Đại tá Trần Văn Quyển, Kơdră chĕp pơgơ̆r Lữ đoàn 146 tơbăt: Năr 8/5/1978 jĭ jăl trong gĭt kăl hloh, pơih đei hơyak ‘nao kơ mĭnh hơnih đei hơnăn gĭt kăl kơ teh đak: Tơ iung pơjing khul tang găn hơlou iung tơblăh vei lăng achon đak dơsĭ, tenh koăng sơđơ̆ng khul jang, hơmet pơ ‘lơ̆ng rim tơdrong kơ ƀăh kơƀôch ‘măng mă blŭng, roi năr roi tơ iung pơjing đei tơdrong gơh hơgei pran kơtang, pơgơ̆r pơtho pơhrăm, tơ iung pơjing rim trong iung tơblăh vei lăng achon dơsĭ. Yak hloh 48 sơnăm, Lữ đoàn 146 hlôi jing khul gĭt kăl hloh lơ̆m vei lăng năng tông achon dơsĭ Trường Sa. Lăp hơdrô̆ lơ̆m 10 sơnăm ou ki, hơnih hlôi ƀôh 5.000 ‘măng tơdrong đe vă pơm glăi tơ̆ rơvơ̆ng plĕnh, tơ̆ đak dơsĭ; tơtom pơchoh trong, hơmet pơ ‘lơ̆ng dôm tơdrong, ưh kơ lê̆ đei tơdrong ưh kơ tom băt; iung jang vă jê̆ 150 ‘măng năm tơchă, dŏng tơgŭm; ming hơmet vă jê̆ 1.500 ‘nu kon pơlei rôp ka hơdang; dui dŏng vă jê̆ 60 tong duk rôp ka hơdang răm vih tơ̆ hơnih sơđơ̆ng.

Kiơ̆ đơ̆ng Đại tá Trần Văn Quyển, hrei ou, tơ̆ hơnăp tơdrong pơkoel kơ tơdrong jang vei lăng năng tông pơm tơngla achon đak dơsĭ lơ̆m chăl hle, Lữ đoàn 146 hơnơ̆ng atŏk tơ iung ‘lơ̆ng pơtho pơhrăm, kơchăng iung tơblăh kơtang, tơ iung pơjing Lữ đoàn pran kơjăp iăp kơtang tôm tong.“ Lữ đoàn ling lang tơlĕch jang kiơ̆ kơjăp trong jang pơtho pơhrăm kăl, tơpă, kơjăp iăp kơtang’; pơgơ̆r pơhrăm trŏ ƀlep hăm tơdrong jang, trŏ ƀlep hăm khul jang, trŏ lăp hăm kơdrăn tơblăh tơ̆ đak dơsĭ achon dơsĭ. Adoi vei kơjăp sơđơ̆ng dơ̆ng kơjăp khul, gre kmăi kmŏk kơchăng iung tơblăh, pơm hơtŏk kĕ hơmet pơ ‘lơ̆ng dôm tơdrong đei ƀôh, hoei ưh kơ tom băt lơ̆m rim tơdrong”.

Ưh khan lăp lăng kơjăp pơm hơtŏk ‘lơ̆ng pơtho pơhrăm, kơchăng iung tơblăh, Lữ đoàn 146 oei lăng ba kơjăp truh tơdrong tơ iung pơjing jơhngơm đon chinh trĭ kơjăp iăp kơtang ăn ƀô̆ đô̆i tơ̆ achon dơsĭ. Tơ̆ lơ̆m cham char ƀĕnh ƀang tŏ kial tơhlu, hơtăih kơ groi teh, tơjră muh măt hăm ƀenh ƀang tơdrong tơnap tap, tơdrong long, bơ̆ jang pơtho pơhrăm chinh trĭ, jơhngơ̆m đon ling lang đei khul kơdră đảng, kơdră chĕp pơgơ̆r hơnih tơlĕch jang hơnơ̆ng, jơnei kơjăp, tơgŭm ăn kang ƀô̆, ƀô̆ đô̆i đei dơ̆ng jơhngơ̆m đon kơjăp iăp kơtang. Đại tá Phạm Văn Thọ, Chính ủy Lữ đoàn 146, Tơring 4 Ƀô̆ đô̆i đak dơsĭ pơma hơdăh:“Nhôn hlôi tơlĕch iung jang rim trong jang, lơ̆m ou mă kăl lăng ba kơjăp truh tơdrong pơtho pơhrăm tơdrong joăt joe pơm hơtŏk jơhngơ̆m đon ăn rim kang ƀô̆, ƀô̆ đô̆i jơhngơ̆m đon hưch hanh hơmanh bơnê găh tơdrong joăt joe kơ Đoàn Trường Sa Nuih mơng. Đơ̆ng noh tơ iung pơjing ăn kang ƀô̆, ƀô̆ đô̆i đei jơhngơm đon chinh trĭ kơjăp iăp kơtang,; kơrŭn đĭ ai iung tơblăh; jang kiơ̆ ‘lơ̆ng jơhngơ̆m đon ‘lơ̆ng kơ Ƀô̆ đô̆i Ƀok Hô - bơngai ƀô̆ đô̆i Đak dơsĭ; kơchăng iung tơblăh, plang ăn pham lĕch sĕch huŏng vă vei lăng năng tông kơjăp iăp kơtang pơm tơm đak dơsĭ, achon dơsĭ kơ Teh đak lơ̆m rim tơdrong.”

