Atăih kơ Đà Lạt dang 40km, xăh D’ran anih đei tơring kơdrâm so D’ran ‘lơ̆ng rŏ đei ư hơnhang, ang hơnhăk oei ƀât tŏk bŏk krang Ngoạn Mục păng D’ran (adrol sơ̆ găh apŭng Đơn Dương, dêh char Lâm Đồng so), tơring âu oei đei hơnăn krao jĭ thĭ trơ̆n ƀât jơ̆ng krang. Xăh D’ran, dêh char Lâm Đồng đei pơjing kiơ̆ đơ̆ng tơmât hơdai xăh Lạc Xuân păng thĭ trơ̆n D’ran – đei teh xă hlŏh 240 km², kơsô̆ kon pơlei truh 33.000 ‘nu, lơ̆m noh hlŏh 20% jĭ kon pơlei bơngai K’ho, Chu ru, Mạ, Nùng, Thái… Đảng ƀô̆ xăh dang ei đei 51 chi ƀô̆ hăm hlŏh 600 ‘nu đảng viên, iŏk jang hơnăp jang tơm mưh chĕp kơ̆l pơgơ̆r bơ̆ jang atŏk tơiung mŭk drăm, tơpôl tơ̆ tơring.

Ƀok Trương Quang Kiên, Phŏ Kơdră vei lăng kon pơlei xăh D’ran, ăn tơbăt, kăn ƀô̆, đảng viên păng Kon pơlei tơ̆ tơring hơmĕng Hop akŏm mă XIV kơ Đảng gô đei lơ trong tơgŭm mă lăp hăm tơring kon kông: “Tơring đei hlŏh 20% jĭ bơngai kon kông. Hơpơi ‘mĕh Hop akŏm Đảng gô đei lơ trong jang, tơdrong tơgŭm lăp ‘lơ̆ng hăm kon pơlei kon kông. Đei trong tơgŭm hơdrô̆ hăm tơring kon kông tơ̆ xăh vă pơm thoi yơ ăn kon pơlei jang tŏk mŭk drăm-tơpôl vă hơtŏk iŏk yoa tơ̆ tơring kon kông”.

Sơnăm 2025, akŏm đĭ đăng jên thu mong kơ xăh D’ran, dêh char Lâm Đồng đei hlŏh 192 ti hlak jên, lơ hlŏh kơsô̆ jên dêh char pơjao. ‘Nâu jĭ tơdrong tôch gĭt kăl vă D’ran yak mât lơ̆m chăl jang tŏk ‘nao, hăm lơ tơdrong tih lơ̆m sơnăm 2026, đơ̆ng jang atŏk tơiung mŭk drăm – tơpôl, vei sơđơ̆ng teh đak, hơmet ming trong pơm hla ar vei lăng, tơplih hăm kơmăy sô̆, truh tơdrong arih xa găh tơmam drăm, jơhngâm đon kơ kon pơlei. Ƀok Mai Linh Sơn, Kơdră Anih MTTQ Việt Nam xăh D’ran, pơma hơdăh đon hơmĕng, đon lui đơ̆ng Kon pơlei hăm Hop akŏm mă XIV kơ Đảng, mă loi ‘nŏh ƀât ‘nao bơ̆ jang kiơ̆ trong Khul kơdră pơgơ̆r  tơring 2 tăl, jê̆ kon pơlei, năng kăl kon pơlei păng bơ̆ jang yoa kon pơlei:

“Inh lui, tôch hơmĕng kơ Hop akŏm mă 14 kơ Đảng. Inh kŭm nhen kon pơlei tôch hơmĕng hăm tơdrong arih xa ning mônh kơnh. Hăm trong jang hrei ‘nâu, bơ̆n oei bơ̆ jang kiơ̆ trong Khul kơdră pơgơ̆r tơring 2 tăl ‘nŏh jĭ jê̆ kon pơlei, năng kăl kon pơlei păng pơm lăp hăm tơdrong ‘mĕh vă đơ̆ng kon pơlei. Gô tơdrong tơchơ̆t đơ̆ng Hop akŏm mă 14 kơ Đảng đei jang kiơ̆ kơnh sư pơm hơtŏk tơdrong arih xa kon pơlei păng jang tŏk mŭk drăm, tơpôl tơ̆ tơring, lơ̆m teh đak roi pran ‘lơ̆ng. Hơtŏk hơnăp jang đơ̆ng kăn ƀô̆, bơngai jang kơ teh đak, athei jang mă tơnăp mưh bơ̆ jang tơdrong jang đei Đảng, Teh đak pơjao”.

Lâm Đồng dang ei jĭ dêh char đei teh xă hlŏh lơ̆m teh đak Việt Nam hăm hlŏh 24.200 km², kơsô̆ kon pơlei đei hlŏh 3,8 triu ‘nu. Đảng ƀô̆ dêh char Lâm Đồng dang ei đei hlŏh 124.000 ‘nu đảng viên oei bơ̆ jang hŏk hôp tơ̆ 128 anih jang đảng tơ̆ tơring. Hăm đon lui kiơ̆ tơdrong chĕp kơ̆l pơgơ̆r đơ̆ng Đảng, kăn ƀô̆, đảng viên păng Kon pơlei dêh char Lâm Đồng hơmĕng păng lui Hop akŏm mă XIV kơ Đảng pơih đei lơ trong jang, tơdrong tơchơ̆t tih gĭt kăl vă hơnhăk teh đak păng dôm tơring yak mât lơ̆m chăl jang tŏk ‘nao./.