Truh dang ei, Đắk Lắk hlôi kla jên tơgŭm ăn kơ 709/2.608 ‘nu bơngai đei sa yua kiơ̆ Tơdrong tơchơ̆t 178, hăm akŏm jên hloh 704 ti hlak jên. Kơsô̆ uơ oei dơ̆ng 1.899 ‘nu, kăl hloh 2.164 ti hlak jên vă kla ăn.

Anih vei lăng jên hu dêh char Đắk Lắk ăn tơbăt hlôi đei Trung ương tơmơ̆t dơ̆ng hloh 626 ti hlak jên, jên jang dêh char hơmet ăn 195 ti hlak jên, oei ưh kơ măh hloh 1.343 ti hlak jên tŏk bŏk athei Trung ương asong tơmơ̆t dơ̆ng. Yă Hồ Thị Nguyên Thảo, Phŏ Kơdră Anih vei lăng kon pơlei dêh char Đắk Lắk athei dôm anih jang, tơring dăr hơlen, chih tơchơ̆t dơ̆ng hla ar hô sơ, vei sơđơ̆ng hơlen lăng păng akŏm tơtom vă Anih tơm vei lăng Jên hu tơmơ̆t dơ̆ng jên, kla tôm ăn kang ƀô̆, bơngai jang kiơ̆ tơdrong hơgăt.