Đei măt tơ̆ lêh et hơtŏk, ăn gre ki thuơ̆t kơdâu klĕch trong gre kơdâu hrĕnh Khánh Hòa – Buôn Ma Thuột lơ̆m ‘năr 19/12 âu ki, lơ kon pơlei tơ̆ tơring tơƀôh đon hơiă mưh dôm trong gre tih đei ăn gre kơdâu, pơm tơjur ƀiơ̆ jơ năr yak vih vât, pơjing tơdrong ‘lơ̆ng ăn tơdrong tĕch mơdro, jang xa, chă tơmang lăng păng pơm hơtŏk iŏk yoa. Ƀok Nguyễn Văn Hạ, tơ̆ xăh Ea Knuếc, đei hlŏh 4 sao teh đei pơdreu iŏk vă pơm trong, pơma: “’Nâu jĭ tơdrong hơpơi ‘mĕh đơ̆ng kon pơlei tơ̆ âu, tôch hơiă, dang ei đei trong gre kơdâu hrĕnh, tĕch mơdro, yak vih vât, chơ chuĕn tơmam đơ̆ng jang đei kŭm hiôk ƀiơ̆. Thoi noh tơmam jang đei kŭm roi ‘lơ̆ng, yă tĕch kŭm roi tŏk.”

Ưh lăp pơih đei trong yak hiôk hian đĕch, trong gre kơdâu hrĕnh oei pơih đei tơdrong ‘lơ̆ng ‘nao ăn dôm tơring choh jang xa tơm. Yă Ngô Thị Minh Trinh, Bí thư Đảng xăh Ea Knuếc – tơring đei trong gre kơdâu hrĕnh, hăm 6 anih trong tơƀưh, kŭm jing tơring pơtăm sầu riêng xă hlŏh kơ dêh char hăm hloh 5.100 ha, akhan: “Inh tơchĕng đơ̆ng dôm trong tơƀưh ‘nŏh gô pơih đei trong tĕch mơdro păng tơguăt trong jang mŭk drăm, tơpôl, jŏh ayŏ kơdŏ xoang. Adrol ki apŭng Krông Pách so nhôn hlôi chĕng hơmet tơring jang kơmăy Tân Tiến, tơtil ‘nŏh jĭ anih logistic vă tơguăt kơjăp, iŏk yoa pơđĭ dôm tơdrong ‘lơ̆ng đơ̆ng rim tơring, tơmât hơdai jing 1 tơring vă jang tŏk muk drăm tơpôl tơ̆ tơring.”

Tơdrong jang 3 tơ̆ trong gre kơdâu hrĕnh Khánh Hòa – Buôn Ma Thuột kơjung 48km, năm klĕch 7 xăh, tôch gĭt kăl tơ̆ trong tơƀưh Tây Nguyên hăm tơring tơter đak dơsĭ găh Pơbăh kơ Tơring Tŏk bŏk. Kŭm hăm ‘nŏh, Tơdrong jang Hồ Chí Minh jăl trong păih Hơlĕch Buôn Ma Thuột kơjung vă jê̆ 40 km oei tơgop pơm tơjur ƀiơ̆ tơdrong hrăt hrot gre kơdâu tơ̆ tơring kơdrâm, pơm hơtŏk tơdrong đei yoa đơ̆ng trong gre tơƀưh lơ tơring.

Tơ̆ găh Hơlĕch dêh char Đắk Lắk, đơ̆ng rŏng hlŏh 10 sơnăm gô chang, Tơdrong jang chă tơmang lăng pơdơ̆h ngôi ‘lơ̆ng Cù Lao Mái Nhà đei tơlech jang ƀât hơtuch sơnăm 2025. Hăm teh vă iŏk yoa păng đak xă dang 137ha, akŏm đĭ đăng jên jang vă jê̆ 5.000 ti, tơdrong jang đei hơmĕng gô pơjing jơhngâm pran ‘nao ăn tơdrong jang kơmăy kơmŏk, pơvih pơvăn, atŭm hăm ‘nŏh sek tơlang ‘lơ̆ng đon pơngơ̆t pơhuach kưkă teh chă tơmang lăng tôch ‘lơ̆ng. Ƀok Võ Văn Ngầu, kon pơlei tơ̆ xăh Ô Loan, pơma: “Hơiă dêh mưh tơdrong jang đei tơlĕch, yoa Tơdrong jang ‘nâu đei đơ̆ng sơ̆ bơih, kon pơlei tôch gô chang. Năr ‘nâu hơiă pă băt dang yơ yoa tơdrong jang đei tơlĕch ‘nŏh tơring nhôn gô jing anih ‘lơ̆ng rŏ”.

Mă tơpă ăn ƀôh, vă jang tŏk mŭk drăm đơ̆ng 10% tŏk tơ̆ kơpal kiơ̆ Tơdrong tơchơ̆t đơ̆ng dêh char, Đắk Lắk kăl đei lơ tơdrong jang tih, kĕ jang tŏk pran ‘mơ̆i. Dang ei tơring tơter đak dơsĭ hlôi đei 43 tơdrong jang đei asong hla ar jang, akŏm đĭ đăng jên jang dang 90.000 ti. Tơdrong kăl hlŏh jĭ đon vă bơ̆ jang đơ̆ng dôm anih jang kơpal păng tơring tơrang mưh yak hơdoi hăm anih tĕch mơdro, hơmet pơ ‘lơ̆ng dôm tơdrong pơmat tat oei găn trong. ‘Nâu kŭm jing tơdrong mă dôm anih tơmât jên jang oei gô chang. Ƀok Đào Mỹ, Phŏ Kơdră vei lăng kon pơlei dêh char Đắk Lắk ăn tơbăt: “Nhôn đei lơ trong jang ăn dôm tơdrong vă jang tŏk păng đei nơ̆r pơtho, pơgơ̆r jang kiơ̆ rim tơdrong đei tơlĕch ‘nŏh, nhôn vă vei lăng kơjăp kiơ̆ sơnăm vă gơ̆h yak tŏk hơdai păng năm tơ̆ hơnăp.”

Kiơ̆ trong vă jang, găh Hơlĕch kơ dêh char Đắk Lắk vă hơnơ̆ng tơlĕch dôm tơdrong jang tih, lơ̆m noh đei 3 tơdrong jang tơm tơ̆ tơring jang mŭk drăm Nam Phú Yên đei: Anih gre dơ̆ng Bãi Gốc, trong anih jang tơ̆ tơring jang kơmăy Hòa Tâm păng Tơring jang kơmăy kơmŏk ‘nao Phú Yên, hăm đĭ đăng jên jang dang 5 ti USD lơ̆m hơgăt teh xă 750ha. Dôm tơdrong jang âu đei hơmĕng vă akŏm đei teh tơter đak dơsĭ, pơjing jơhngâm pran ăn tơring jang kơmăy – ming man hơnơ̆ng vei kơjăp hơnăp jang năm hơdrol lơ̆m tơdrong jang tŏk sơnăm 2026 păng dôm sơnăm đơ̆ng rŏng dơ̆ng.