Gia Lai oei tŏk bŏk lơ̆m pơyan phang, lơ tơring oei tôch hơmơt đei unh xa bri.  Dang ei, kơhrĕng rơbâu ha bri tơ̆ rim apŭng lơ̆m dêh char Gia Lai oei tơjră hăm tơdrong krê kơ unh xa tôch dêh ƀât tŏk bŏk pơyan phang âu. Lơ̆m noh, apŭng Chư Păh đei 7.169 ha, akŏm tơ̆ dôm xăh Hòa Phú, Nghĩa Hưng, Chư Đang Ya, Đăk Tơ Ver, Ia Khươl păng thĭ trơ̆n Phú Hòa đei lơ̆m tơring tôch hơmơt kơ unh xa.

Mă loi, bri ‘long hơ ngo 3 hlak hla, đei hla ‘long kro hơlŭng hơƀơ̆l tôch ƀônh đei unh xa. Vă găn ƀiơ̆ tơdrong krê kơ unh xa bri, đơ̆ng blŭng pơyan phang, dôm tơring tơ̆ dêh char Gia Lai hơmet kơjăp Khul jang tang găn unh xa bri, pơjing trong tơjră tôch rơđăh. Khul jang kơpal hơtŏk tơdrong tơroi tơbăt, pơtho tơƀôh ăn kon pơlei yoa unh mă lơ ‘lơ̆ng lơ̆m khei tŏ phang pơđang. Dôm anih vei lăng bri jang hơdoi hăm khul kơdră tơring păng Anih vei lăng bri pơgơ̆r jur roi tơbăt tơ̆ dôm pơlei pơla; tơtă ăn kon pơlei đei mir roh jê̆ bri lê̆ soh mir kư̆ kă, hơdai hăm ‘noh hơtâp kơƀang roi tơbăt krê kơ unh xa bri tơ̆ dôm anih kăl.