Kơsơ̆ brei (11/2), tơ̆ Hà Nội, Khul kơdră chĕp pơgơ̆r Hơnih bơ̆ jang Trung ương MTTQ Việt Nam pơgơ̆r Hop akŏm pơdrơ̆ng dih băl ‘măng mă pêng vă drơ̆ng mĭnh nơ̆r, pơm hla bơar chih hơnăn dôm bơngai găh rim hơnih bơ̆ jang tơ̆ Trung ương đei tơƀôh ăn bơngai pơjei pơm kơdră tang măt Kuô̆k hô̆i jăl XVI kiơ̆ tơdrong tơchơ̆t kơ Khôi luơ̆t Pôk rơih kơdră tang măt Kuô̆k hô̆i păng Jơnŭm vei lăng kon pơlei sơnăm 2015 păng nơ̆r pơtho tơbăt đơ̆ng Jơnŭm vei lăng Pôk rơih teh đak. Đơ̆ng rŏng pơma dơnuh, ăn tơgop nơ̆r găh tơdrong lăp đon đơ̆ng bơngai tăh hla tơ̆ hơnih bơ̆ jang păng hơnih oei sa, 100% bơngai tang măt vang năm Hop akŏm hlôi drơ̆ng mĭnh nơ̆r pơm hla bơar chih hơnăn 217 ‘nu bơngai găh rim hơnih bơ̆ jang tơ̆ Trung ương đei tôm rơvơn ‘lơ̆ng gơh pơjei pơm kơdră tang măt Kuô̆k hô̆i jăl XVI kiơ̆ ƀlep tơdrong tơchơ̆t khôi luơ̆t. Iung pơma tơ̆ Hop akŏm pơdrơ̆ng dih băl, Kơdră chĕp pơgơ̆r Hơnih bơ̆ jang Trung ương MTTQ Việt Nam Bùi Thị Minh Hoài sơkơ̆t hơdăh, Hop akŏm pơdrơ̆ng dih băl ‘măng mă pêng hlôi jang keh đang tôm tơdrong, trong tơlĕch ăn, tơƀôh hơdăh jơhngơ̆m đon tơnăp, drơ̆ng mĭnh nơ̆r kơtang đơ̆ng rim hơnih bơ̆ jang tơ̆ Trung ương păng bơngai tăh hla tơring oei lơ̆m tơdrong tơƀôh tơbăt ăn bơngai gơh hơgei, ‘lơ̆ng, đei tôm rơvơn kiơ̆ tơdrong tơchơ̆t bơngai pơjei pơm kơdră tang măt Kuô̆k hô̆i jăl XVI. Pơtôch jơnei ou hơnơ̆ng sơkơ̆t hơdăh hơnăp jang kơ MTTQ Việt Nam lơ̆m chĕp pơgơ̆r hop akŏm pơdrơ̆ng dih băl, sơđơ̆ng tơpăt ‘lơ̆ng, ƀlep khôi luơ̆t, tơgop gĭt kăl lơ̆m tơdrong jơnei kơ ‘măng pôk rơih.