Hăm Tây Nguyên - Nam Trung bộ, đơ̆ng mĭnh tơring oei đei lơ tơdrong tơnap tap, hrei ou hlôi sơkơ̆t hơdăh hơnăp jang gĭt kăl găh muk drăm, vei lăng sơđơ̆ng teh đak-sơđơ̆ng tơring, pơjing đei trong kơnăl vă lăng truh atok tơ iung đunh đai tai sơnăm kơ “chăl atŏk tơ iung kơtang”. Ƀok Hoàng Công Khiêm, Kơ iĕng Kơdră chĕp pơgơ̆r Đảng phương Xuân Trường- Đà Lạt, dêh char Lâm Đồng tơbăt:“Kang ƀô̆, đảng viên păng kon pơlei lui akhan, hăm jơhngơ̆m pran tơgoăt tơgăl pôm nơ̆r ƀơ̆r đon, rim kon pơlei pơm hơtŏk jơhngơ̆m đon hơpơi ‘meh vă, jơhngơ̆m đon hơdrin ‘noh teh đak gô atŏk tơ iung, Kon pơlei phĭ tơtŏ dơnŏ ‘lơ̆ng dơ̆ng kơjăp, hơnŭk hơnoa.”

Nơ̆r sơkơ̆t hơdăh kơ Hla bơar tơchơ̆t kăl kơ Hop akŏm tih ‘măng mă XIV kơ Đảng ‘noh pơjing trong tŏk mŭk drăm ‘nao, iŏk khoa hŏk-kmăi kmŏk, tơplih ‘nao tơchăr păng tơplih kơsô̆ pơm jơhngơ̆m pran tơm hloh. Hăm Tây Nguyên, trong jang ou pơih đei rơvơn hơmet pơ ‘lơ̆ng trong choh jang sa kiơ̆ trong jang kmăi kmok hơgei, mŭk drăm rơgoh ‘lơ̆ng, jang dăr, pơm hơtŏk kơjă tơmam drăm. Hăm Nam Trung bộ, mă kăl rim tơring tơter đak dơsĭ, ‘nou jing hơyak vă atŏk tơ iung muk drăm đak dơsĭ rơgoh ‘lơ̆ng, ŭnh hơyuh rơgoh ‘lơ̆ng păng logistics gơh hơgei. Hla bơar tơchơ̆t kăl kơ Hop akŏm tih ‘măng mă XIV kơ Đảng kơ yuơ lơ loh ưh khan lăp chih tơlĕch dôm trong proh hơmet atŭm, mă oei pơchoh trong ăn atŏk tơ iung trŏ lăp hăm dôm tơdrong đei gơh jang kơ tơring. Đảng viên Mai Văn Tuấn kơ phương Phù Đổng, dêh char Gia Lai tơbăt:“Hla bơar tơchơ̆t kăl kơ Hop akŏm tih ‘măng mă XIV kơ Đảng sơkơ̆t hơdăh tơplih kơsô̆ ‘noh hơyak atok tơ iung, hăm nhôn oei tơ̆ tơring ‘noh hlôh vao lơ lou, pơm lơ liơ vă kon pơlei tĕch hlot tơmam drăm hăm kơjă măt păng dă ƀiơ̆ đei tơdrong răm. Tơplih kơsô̆ ưh kơ đei yă kiơ khan tơdrong tih tên ôh, đei chih tơbăt hơdăh tơring pơtăm, đei chih hơlen hơdăh trong jang sa lơ̆m kmăi kmŏk điên tư, đei mã hơlen băt hơdăh jang sa ‘noh tơmam drăm mă gơh chă tĕch mơdro tơ̆ dôm hơnih tĕch răt tih.”

Mĭnh tơdrong kăl anai lơ̆m Hla bơar tơchơ̆t kăl kơ Hop akŏm tih ‘măng mă XIV kơ Đảng ‘noh sơkơ̆t hơdăh athei iung jang mă hơdăh: nơ̆r pơma tơ-‘ngla iung jang hloi; tơmơ̆t hơnăp jang hăm iŏk đei jơnei; iŏk tơdrong lăp đon đơ̆ng kon pơlei pơm ‘long pơtŏ jang ‘lơ̆ng. Nơ̆r tơchơ̆t ou jĭ tôch gĭt kăl hăm Tây Nguyên - Nam Trung bộ, tơring tŏk bŏk tơjră muh măt hăm lơ tơdrong long nhen tơplih tŏ ‘mi kial, ưh kơ gan tơƀưh dih băl trong nơnăm, trong jang sa kơjăp ‘lơ̆ng ăn kon pơlei tơring hơtăih yăih, tơring kon kông. Đảng viên Nay Lợi, hơdrung Jarai, tơring Ia Hiao, dêh char Gia Lai tơbăt jơhngơ̆m đon:“Ĭnh tôch lăp đon ‘noh kang ƀô̆ mưh pơma ‘noh tơ-‘ngla iung jang hloi, pơma tŏ sĕt, jang lơ, păng mưh jang ‘noh lăng tơnăp tơdrong đei iŏk yoa sa hơpăh kơ kon pơlei.”

Tôch môch lơ̆m Hla bơar tơchơ̆t kăl kơ Hop akŏm tih ‘măng mă XIV kơ Đảng ‘noh sơkơ̆t hơdăh hơnăp jang tơm kơ Kon pơlei lơ̆m rim tơdrong atŏk tơ iung kơtang. Hăm Tây Nguyên – Nam Trung bộ, tơring đei lơ hơdrĕch hơdrung, tơdrong lui khop phara dih băl păng tơdrong hơrih sa, tơdrong mă ou sa roi gĭt kăl hloh dơ̆ng lơ̆m hơmet pơ ‘lơ̆ng tơgoăt tơgoăl pôm nơ̆r ƀơ̆r đon rim hơdrĕch hơdrung, vei kơjăp sơđơ̆ng chinh trĭ-tơpôl. Kră pơlei Điểu Xem, hơdrung M’Nông, tơring Kiến Đức (Lâm Đồng) tơbăt:“Mưh Đảng đĭ lăng Kon pơlei ‘noh tơm a, kon pơlei tôch lăp đon lui kơjăp. Trong bơ̆ jang đơ̆ng Đảng teh đak trŏ lăp hăm tơdrong hơrih, kang ƀô̆ mơ̆ng păng lăng tông kon pơlei ‘noh mă đơ̆ng tơnap tap tôch dang yơ, kon pơlei jei ling lang lăp đon druh kiơ̆. Tơgoăt tơgoăl pôm nơ̆r ƀơ̆r đon ‘noh jĭ ưh kơ jor pơlei pơla oei sa sơđơ̆ng, teh đak atŏk tơ iung.”

Đơ̆ng Hla bơar tơchơ̆t kăl kơ Hop akŏm tih ‘măng mă XIV kơ Đảng rŏ năng ƀôh hơdăh, “Chăl atok tơ iung kơtang” ưh khan lăp iok đơ̆ng dôm trong pơchoh ăn gĭt kăl, mă oei đơ̆ng tơdrong iung jang hloi đơ̆ng pơ đĭ khul chinh trĭ păng tơdrong vang iung jang đơ̆ng Kon pơlei. Mưh jơhngơ̆m đon tơchĕng ƀlep ‘noh mă tơlĕch jang kiơ̆ hơdăh, Tây Nguyên - Nam Trung bộ ưh kơ jor gô atŏk tơ iung kơtang, tơgop roi năr roi kơtang hloh dơ̆ng lơ̆m tơdrong atŏk tơ iung atŭm kơ teh đak.