Pơgê năr 16/4, kơ rơbou kan ƀô̆, đảng viên dêh char Kon Tum hlôi hop akŏm trư̆k tuyê̆n jơ̆p teh đak pơgơ̆r pơm kiơ̆ Tơchơ̆t Hop akŏm 'măng mă 11 Ƀan châ̆p hanh Trung ương Đảng jăl 13. Pơm trong hiôk ăn đảng viên gơh băt hơdah kơtơ̆ng ang, Kon Tum chô̆ pơtoi 121 anih pơdah tivi đơ̆ng dêh char truh tơ̆ xah.

Kơchăng pơm kiơ̆ Tơchơ̆t Hop akŏm 'măng mă 11, hơdrol kơ noh, tơ̆ thĭ trơ̆n Măng Đen, apŭng Kon Plông, Anih jang Kơpal Tĭnh uy Kon Tum păng Quảng Ngãi hlôi pơgơ̆r Hop akŏm tơlĕch pơm kiơ̆ tơchơ̆t đơ̆ng Trung ương gah tơmơ̆t hơdai dêh char. Ƀar dêh char drơ̆ng nơ̆r pơjing 6 Khul jang vă tenh kuăng pơm kiơ̆ dôm sơnong jang đei tơlĕch.

Anih vei lăng kon pơlei dêh char Đắk Lắk hlôi tơlĕch ăn Trong vă jang pơgơ̆r iŏk nơ̆r tơgop đơ̆ng bơngai tăh hla hăm tơdrong jang proh hơmet, tơmơ̆t hơdai anih bơ̆jang tơ̆ dêh char, tơ̆ xăh. Kiơ̆ kơ ‘noh, tơdrong iŏk nơ̆r tơgop đei bơ̆jang kiơ̆ hăm trong ăn kơ phiê̆u truh bơngai tang măt ŭnh hnam.

Khei ‘năr pơgơ̆r iŏk nơ̆r tơgop đơ̆ng bơngai tăh hla ‘noh ‘năr 20/4. Đơ̆ng rŏng ‘noh, Anih vei lăng kon pơlei rim xăh, apŭng păng Anih jang Nội vụ Đắk Lắk bơ̆jang kiơ̆ dôm hơyak akŏm, roi tơbăt pơtôch, vei sơđơ̆ng tơdrong pơtruh ăn Jơnŭm pơgơ̆r kon pơlei rim tơring set hơlen đơ̆ng ‘năr 21 truh ‘năr 24/4. Anih vei lăng kon pơlei dêh char Đắk Lắk athei rim tơring tơlĕch jang tơpăt, ƀlep trong jang, vei sơđơ̆ng tơpăt păng ƀlep trong, kiơ̆ đơ̆ng ‘noh pơm tơdrong drơ̆ng lăp lơ̆m kon pơlei hăm tơdrong proh hơmet dôm anih bơ̆jang lơ̆m tơring.

Dêh char Đăk Nông tơlĕch 8 tơchơ̆t kăp gĭt vă pơkăp anih jang hanh chĭn tơ̆ xah kiơ̆ pơkăp vei sơđơ̆ng 'lơ̆ng, trŏ nhen tơchơ̆t. Pơkăp mă blŭng noh athei vei sơđơ̆ng tơdrong pơgơ̆r kơjăp tôm tơdrong đơ̆ng Đảng lơ̆m tôm tơdrong pơkăp jang tơ̆ dôm xah. Pơkăp mă 2 noh pơm kiơ̆ Khôi luơ̆t tơchơ̆t păng pơkăp hlôi đei kĭ. Mă 3 noh pơkăp rim anih jang tam mă trŏ hăm pơkăp gah hơgăt teh dah mă kơsô̆ măt kon pơlei kiơ̆ tơchơ̆t đơ̆ng Anih jang Kơpal kơ Kuôk hô̆i. Pơkăp mă 4 noh jô̆ truh cham char teh, anih pơm jang, tơdrong hơtŏk tơ-iung vă iŏk yua tơdrong hiôk tơ̆ tơring đơ̆ng rŏng kơ tơmơ̆t hơdai. Pơkăp mă 5 noh ưh đei tơplih hơgăt teh tơ̆ apŭng.

Pơkăp mă 6 noh tơdrong pơkăp hơgăt teh hanh chĭn tơguăt hăm tơdrong pơkăp anih jang chĭn trĭ kiơ̆ tơchơ̆t bot 'lơ̆ng, pơm jang đei jơnei tơnăp. Pơkăp mă 7 noh ưh đei jang khŏm mă đei kiơ̆ tơchơ̆t tơring kơdrơ̆m. Minh tơchơ̆t kăp gĭt nai Đăk Nông tơlĕch noh jang tơnăp tơdrong tơroi tơbăt, iŏk nơ̆r tơgop đơ̆ng kon pơlei vă đei tơdrong drơ̆ng nơ̆r lăp 'lơ̆ng lơ̆m tơpôl gah tơdrong pơkăp jang hơdai tơ̆ xah.