Dôm năr blŭng sơnăm ‘nao 2026, kơplăh lơ̆m jơ ‘năr chơt hơ iă ‘nă hal kơ pơyan puih mak Tây Nguyên, ƀok Trịnh Văn Bình, 69 sơnăm, Kơdră chĕp pơgơ̆r Khul Ƀô̆ đô̆i so thôn Đoàn Kết, tơring Ia Hiao, dêh char Gia Lai, hlôi chĕp mut yuih pơgar hnam vă plang teh pơih trong să. Ƀok Trịnh Văn Bình tơroi, plang teh pơm trong ‘noh jing tơdrong tơgop kăl hloh kơ ŭnh hnam atŭm hăm kon pơlei lơ̆m thôn, vă tơ iung pơjing tơring tơrang ‘nao.“Kiơ̆ trong tơlĕch jang bơ̆ jang tơring tơrang ‘nao, ba ƀôh tôch trŏ lăp hăm nơ̆r Đảng jơhngơ̆m đon kon pơlei kơna ŭnh hnam bơ̆n hlôi drơ̆ng mĭnh nơ̆r plang ăn teh ăn tơdrong jang ou. Hăm jơhngơ̆m đon ba kơ yuơ kon pơlei, kon pơlei kơ yuơ kơ ba, tơdrong vă jang pơih să trong nơnăm ou jĭ tôch rơvơn ăn kon pơlei lơ̆m thôn pơma atŭm păng ŭnh hnam ba pơma hơdrô̆. Chă yơ yak sơđơ̆ng hiôk hian, jang sa dă ƀiơ̆ tơhoach lơ kon jên, jang sa iŏk yoa kơjăp kơna tơdrong hơrih sa kơ kon pơlei gô đei atŏk ‘lơ̆ng hloh dơ̆ng”.

Tơring Ia Hiao, dêh char Gia Lai đei pơjing kiơ̆ hơgrop 3 tơring: Ia Peng, tơring Chrôh Pơnan hăm tơring Ia Hiao, apŭng Phú Thiện so. Xơkơ̆t hơdăh trong nơnăm ‘noh jing tơdrong kăl hloh vă atŏk tơ iung muk drăm lơ̆m jăl jang 2025-2030, Đảng ủy, khul kơdră chĕp pơgơ̆r tơring Ia Hiao hlôi akom pơrô̆ hơvơn kon pơlei plang ăn teh, ‘long pơtăm ou to vă pơih să trong nơnăm pơlei pơla. Ƀok Đỗ Văn Điền, 63 sơnăm, kon pơlei oei lơ̆m thôn Đoàn Kết, chơt hơ iă tơbăt, đei tơdrong vang iung jang đơ̆ng kon pơlei kơna tơdrong jang plang ăn teh pơm trong hlôi tĕnh koăng pơjing đei tơdrong vang iung jang jơ̆p jang.“ Đĭ đăng kon pơlei vang jang kiơ̆, kơna tôch hơ iă, đei đăi lơ lou jĭ gơnơm tơdrong lăng ba đơ̆ng Đảng păng Teh đak, đơ̆ng khul kơdră chĕp pơgơ̆r tơring păng rim kơdră kơpal chĕp pơgơ̆r kơna tôch hơ iă. Đĭ đăng jĭ gơnơm kon pơlei lăp đon, vang kơrŭn đĭ ai, đĭ đăng vang tơgop mŭk drăm, jơhngơ̆m jang kơna mă pơjing đei cham char ‘lơ̆ng liĕm nhen dang ei”.

