Dôm năr ‘nâu, tơ̆ dôm chŭn na hơtuch pơyan tơ̆ plei Alao, xăh Mang Yang, dêh char Gia Lai, unh hnam ƀok Ngưm kŭm hăm lơ unh hnam oei pơgĕnh yoă iŏk ƀa phang vă tơtom pơjao teh ăn tơdrong jang man trong jăl 3 găh Tơdrong jang pơm trong gre kơdâu hrĕnh Quy Nhơn – Pleiku. Mă đơ̆ng 1 păh teh đei teh đak iŏk pơdreu, kon pơlei tơ̆ plei Alao oei lăp đon tơgŭm ăn trong jang yoa tơdrong vă jang tŏk đunh đai ning mônh kơnh.

Ƀok Ngưm tơroi, plei Alao đei 51 unh hnam đei teh mă teh đak vă iŏk pơdreu păng đĭ đăng unh hnam hlôi chu iŏk jên hrŭ ‘mong bơih, kơchăng yuih lê̆ pơk, pơsŭn, kŏh lê̆ ‘long, kăt yoa ƀa, hơƀo vă pơjao teh ăn tơdrong jang: “Bơnê kơ teh đak tơlĕch tơdrong jang ‘nâu. Đĭ đăng kon pơlei tơgŭm ăn tơdrong jang ‘nâu ngăl. Nhen hnam nhôn teh ƀơm trong đe pơm âu, chŭn ‘nŏh 2 sao, cheh phe ‘noh 1 sao; nhôn koh phă đĭ bơih vă pơjao ăn teh đak jang. Kon pơlei kŭm drơ̆ng nơ̆r tơgŭm ngăl”.

Hăm trong jang, pơjao teh truh dang yơ ming man truh dang noh, tơ̆ Tơdrong jang jăl 1 păng 3, tơring hlôi chưk pơ ‘ngoăih teh hlŏh 70%, dôm anih iŏk ming man akŏm đei kơhrĕng tŏ kơmăy kơmŏk, tơmam kŭm hăm rơnâu ‘nu bơngai jang, bơ̆ jang 3 ka 4 kip vă chưk hơmet teh pơm trong, man răih nang ăn đak lŏk ro păng tuh teh, man gơng, sir kôch trong trôm.

Lơ̆m noh, dôm tŏ gơng tơm nhen gơng An Nhơn, gơng pơm klech đak trong Sông Kôn, gơng Hà Nhe păng gơng kơpal trong gre kơdâu hrĕnh Bắc – Nam đei pơgơ̆r ming man tôch pơneh adrol kơ pơyan ‘mi truh. Ƀok Đoàn Minh Hoàng – Bơngai jang tơgŭm dăr lăng đơ̆ng Công ty jang hơdoi VNC, anih iŏk dăr lăng tơdrong jang man gơng An Nhơn 4 tơroi: “Gơng An Nhơn 4, dang ei hlôi khoan đei 12/24 tŏ jrăng, jang đei 50% tơdrong jang hơtâp jrăng. Dang ei tơ ‘ngla tơmât jên jang hlôi pơjao teh vă man gơng bơih. 2 păh gơng oei hơnơ̆ng chưk hơmet. Ƀât gơng dang ei nhôn oei gô đe chơ tơmam ming man vă pơm trong tơƀưh”.

Tơdrong jang man trong gre kơdâu hrĕnh Quy Nhơn - Pleiku kơjung dang 125km, akŏm đĭ đăng jên jang hlŏh 43.700 ti, năm klĕch 16 xăh, phường kơ dêh char Gia Lai, ƀơm truh tơ̆ hloh 4.600 unh hnam, hăm teh vă iŏk pơdreu hlŏh 1.097ha. Truh ‘năr 4/5/2026, kơsô̆ teh đei pơjao ăn tơdrong jang jăl 1 (22km) đei 70,5%; Tơdrong jang jăl 3 (25km) đei 72%. Hơdrô̆ tơdrong jang jăl 3 (kơjung truh 68km) oei pơm pơkeh hla ar vă tơlĕch jang lơ̆m khei 5/2026. Tơdrong chưk pơ ‘ngoăih teh, tơ̆ 10/12 tơring oei xa ‘nao tơter trong kŭm đei tơlĕch jang hrơ̆ch ‘lơ̆ng, tơchĕng adrol gô pơjao teh ăn kon pơlei pơm hnam lơ̆m khei 6/2026.

Ƀok Phạm Xuân Tỉnh, Phŏ Kơdră Anih pơgơ̆r jang man jăl 1 (găh Tơdrong jang man trong gre păng anih pơyoa ăn kon pơlei kơ dêh char Gia Lai) ăn tơbăt, tơdrong jang hơdoi tơdrong chưk pơ ‘ngoăih teh, hơdai hăm ming man hloi ‘nŏh jĭ trong jang hrĕnh hlŏh vă pơm ‘lơ̆ng ăn tơdrong jang gơ̆h ming man trŏ khei ‘năr hơgăt đơ̆ng dêh char athei: “Truh dang ei, tơdrong chưk pơ ‘ngoăih teh hlôi pơm lăp hăm tơdrong ‘mĕh vă tơlĕch jang ming man đơ̆ng anih iŏk jang. Nhôn kŭm hăm anih iŏk jang vang jang hơdoi hăm dôm anih đei ƀơm truh vă hơlen năng tơdrong hơmet hơdrol tơmam ming man, pơm lăp hăm nơ̆r athei găh ki thuơ̆t, vă tơlĕch jang ming man, vei lăng tơdrong ‘lơ̆ng păng năr hơgăt mưh ming man”.

Trong gre kơdâu hrĕnh Quy Nhơn - Pleiku tôch gĭt kăl hăm dêh char Gia Lai yoa pơjing đei trong tơm gĭt kăl tơƀưh tơring tơter đak dơsĭ Nam Trung Bộ hăm tơring groi kông kơ dêh char, vang tơgop tơguăt hơdai tơring, tơjur ƀiơ̆ jên chơ chuĕn păng pơih xă anih jang tŏk. Yoa thoi noh, dôm tơring păng anih jang ming man oei akŏm jơhngâm hơtŏk hrĕnh tơdrong jang ming man vă pơm ‘lơ̆ng ăn tơdrong jang gơ̆h jang đang trŏ năr hơgăt.