Kơtă ƀơ̆t kon pơlei yak mơ̆t lơ̆m Hơnih pơvih pơvăn pơm hla ar teh đak phường Hội Phú, dêh char Gia Lai, rô-bốt AI hlôi kơchăng kơkuh apĭnh jet, lăng băt ‘meh vă păng pơtho pơm bơ̆n hla ar. ‘Nâu jĭ nơ̆r rôbốt pơtho 2 ‘nu buăl mơlôh năm pơm hla ar iŏk ŭnh om:

“Vă pơm hla ar iŏk ŭnh om, buăl kăl kơ hơmet ăn hal ar chih tơroi iŏk ŭnh om kiơ̆ hla ar iŏk tơ̆ hơnih pơm, kăn kươk kon pơlei oei gơh yua vă tơbăt hơdăh kơdih kâu, hla ar hơlen lăng hơnih oei sa đơ̆ng klo, hơ kăn, athei drŏ nglo đơ̆ng tôm 20 sơnăm, drŏ kăn đơ̆ng tôm 18 sơnăm”.

Hăm tơdrong chă lăng hơlen păng tơl dôm nơ̆r apĭnh ƀơm truh hla ar iŏk ŭnh om, hla ar teh, ming man, oei sa..., rô-bốt AI tơgŭm kon pơlei băt hơdăh tơdrong pơm hla ar, trong bơ̆jang kŭm nhen hơnih sơng iŏk hla ar mĭnh trong tơtĕnh, ƀônh hiôk. Ƀok Nguyễn Mạnh Thi năm pơm hla ar iŏk yua teh tơbăt, lăng băt ‘nao plơ̆ng âu pơm ăn kơ sư ưh kơ ê:

“Pơtho ĭnh tôch kơ ‘lơ̆ng, truh tơ̆ hơnih apĭnh bơ̆n, pơtih gia nhen ‘meh vă truh tơ̆ hơnih hơyơ pơm hla ar kiơ ‘noh  robot gô ba bơ̆n truh ƀlep hơnih ‘noh. Bơngai kră ‘noh ƀơ̆t lăp ưh kơ băt kơtĭt kơsô̆ ‘noh bơ̆n ‘meh truh tơ̆ hơnih pơdreo hla ar dăh mă păih teh ming man ‘noh bơ̆n tơroi păng rô bốt pơtho bơ̆n truh tơ̆ hơnih ‘noh”.

Kiơ̆ kơ ƀok Trần Công Danh, kang ƀô̆ jang lơ̆m Hơnih pơvih pơvăn pơm hla ar kơ teh đak phường Hội Phú, rô-bốt AI hơgei đei Anih vei lăng kon pơlei phường tơmơ̆t jên jang păng ăn tơmơ̆t yua đơ̆ng khei 8/2025. Vă bơ̆jang đei yua, rô-bốt đei tăh tôm hla ar chih răk ƀơm truh dôm hla ar bơ̆jang, hla ar hô sơ, trong bơ̆jang păng hơnơ̆ng đei pơhrăm vă hơtŏk ‘lơ̆ng tơdrong hơdai hăm kon pơlei.

“Kon rô bốt AI âu đei tăh tơmơ̆t hla ar chih răk ƀơm truh dôm hla ar bơ̆jang ăn kon pơlei hiôk, ƀônh lơ̆m tơdrong pơih lăng. Tơdrong mă blŭng ‘noh nhôn ăn dôm hla ar chih răk hla ar bơ̆jang, dôm hla ar kăl păng trong pơm dôm hla ar, trong iŏk kơsô̆, pơtho kon pơlei truh tơ̆ dôm hơnih vă pơm bơ̆n hla ar ‘noh bơ̆n kăl ăn dôm tơdrong roi tơbăt hla ar kăl ƀơm truh vă rô bốt iŏk păng hlôh, kŭm nhen hơnơ̆ng pơhrăm vă rô bốt gơh băt tôm”.

Kiơ̆ chih jô̆, jô̆ păh lăp 1 năr rô-bốt AI tơ̆ phường Hội Phú tơgŭm, pơtho tơƀôh ăn kơ hloh 100 ‘nu kon pơlei năm pơm hla ar.

Gơnang đơ̆ng tơdrong tơgŭm đơ̆ng rô-bốt AI, kơsô̆ pơm hơmet ‘lơ̆ng hla ar păng pơdreo hla ar ƀlep khei ‘năr pơkăp tơ̆ Hơnih pơm hla ar kơ teh đak phường Hội Phú lơ khei tơtil iŏk đei hloh 95%. Ƀok Hoàng Minh Nghĩa, Phŏ Kơdră Anih vei lăng kon pơlei phường Hội Phú, pơma hơdăh tơdrong iŏk yua kơmăy AI hlôi hơnhăk ăn iŏk yua rơđăh lơ̆m hơmet ming bơ̆jang tơ̆ tơring, pơih ăn trong gơh băt ‘nao, ƀônh hiôk hloh lơ̆m pơyua ăn kon pơlei, anih mơdro sa.

“Kơmăy hlôi pơtho ‘noh trŏ ƀlep lơ, hla ar chih răk hlôi đei kơmăy kơsô̆ mĭnh trong trŏ ƀlep ‘noh kon pơlei tôch kơ lăp. Dôm bơngai jang gô đei lơ jơnăr akŏm lơ̆m tơdrong joăt jang tơplih yua kơ tơroi tơblang. Tơdăh athei tơroi tơblang ‘noh gô hoach jơ bơ̆jang, dang ei kơmăy rô bốt tơgŭm ‘noh bơngai joăt jang akŏm lơ̆m tơdrong jang ‘noh kơsô̆ tơdrong jang hơmet pơ ‘lơ̆ng lơ hloh, hơmet pơ ‘lơ̆ng hrĕnh păng dă ƀiơ̆ kơ lê̆ oei đei”.