Lăp lơ̆m khei ‘năr kơ đeh, đơ̆ng hơtuch sơnăm 2025 truh dang ei, tơring Ia Hiao hlôi pơm keh đang 22 jăl trong, chă pơrô hơvơn đei 207 ŭnh hnam plang ăn hloh 38.000 met vuông teh, hloh 6.200 met vuông dur pơgar atŭm hăm lơ hơnih ming man kơjăp anai, hăm akŏp kơjă kơjên hloh 4 ti 800 triu hlak jên. Mă kăl, tơdrong jang ou, kang ƀô̆, đang viên ling lang jĭ khul pơm jŭk yŭk trong hơlou lơ̆m iung jang kiơ̆ hloi. Ƀok Siu Hiếu, Kơdră chĕp pơgơ̆r Hơnih bơ̆ jang MTTQ tơring Ia Hiao, kon pơlei oei lơ̆m pơlei Sô Ma Lơng A, tơbăt, tơdrong plang ăn teh đơ̆ng ŭnh hnam ƀok ‘măng mă blŭng jei tơƀơ̆p tôch mơmat tat, kơ yuơ teh hơnăp trong kơjă măt. Mă lei, băt hlôh ƀôh hơdăh hơnăp jang kơ bơngai bơ̆ jang măt trân, kơna ƀok hlôi hơdrin đĭ ai iung jang hơdrol:“Ƀôh trong tơlĕch jang jĭ tôch trŏ lăp, kơdih jei iung jang hloi plang ăn teh pơm trong vă pơjing đei tơdrong rơvơn ăn kon pơlei. Mă ‘măng blŭng jei tơnap lơ̆m chă pơma dơnuh hăm kon hơkăn kơ yuơ teh jê̆ trong ou kơjă măt lơ̆m 1 met dang ei đei truh 200 triu hlak jên, mă lei ƀôh trong tơlĕch jang tôch trŏ lăp păng kơdih jĭ Kơdră chĕp pơgơ̆r Măt trân tơring bơ̆ jang pơrô̆ pơrôp kon pơlei kơna ba jei kăl jing bơngai pơm jŭk yŭk trong hơlou jang kiơ̆ vă pơm yă ăn rim unh hnam kon pơlei anai pơm kiơ̆. Lăp đơ̆ng rŏng pơih să trong nơnăm ‘lơ̆ng liĕm, đei thoong, hơlŏng đak ‘lơ̆ng ‘noh unh hnam tôch chhôk hơ iă”

Tơpă ăn ƀôh, vă hơtŏk kơtang gah trong nơnăm năm, jên mong tŏ sĕt kơ tơring Ia Hiao ưh kơ mah kla jên hrŭ 'mong teh iŏk ming man. Hăm tơdrong tơnap tap noh, Hơnih jang Đảng tơring hlôi tơmơ̆t tơdrong jang hơtŏk pơm trong nơnăm lơ̆m Tơchơ̆t, atŭm hăm noh rơih iŏk trong jang tơ-iung jơhngơ̆m kon pơlei, iŏk tơdrong drơ̆ng lăp đơ̆ng kon pơlei vă pơm tơdrong tơm. Bơ̆ng pang hơdah hloh noh lơ jăl trong nhen  Yên Phú 1, Yên Phú 2, Đoàn Kết, Sô Ma Lơng  đơ̆ng jăl trong să tam mă truh 3 mét, dang ei hlôi đei pơih să truh 8 mét. Lơ̆m noh, jên mong kơ Teh đak păng dôm kơsô̆ jên tơgŭm nai 'noh 90%, kon pơlei chă tơgop 10% păng tôm teh đei iŏk pơm trong. Ƀok Phạm Văn Phương, Bí thư Đảng uy, Kơdră Hơnih jang vei lăng kon pơlei tơring Ia Hiao sơkơ̆t hơdah:“Sơkơ̆t hơdah tơdrong asong jang 'noh athei mă hơdah păng iŏk yua tơnăp sơnong jang kơ khŭl kang ƀô̆ đảng viên. Tơguăt hăm asong sơnong jang 'noh nhôn hlôi rơih iŏk dôm unh hnam kang ƀô̆ đảng iung jang hơdrol. Thôn blŭng a pơm jang noh thôn Sô Ma Lơng A, đơ̆ng rŏng kơ 'noh truh dôm thôn nai, đei lơ thôn hlôi jang đei, yơ̆ng ou ki nhôn hlôi pơm đei 22 jăl trong đơ̆ng kơsô̆ jên asong jang păng jên mong apinh đei vă pơm trong vih vơ̆t ăn kon pơlei lơ̆m tơring”

Rim jăl trong 'nao ưh hơdrô̆ pơih să trong vih vơ̆t, mă oei pơih trong hơtŏk tơ-iung 'nao ăn tơring tơrang Gia Lai. Tơring Ia Hiao lơ̆m dôm năr blŭng sơnăm 'nao rơgoh 'lơ̆ng, đon lui đơ̆ng kon pơlei hăm jơnŭm pơgơ̆r tơring hơtŏk kơjăp sơđơ̆ng. Đơ̆ng tơdrong minh đon minh bơnôh đơ̆ng Đảng păng kon pơlei, pơjing đei jơhngơ̆m pran 'nao tŏk bŏk đei akŏm vă pơtoi chih kơ dôm tơdrong 'lơ̆ng hơ-iă gah tơring tơrang 'nao tơ̆ tơring groi kông Gia Lai.