Kiơ̆ kơ noh, hăm pơkăp “truh rim tơring, pring rim hnam, pơtho rim bơngai”, đoan viên, hơdruh tơdăm đei sơkơ̆t jĭ khul jang dơnơm, tơgŭm kon pơlei iŏk yua tơnăp kơmăi kơsô̆ kăp gĭt nhen tơdrong jang kŏng trư̆k tuyê̆n, chih măt điê̆n tưh VNeID, kla jên ưh đei yua jên măt păng vei sơđơ̆ng tơdrong jang mạng. Gia Lai tơlĕch tơchơ̆t truh sơnăm 2030, 100% xah, phương pơjing păng pơtoi Khul jang kơmăi kơsô̆ 'nao lơ̆m tơpôl kon pơlei; asong hơnih jang tơgŭm tơ̆ hnam hơkŏm joh ayŏ dah mă tơ̆ Hơnih jang vei lăng kon pơlei xah vă tơgŭm ăn kon pơlei gơh yua kơmăi kơsô̆ pơkăp chih măt điê̆n tưh kơnao 2.

Tơdrong jang adoi pơtơm tơ̆ “xah dơnơm gah khua hŏk kơmăi kơmŏk 'nao, tơplih 'nao gơh hơgei păng tơplih kơmăi kơsô̆”, kơchĕng vă rơih 30 xah, phương lơ̆m sơnăm 2026 vă pơm hơdrol, đơ̆ng noh pơih să lơ̆m jơ̆p dêh char.