Jang kiơ̆ tơdrong joăt joe kơ hơnih ƀar ‘măng đei pôk ăn hơnăn Ƀô̆ đô̆i kon pơlei nuih mơng pran kơtang, năr ou, tơ̆ rim achon kơ tơpôl achon đak dơsĭ Trường Sa, kang ƀô̆, ƀô̆ đô̆i Lữ đoàn 146 oei prăt măng prăt năr ti chĕp phao kơjăp iăp kơtang vei lăng pơm tơngla achon đak dơsĭ gĭt kăl  Teh đak. Mă đơ̆ng tơdrong bơ̆ jang oei ƀĕnh ƀang tơnap tơnap tap, kơƀăh kơƀôch, mă lei rim ƀô̆ đô̆i Trường Sa ling lang sơkơ̆t hơdăh hơnăp jang, lăng achon dơsĭ jĭ hnam, đak dơsĭ ‘noh jĭ pơlei pơla. Trung tá Trần Huy Phụng, Chính trị viên Achon đak dơsĭ Trường Sa sơkơ̆t hơdăh:“Kang ƀô̆, ƀô̆ đô̆i lơ̆m achon dơsĭ ling lang pran kơjăp iăp kơtang jơhngơ̆m đon chĭnh trĭ, jơhngơm đon nuih mơng pran kơtang. Mă đơ̆ng lơ̆m jơ ‘năr ayơ, mă đơ̆ng pơm ăn truh tơdrong plang ăn akou nhôn oei kơrŭn đĭ jơhngơ̆m đon vei lăng năng tông kơjăp iăp kơtang tơdrong pơm tơm tơngal achon đak dơsĭ gĭt kăl kơ Teh đak”.

Hưch hanh hơmanh bơnê kiŏ yok rok jơ̆ng joăt joe đơ̆ng mih ma yak hơdrol, jơhnơr kang ƀô̆, ƀô̆ đô̆i mơlôh kơ Lữ đoàn 146 hrei ou tŏk bok hơnơ̆ng pơhrăm, plang ăn, tơgop lơ̆m tơ iung pơjing hơnih pran kơjăp iăp kơtang tôm tong. Trung tá Nguyễn Thành Vũ, Kang ƀô̆ sơnăm mơlôh Lữ đoàn 146, Tơring 4 Ƀô̆ đô̆i đak dơsĭ tơbăt jơhngơ̆m đon: Đei bơ̆ jang lơ̆m hơnih jang ƀar ‘măng đei pôk ăn Khul Ƀô̆ đô̆i kon pơlei nuih mơng pran kơtang jĭ hưch hanh hơmanh bơnê pă băt dang yơ hloi hăm rim kang ƀô̆, ƀô̆ đô̆i Đoàn Trường Sa:“Ba tôch hưch hanh hơmanh bơnê jĭ sỹ kuan mơlôh kơ Đoàn Trường Sa nuih mơng. Ba gô hơnơ̆ng hơdrin yak hloh tơdrong tơnap tap tơgop vei lăng năng tông kơjăp iăp kơtang groi teh achon dơsĭ, đak dơsĭ gĭt kăl kơ Teh đak”.

Yak hloh vă jê̆ pơđăm jĭt sơnăm, đơ̆ng dôm năr ƀlŭng ƀĕnh ƀang tơdrong tơnap tap, tơmam drăm kơƀăh kơƀôch, rim jơhnơr kang ƀô̆, ƀô̆ đô̆i Lữ đoàn hlôi pơm hơtŏk jơhngơ̆m đon nuih mơng pran kơtang vei kơjăp đak dơsĭ, kiơ̆ yok rok jơ̆ng nơ̆r pơkăp: “Chrơ̆m lôch ưh kơ lai yơ hơchăng achon dơsĭ; chrơ̆m hiong hơkou ‘lơ̆ng hloh gloh gloi hiong tơdrong pơm tơm tơngla”. Yak hloh ‘mi kial hơbŭt hơbông păng dôm tơdrong mơmat tat tơ̆ đak dơsĭ, tŏk bŏk lơ̆m đak dơsĭ Trường Sa dang ei, dôm ƀô̆ đô̆i Khul ƀô̆ đô̆i vei lăng đak dơsĭ oei ling lang prăt măng prăt năr vei lăng năng tông đak dơsĭ rơvơ̆ng plĕnh kơ Teh đak hăm jơhngơ̆m đon nuih mơng pran kơtang, hơnăp jang kơtang păng jơhngơ̆m đon hơpơi ‘meh vă plang ăn ling lang ưh pơdơ̆h. Tơ̆ kơ̆l tơring đak dơsĭ ‘noh, tơdrong joăt joe nuih mơng pran kơtang kơ Đoàn Trường Sa oei hơnơ̆ng đei chih dơ̆ng dôm tơdrong iŏk đei jơnei tih tên ‘nao lơ̆m tơdrong jang vei lăng năng tông pơm tơngla đak dơsĭ, achon dơsĭ gĭt kăl kơ Teh đak.