Đei hŏk pơhrăm kiơ̆ trong jang kơsô̆, tôch kơ lơ ŭnh hnam kon pơlei hoh jang sa tơ̆ Lào Kai hlôi tơƀôh tơbăt dôm ‘nhot plei ‘long pơtăm kơtă tơ̆ mir pơgar hloi. Lăp hăm mĭnh ‘măng livestream, bơngai răt yoa jơ̆p jang tơring tơrang gơ̆h chă tơmang lăng trong choh jang sa, apĭnh răt iŏk, đei ‘măng chih hơnăn năm tơmang pơhiơ̆ choh jang sa hloi. Mŏ Lù Minh Tình, tơ-‘ngla mir pơgar quýt tơ̆ tơring Mường Khương tơbăt:“Nhen nhôn hlôi tơmơ̆t lơ̆m TikTok ‘noh lơ tơmoi hlôi năm tơmang ngôi lơ̆m mir pơgar nhôn păng akhan kơjă vĕ mơ̆t lăng lơ̆m mir pơgar 30 rơbou hlak jên păng chă sa plei quýt mơ̆ng kơ vă ‘noh jĭ tôch kơ lăp, găh răt plei quýt chĕp brŏk ‘noh 20 rơbou hlak jên lơ̆m 1 kĭ. Khei blŭng lơ̆m pơyan đum ‘noh ŭnh hnam nhôn tĕch hlot vă jê̆ 3 tân plei quýt”.

Tơdrong mă ou tơƀôh hơdăh, kmăi kmŏk hơgei tŏk bŏk tơgŭm ăn kon pơlei groi kông Lào Kai yak tơjê̆ hloh dơ̆ng hăm tơdrong tĕch răt. Ưh khan lăp hơdrô̆ quýt, lơ tơmam drăm choh jang sa kăl nhen hla che, prit, lơve, phe Séng Cù… jei hlôi tơmơ̆t lơ̆m mạng tơpôl, ƀôh dih băl kơtă bơngai pơtăm hăm bơngai răt yoa. Ƀok Phạm Đức Trung, Kơ iĕng Kơdră chĕp pơgơ̆r Hơnih vei lăng kon pơlei tơring Mường Khương tơbăt:“Nhôn jei hlôi pơjing trong tơƀưh vă tơƀưh dih băl tơdrong tĕch mơdro păng pơtho tơbăt ăn kon pơlei iŏk yoa mạng tơpôl ‘lơ̆ng hơ iă. ‘Măng mă blŭng rim tơmam drăm lăp tĕch mơdro ăn kon pơlei kơtă lơ̆m Lào Kai đĕch, mă lei dang ei hlôi truh tơ̆ Hà Nội,  Hải Phòng…kon pơlei jei đei ngăl điên thoăi chĕp ti kơ na iŏk yoa mạng tơpôl kloh klĕch”.

Jang kiơ̆ tơdrong jang tơm teh đak 1719, Lào Kai hlôi tơlĕch lơ trong jang tơgŭm djru nhen pơtho tơbăt kih thuơ̆t, pơtho pơhrăm chĕp pơgơ̆r Hơp tak xah, tơgum djru ăn tŏk iŏk kon jên, pơm hla bơar pơm tơngla tơmam drăm, tơƀôh tơbăt tơmam drăm choh jang sa tơring ... truh dang ei lơ tơmam drăm tơring hlôi yak klĕch bri kông, lĕch đơ̆ng pơlei năm truh hăm rim hơnih tĕch răt lơ hloh. Ƀok Dương Tuấn Nghĩa, Kơ iĕng Kơdră chĕp pơgơ̆r Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ Lào Kai tơbăt:“Kon pơlei pơm kiơ̆ kmăi kmŏk hơgei tôch tĕnh koăng, đei tôch kơ lơ trang web, tiktok facebook hlôi iŏk yoa hơ iă. Tơdrong mă ou đei tơdrong tơgŭm djru đơ̆ng hơnih bơ̆n, đơ̆ng rim hơnih bơ̆ jang nhen Hơnih vei lăng jang Khoa hŏk păng Kmăi kmŏk, Hơnih vei lăng Joh ayŏ kơdŏ soang, Tơmang pơhiơ̆ dêh char. Nhôn jei hlôi iok yua tôch kơ lơ kmăi kmŏk hle, mă kăl tơlĕch jang kiơ̆ tơplih kơsô̆ lơ̆m kon pơlei pơla, mă kăl ‘noh hăm khul mơlôh”. 

Đơ̆ng mir pơgar truh hăm trong jang kmăi kmŏk kơsô̆ ‘noh jĭ hơyak pran kơtang hloh lơ̆m trong jang sa, mơdro sa kơ kon pơlei groi kông Lào Kai.  Mưh đei tơgum djru trŏ lăp, kon pơlei jei băt hloi iŏk yoa kmăi kmŏk, lăng truh hơnih tĕch răt tih tên hloh dơ̆ng. Tơplih kơsô̆-tŏk bok jing tơkhoă plôih ‘măng ăn atŏk tơ iung kơjăp ‘lơ̆ng kơ tơdrong choh jang sa tơring.