Tơdrong ming man jăl trong kơdou hrĕnh Quy Nhơn – Pleiku hơtaih pơhlom 125 km, trong să mah ăn 4 tong gre kơdou hơdoi, đei kơsô̆ jên asong hloh 43.700 tih hlj păng đei asong jang jing 3 tơdrong ming man klah. Lơ̆m noh, Tơdrong ming man 3 hơtaih pơhlom 35 km, đơ̆ng Km 90 truh Km 124, hăm kơsô̆ jên asong jang hloh 9.100 tih hlj. Jăl trong găn 6 xah, phương đei Lơ Pang, Mang Yang, K’Dang, Đak Đoa, Ia Băng păng Hội Phú; kơchĕng gô keh đang ah sơnăm 2029.

Pơma ah lêh pơtơm, ƀok Phạm Anh Tuấn – Kơdră Hơnih jang vei lăng kon pơlei dêh char Gia Lai ăn tơbăt, Jăl trong 19 dang ei jing jăl trong dơnơm pơtoi tơring Hơlĕch – Pơmơ̆t kơ dêh char Gia Lai đơ̆ng rŏng kơ tơmơ̆t hơdai tơring jang hanh chĭnh, chŏng mă adoi oei đei lơ jăl trong kông kuĕl, trong iĕ hrăt hrot, ưh đei sơđơ̆ng hăm trong nơnăm, jing hơnih tơhlăk tih hloh hăm hơtŏk mŭk drăm – tơpôl kơ dêh char. Ah keh đang, jăl trong kơdou hrĕnh Quy Nhơn – Pleiku gô pơm kơđeh jơ năr vih vơ̆t, tơjur ƀiơ̆ jên huach, hơtŏk tơdrong jang hơdoi kơ tơring, pơjing jăl trong dơnơm Hơlĕch – Pơmơ̆t, pơtoi hăm jăl trong kơdou hrĕnh Tu – Pơbah, cham gre păr, dơnŏk đak dơsĭ păng 'măng sơlam apŭng plenh teh Lệ Thanh, kiơ̆ đơ̆ng noh hơtŏk mŭk drăm – tơpôl păng hơtŏk tơdrong hơrih kon pơlei. Dêh char Gia Lai pơtruh nơ̆r hăm rim hơnih asong ming man athei ming man mă 'lơ̆ng kơjăp hăm tơdrong jang, vă vei sơđơ̆ng 5 sơnăm thoi lĕ tơchơ̆t tơlĕch.