‘Năr 14/5, tơ̆ Anih bơ̆jang Trung ương Đảng, Anih pơgơ̆r jang pơtôch 100 sơnăm Đảng chĕp kơ̆l pơgơ̆r kach mang Việt Nam, trong jang chĕp kơ̆l hơtŏk tơiung teh đak lơ̆m 100 sơnăm pơtăl dơ̆ng păng pơtôch 40 sơnăm bơ̆jang kiơ̆ Hla ar tơchơ̆t pơjing teh đak lơ̆m khei ‘năr jang tŏk chủ nghĩa xã hội pơgơ̆r ‘măng hop akŏm ‘măng mă mônh. Pơgơ̆r ‘măng hop akŏm, Tổng Bí thư, Kơdră teh đak Tô Lâm pơma hơdăh, pơtôch 100 sơnăm Đảng chĕp kơ̆l, 40 sơnăm bơ̆jang kiơ̆ Hla ar tơchơ̆t athei đei ‘lơ̆ng gĭt kăl, tŏk ‘lơ̆ng lĭ luơ̆n păng tơdrong tơƀôh pơm ăn pơcheh ăn tơ̆ hơnăp kơnh.

Tổng Bí thư, Kơdră teh đak tơroi rơđăh, jơhngơ̆m đon ‘noh jĭ athei pơm rơđăh hloh tơdrong jang hơtŏk tơiung kơ Việt Nam, tơdrong jang chủ nghĩa xã hội păng jăl trong yak tŏk chủ nghĩa xã hội kơ Việt Nam kŭm hăm dôm tơdrong pơvei tih đei tơdrong ‘lơ̆ng lơ̆m kơplăh pơjing chủ nghĩa xã hội; pơjing tơdrong băt hơdăh pơm tơdrong ‘lơ̆ng vă pơjing Hla ar tơchơ̆t hơtŏk tơiung teh đak păng vei lăng Teh đak lơ̆m chăl ‘nao - chăl yak tŏk đơ̆ng hơdrĕch hơdrŭng. Tổng Bí thư, Kơdră teh đak Tô Lâm pơma hơdăh 3 tơdrong athei găh trong jang pơtôch, lơ̆m noh đei hơdai ‘lơ̆ng đơ̆ng lĭ luơ̆n păng yan âu; tơlĕch ăn tơ̆ hơnăp kơnh athei kiơ̆ lơ̆m ƀôh băt khoa hŏk, tơdra hơdrol trong vă jang păng ‘meh vă hơtŏk tơiung teh đak.