Roi tơbăt đei Anih tơm vei lăng găh Choh jang sa păng Cham char tơlĕch ăn tơ̆ Hop akŏm “Roi tơbăt dôm tơdrong hơgăt găh vei lăng rơgoh ‘lơ̆ng tơmam sa păng hơlen lăng pơrang jĭ tơ̆ kon tơrong, ‘long pơtăm lơ̆m Tơdrong tơchơ̆t jang hơdai Mŭk drăm Tôm tông Tơring (RCEP) păng Tơchơ̆t kơsô̆ 280 kơ Trung Quốc" ‘năr 14/5. Hop akŏm pơgơ̆r tơ̆ Đắk Lắk păng trực tuyến truh 34 hơnih pơih pơdăh tivi tơ̆ trung ương kŭm hăm dôm dêh char, pơlei tơm lơ̆m teh đak. Kiơ̆ roi tơbăt, khei ‘năr âu ki, dôm anih mơdro sa hlôi kơchăng pơm lăp hăm tơplih đơ̆ng anih tĕch mơdro, jang đang ‘lơ̆ng dôm hla ar răt tơmam. Dôm anih pơm tơlĕch tŏk bŏk hơdrin hơmet ‘lơ̆ng trong jang găh hơnăn kơsô̆ tơring pơtăm, hơlen lăng pơrang jĭ păng tơchă băt anih pơm tơlĕch vă pơm lăp hăm dôm tơdrong hơgăt ‘nao đơ̆ng anih răt tơmơ̆t đơ̆ng teh đak đe, mă loi ‘noh jĭ dôm tơdrong hơgăt đơ̆ng dôm tơdrong tơchơ̆t tĕch mơdro.

Mă lei, tơmam đơ̆ng choh jang sa đei kơ Việt Nam tŏk bŏk tơ jră hăm dôm ‘meh vă ki thuơ̆t roi ‘năr roi tôch kơ hơlen găh rơgoh ‘lơ̆ng tơmam sa păng hơlen lăng pơrang jĭ. Mă kăl ‘noh, păih Trung Quốc tŏk bŏk vei lăng kơhet tơmam sa răt tơmơ̆t đơ̆ng teh đak đe, akŏm vei kơjăp lơ̆m hơnăn kơsô̆, hla ar pơklep păng tơchă băt anih pơm tơlĕch. Hop akŏm âu pơtruh dôm tơdrong kơtơ̆ng ang, hơgăt ‘nao găh vei rơgoh ‘lơ̆ng tơmam sa păng vei lăng pơrang jĭ tơ̆ kon tơrong, ‘long pơtăm (SPS) lơ̆m tơdrong Tơchơ̆t Jang hơdai Mŭk drăm Tôm tong Tơring; tơdrong Tơchơ̆t kơsô̆ 280 păng 1,2 tơdrong roi tơbăt đơ̆ng Anih jang Hải quan Trung Quốc găh vei lăng pơm hla ar mơdro sa pơm tơlĕch tơmam sa teh đak đe răt tơmơ̆t lơ̆m anih tĕch mơdro Trung Quốc vă bơngai vei lăng, anih mơdro sa, hơp tak xăh, kon pơlei jang chŭn mir hlôh păng bơ̆jang kiơ̆, vei sơđơ̆ng dôm tơdrong ‘meh vă tơlĕch ăn.