Năr 24/9, Dơnŏ anih Đảng dêh char Gia Lai pơgơ̆r Hop akŏm ƀar păh Khul kơdră chĕp pơgơ̆r Đảng dêh char hăm khul kơdră chĕp pơgơ̆r Đảng 135 tơring, phương vă lăng hơlen pơtôch bơ̆ jang kơ trong bơ̆ jang khul kơdră chĕp pơgơ̆r tơring 2 kâp đơ̆ng rŏng vă jê̆ 3 khei tơlĕch jang. Kiơ̆ hla bơar chih tơbăt bơ̆ jang tơroi tơbăt tơ̆ hop akŏm, rim hơnih bơ̆ jang Đảng, Khul kơdră chĕp pơgơ̆r, MTTQ păng rim hơnih jang tơring iung bơ̆ jang ‘lơ̆ng, jơnei. Hơnih bơ̆ jang pơvih pơvăn ăn pơm hla bơar tơring iung jang ‘lơ̆ng ăn kon pơlei păng hơnih mơdro sa. Lơ̆m dêh char hlôi sơng iok đei vă jê̆ 300.000 hô sơ, lơ̆m ou đei hloh 90% bơ̆ jang keh đang ‘lơ̆ng păng keh đang hloh jơ ‘năr pơkă. Tơ̆ hop akŏm, lơ nơ̆r tơgop athei dêh char lăng ba kơtang tơgŭm ăn kon jên ming man hơnih bơ̆ jang ‘nao tơring, phương đơ̆ng rŏng hơgrop; tơgŭm djru kmăi kmŏk, tơmơ̆t dơ̆ng ƀiên chê̆ tơ̆ dôm hơnih bơ̆ jang oei ưh kơ măh bơngai jang. Rim tơring jei apĭnh athei tơmơ̆t jên jang ming man trong nơnăm, pơnơ̆t đak, hnam trương hŏk, hnam pơgang, hnam hop akŏm pơlei. Kiơ̆ đơ̆ng Bí thư Đảng dêh char Gia Lai Hồ Quốc Dũng, rim tơring, phương kăl hơnơ̆ng hơmet pơ ‘lơ̆ng khul jang, tơmơ̆t dơ̆ng kang ƀô̆, tơ iung pơjing trong iung jang hơdăh, kơtang jang kiơ̆ rim trong tơlĕch jang atok tơ iung, tơklep hăm bơ̆ jang tơjur dơnuh, sơđơ̆ng hơrih sa tơpôl. Ƀok Hồ Quốc Dũng pơma hơdăh, vă atŏk kơtang hloh dơ̆ng bơ̆ jang ‘lơ̆ng, hơnơ̆ng atŏk kơtang, pơjao jang, pơjao gơ̆h jang ăn rim tơring.