Kơsơ̆ năr 23/1, ah 'măng pơtôch hop akŏm, đŏng chĭ Trần Thanh Mẫn – Jang lơ̆m Hơnih tơm Chinh trĭ, Ƀĭ thư Đảng uy Kuô̆k hô̆i, Kơdră Kuô̆k hô̆i hlôi tơbang tơdrong đei jơnei đơ̆ng Hop akŏm 'măng mă mônh Ƀan châ̆p hanh Trung ương, lơ̆m noh đei tơdrong asong bơngai jang iŏk jang kơchư̆k kơpal lơ̆m Hơnih juăt jang kơ Ƀan Ƀĭ thư jăl XIV.

Ƀan châ̆p hanh Trung ương jăl XIV hlôi drơ̆ng nơ̆r kơjung hloh,  200/200 Bơngai jang lơ̆m Trung ương Đảng jang dơnơm păng jang hơmŏ (hơtŏ 100%) drơ̆ng nơ̆r pôk đŏng chĭ Trần Cẩm Tú, Jang lơ̆m Hơnih tơm Chinh trĭ, Juăt jang lơ̆m Ƀan Ƀĭ thư jăl XIII, Ƀĭ thư Đảng uy hơnih jang Trung ương jang dơ̆ng kơdră Hơnih juăt jang kơ Ƀan Ƀĭ thư jăl XIV.

Kiơ̆ tơdrong tơbang đơ̆ng Ƀan châ̆p hanh Trung ương Đảng, Hơnih tơm Chinh trĭ jăl XIV hlôi pôk đŏng chĭ Trần Cẩm Tú, Jang lơ̆m Hơnih tơm Chinh trĭ jang dơ̆ng kơchư̆k kơpal lơ̆m hơnih juăt jang kơ Ƀan Ƀĭ thư.

Đŏng chĭ Trần Cẩm Tú rơneh năr 25/8/1961; pơlei pơla: dêh char Hà Tĩnh. Ƀok Jang lơ̆m Hơnih tơm Chinh trĭ: Jăl XIII, Jăl XIV; Ƀĭ thư Trung ương Đảng: Jăl XII (đơ̆ng khei 6/2018), XIII (đơ̆ng khei 4/2021), XIV; Jang lơ̆m Trung ương Đảng: Jăl X (jang hơmŏ), XI, XII, XIII, XIV; Juăt jang lơ̆m Ƀan Ƀĭ thư jăl XIII (đơ̆ng năr 25/10/2024), XIV; Jang tang măt ăn Kuô̆k hô̆i: Jăl XV.

Đŏng chĭ Trần Cẩm Tú hlôi iŏk jang lơ kơchư̆k kơpal nhen Phŏ Kơdră Hơnih jang Hơlen lăng Trung ương; Ƀĭ thư Tĭnh uy Thái Bình; Phŏ Kơdră Juăt jang kơ Hơnih jang Hơlen lăng Trung ương păng Kơdră Hơnih jang Hơlen lăng  Trung ương.