Khŭl Hơlen lăng, dăr lăng kơsô̆ 25 kơ Anih tơm Chĭnh trĭ, Ban Bí thư yua đơ̆ng Bơngai jang lơ̆m Anih tơm Chĭnh trĭ, Bí thư Trung ương Đảng, Kơdră Anih Hơlen lăng Trung ương Trần Sỹ Thanh pơm Kơdră khŭl ‘nao bơ̆jang hăm Khŭl chĕp kơ̆l pơgơ̆r Anih jang Đảng dêh char Khánh Hòa găh tơdrong tơlĕch jang dôm tơdrong tơchơ̆t, athei đơ̆ng Trung ương. Tơdrong tơm hơlen lăng akŏm lơ̆m tơdrong jang pơgơ̆r tơchĕng hơlen, hŏk pơhrăm, vei kơjăp păng tơlĕch jang Tơdrong tơchơ̆t Hop akŏm XIV kơ Đảng; pơjing tơdrong jang kơ dêh char; hơdai hăm dăr hơlen tơdrong jang hơmet ăn pôk rơih bơngai tang măt Quốc hội jăl XVI păng Jơnŭm pơgơ̆r kon pơlei jơ̆p tơring jăl jang 2026–2031.

Pơma tơ̆ jơ bơ̆jang, Kơdră Anih Hơlen lăng Trung ương Trần Sỹ Thanh pơma hơdăh tơdrong tơlĕch jang Tơdrong tơchơ̆t Hop akŏm Đảng bộ dêh char Khánh Hòa kăl tơklep kơjăp hăm Tơdrong tơchơ̆t Hop akŏm XIV kơ Đảng, vei sơđơ̆ng drơ̆ng 1 nơ̆r đơ̆ng trong jang truh bơ̆jang. Dêh char kăl kơchăng, pơcheh hơgei lơ̆m pơgơ̆r bơ̆jang kiơ̆, pơjing dôm tơdrong jang, trong jang đei yua vă Trung ương akŏm, lang să.

Khul bơ̆ jang dăr lăng hơlen kơsô̆ 21 kơ Hơnih tơm Chinh trĭ, Ban Bí thư kơ yuơ Kơdră jang lơ̆m Hơnih tơm Chinh trĭ, Kơdră chĕp pơgơ̆r Hơnih tơm jang tơbôl Lê Hoài Trung pơm Kơdră khul ‘nao tơbăt hơdăh tơdrong tơchơ̆t pơtôch dăr lăng, lăng hơlen sơnăm 2026 hăm Khul kơdră chĕp pơgơ̆r Đảng dêh char Gia Lai. Tơdrong dăr lăng hơlen akŏm lơ̆m tơlĕch jang kiơ̆ rim tơdrong tơchơ̆t, nơ̆r athei jang kiơ̆ đơ̆ng Trung ương, mă kăl ‘noh tơdrong jang kiơ̆ Tơdrong tơchơ̆t Hop akŏm tih ‘măng mă XIV kơ Đảng păng bơ̆ jang hơmet ăn pôk rơih kơdră tang măt Kuô̆k hô̆i jăl XVI, Jơnŭm vei lăng kon pơlei rim kâp, jăl jang 2026–2031. Iung pơma tơ̆ Hop akŏm, Kơdră chĕp pơgơ̆r Hơnih tơm jang tơbôl Lê Hoài Trung pơma hơdăh, bơ̆ jang dăr lăng hơlen vă sơđơ̆ng trong bơ̆ jang đơ̆ng Trung ương đei tơlĕch jang kiơ̆ ‘lơ̆ng, kơjăp păng ƀlep trong pơchoh ăn. Lơ̆m khei ‘năr rim kơdră chĕppơgơ̆r hơnih jang đảng tŏk bŏk akom jang kiơ̆ tơdrong jang atŏk tơ iung mŭk drăm-tơpôl păng hơmet ăn ‘măng pôk rơih, tơdrong jang sa roi kơtang, gĭt kăl hloh dơ̆ng.