Tơ̆ phường Phú Yên, 1 lơ̆m dôm tơring đak lơ̆p jrŭ, đơ̆ng rŏng kơ đak hrơ̆, Anih pơm hla ar ăn tơpôl hlôi pơgơ̆r bơ̆ jang hơlơ̆k dơ̆ng vă pơvih ăn kon pơlei. Rim năr, anih jang iŏk pơm dang hlŏh 100 blăh hô sơ, mă lơ ‘nŏh hla ar teh, hla ar oei xa. Yă Hồ Thị Bước, tơ̆ plei Lộc Đồng, ăn tơbăt ‘măng ‘mi tih đak lơ̆p âu ki đak lơ̆p truh bơbŭng hnam, đĭ đăng tơmam, hla ar unh hnam đak lơ̆p, hoch pơđĭ. Vă đei trong sek tơlang tơdrong tơgar băl teh tơ̆ anih sek tơlang, yă athei năm tơ̆ phường pơm ming dơ̆ng hla ar lôch đơ̆ng klo păng kon: “Ba gô kŭm hrĕnh ưh kơ đei đunh ôh, yoa ba ƀŏk đei kơsô̆ dang yơ ba pơm dang noh. Đe kăn ƀô̆ pơm tôch ‘lơ̆ng, pơtho ăn ba pơm hla ar tôch hơlen, đe tôch rơhăo mưh pơm ăn kơ bơ̆n.”

Vă tơjur ƀiơ̆ jơnăr gô păng tơgŭm ăn kon pơlei ƀât đei tơdrong pơmat tat đơ̆ng rŏng kơ đak lơ̆p, khul kơdră tơring krao akŏm dơ̆ng bơngai jang vang pơm hla ar vei lăng. ‘Ngoăih kơ kăn ƀô̆, bơngai jang ăn teh đak, bơngai jang tơ̆ ƀưu điên kum đei krao akŏm vă hơtŏk bơngai jang kơtă tơ̆ anih pơm hla ar.

Mŏ Huỳnh Thị Lệ Chi, bơngai jang Bưu điên phường Tuy Hòa, đei krao vang năm bơ̆jang tơgŭm tơ̆ anih pơm hla ar ăn tơpôl Phú Yên, ăn tơbăt tơdrong jang chă tơgŭm ăn kon pơlei pơm pơkĕh hla ar hăm kơmăy điên tư, mă loi ‘nŏh hăm bơngai kră, ưh gan yoa kơmăy kơmŏk: “Oh tơgŭm ăn mih ma duch nă chih tơmât hla ar, pơm hô sơ, mă lơ ‘nŏh chông ba trong năm kơpi, tơmât dôm hla ar đei ƀơm truh găh teh. Ba vang pơtho tơƀôh hai, vang tơgŭm ăn kon pơlei pơm hai.”

Kiơ̆ ƀok Nguyễn Xuân Cảnh, Kơdră vei lăng kon pơlei phường Phú Yên, đơ̆ng rŏng kơ đak lơ̆p, kơsô̆ hô sơ tŏk lơ, đei lơ bơngai hiong đĭ hla ar tơm hloi. Tơ̆ hơnăp tơdrong ‘nŏh, tơring krao dơ̆ng dôm khul pơvih pơvăn ăn tơpôl, chông ba kăn ƀô̆ năm truh tơ̆ tơring oei xa vă pơtho tơƀôh, tơgŭm ăn kon pơlei chih tơroi, pơm hơmet hla ar: “Anih pơm hla ar ăn tơpôl lai yơ kŭm ăn đơ̆ng 1-2 ‘nu kăn ƀô̆ pơtho tơƀôh luơ̆t, trong pơm hla ar. Đunh đunh kŭm ăn khul druh dăm, bưu điên vang truh tơgŭm, mưh kăl ‘nŏh đei bơngai jang hloi.”

Ưh lăp hơdrô̆ phường Phú Yên đĕch, vă rim xăh găh Hơlĕch dêh char Đắk Lắk đei đak lơ̆p ngăl. Lơ̆m noh, 3 anih pơm hla ar ăn tơpôl tơ̆ Hòa Xuân, Đông Hòa păng Tuy An Tây đak lơ̆p jrŭ, pơm ăn kơmăy kơmŏk hư, ƀơm ưh ‘lơ̆ng truh anih jang. Dôm anih âu athei hiong dang 1 giĕng dơ̆ng vă hơmet pơ ‘lơ̆ng păng bơ̆ jang thoi đêl dơ̆ng.

Tơ̆ xăh Tuy An Đông, anih pơm hla ar ăn tơpôl đei đak lơ̆p ‘năi, đei lơ tơmam, kơmăy kơmŏk hư. Mă lei, khul kơdră tơring hlôi pơgơ̆r hơmet ming, ăn bơngai jang vă huei tơhlăk mưh chă pơm hla ar ăn kon pơlei. Ƀok Trần Văn Biên, Kơdră vei lăng kon pơlei xăh Tuy An Đông ăn tơbăt: “Truh dang ei anih jang hlôi bơ̆ jang bơ̆ih, oei tơgŭm ăn kon pơlei pơm ming dôm hla ar kăl hăm unh hnam. Dang ei kơsô̆ kăn ƀô̆, bơngai jang đei tôm, mưh ƀôh tơdrong ‘mĕh vă đơ̆ng kon pơlei lơ ‘nŏh vă ăn dơ̆ng khul druh dăm, khul jang tơgŭm vang truh hai vă pơm lăp hăm tơdrong ‘mĕh vă đơ̆ng kon pơlei.”

Mĭnh khei đơ̆ng rŏng kơ đak lơ̆p, dôm tơdrong tơhlăk găh hla ar đơ̆ng kon pơlei tơ̆ tơring đak lơ̆p găh Hơlĕch kơ dêh char Đắk Lắk hlôi đei sek tơlang đang. Tơdrong kơchăng hơtŏk khul jang, hơmet ming kơmăy kơmŏk tôch tơtom hlôi tơgŭm ăn dôm tơring nhen Tuy An Đông dăh mă Phú Yên ưh đei hơdrom lê̆ lơ hla ar tam mă pơm. Dôm hla ar kăl hlôi đei pơm, ƀơk dơ̆ng tôch tơtom jing tơdrong gĭt kăl găh luơ̆t vă kon pơlei gơ̆h pơm sơđơ̆ng tơdrong arih xa, jang xa păng hơmet pơ ‘lơ̆ng dôm tơdrong tơhlăk đơ̆ng rŏng kơ 'mi kial hơbŭt.