Mă đơ̆ng đĭ akŏm jơhngâm soh hơmet hla ‘long, ‘ngiĕt kro, hơmet ‘lơ̆ng trong tang găn unh xa bri đơ̆ng blŭng pơyan phang bơih ră, mă lei yoa athei gô tơdrong chă rơih anih jang găh bri ‘long đơ̆ng Công ty jang ‘long Tam Hiệp Di Linh, dêh char Lâm Đồng kơna dang ei oei đei 70 ha bri tam mă đei sŏh hơmet ‘ngiĕt, tơmam ƀônh đei unh xa.

Kiơ̆ ƀok Trần Tuấn Anh, vă vei lăng ‘lơ̆ng bri ‘long huei kơ kơ unh xa, dôm khul jang kơpal đei pơjao gak prăt măng prăt năr vă vei lăng, tang găn unh xa bri: “Khul jang kơpal đei hloi khul bơngai juăt vei lăng bri đơ̆ng công ty păng khul iŏk vei lăng bri ‘nŏh jĭ dôm unh hnam kon pơlei kon kông tơ̆ tơring. Hăm hla ar pơkăp pơjao jang nhôn bơ̆ jang kiơ̆ trong 3 hơdai ‘nŏh jĭ sŏng xa hơdai, oei hơdai păng bơ̆ jang hơdai păng dôm unh hnam đei pơjao pơm hnam gak tơ̆ dôm tơring gĭt kăl vă hơtŏk tơdrong dăr joang vei bri, chă ƀôh păng tang găn tơtom tơdăh đei unh xa bri, kŭm nhen dôm tơdrong pơm glăi, tơgar iŏk teh bri tơ̆ tơring”.

‘Năr tŏ hang tơ̆ Lâm Đồng oei tôch dêh, tôch hơmơt unh xa bri, mă loi tơ̆ dôm tơring tam mă đei sŏh hơmet ‘ngiet kro adrol. Ƀok Nguyễn Hữu Hà, Phŏ Kơdră chĕp kơ̆l Công ty jang ‘long Đơn Dương, dêh char Lâm Đồng anih đei lơ bri ‘long oei tôch hơmơt unh xa, jê̆ tơring kon pơlei oei xa dơ̆ng kơna tơdrong tang găn unh xa bri hơnơ̆ng đei khul jang kơpal yôch năng kăl: “Công ty hlôi pơm lơ anih gak pơgia vă hiôk hian ăn tơdrong vei lăng. Ăn bơngai trư̆k prăt măng prăt năr, hơtok đon kơchăng, hơmet tơmam tang găn unh xa tơ̆ dôm anih jang. Tơdăh dôm anih gak ƀôh unh xa bri ‘nŏh jăh tơroi hloi ăn anih jang vă ăn khul jang năm truh, pĭt unh hloi”.

Vă pơm ‘lơ̆ng ăn tơdrong jang tang găn unh xa bri, ‘nao âu, Anih vei lăng kon pơlei dêh char Lâm Đồng tơchơ̆t tơlĕch hơdrol jên tang găn, pĭt unh xa bri lơ̆m pơyan phang sơnăm 2025 hăm kơsô̆ jên vă jê̆ 12 ti. Kiơ̆ ƀok Lê Đình Việt, Phŏ Kơdră Anih vei lăng bri ‘long dêh char Lâm Đồng, gơnơm kơsô̆ jên âu, dôm anih jang păng tơ ‘ngla bri gơ̆h hơmet tôm tơmam kăl, tơlĕch đei trong tang găn unh xa bri ‘lơ̆ng ƀiơ̆. Dang ei, tơdrong tang găn unh xa bri tŏk bŏk đei dêh char Lâm Đồng tơlĕch jang tôch ai.

Hlơ hlĕng ‘năr tŏ hang ƀât tŏk bok pơyan phang, lơ bơngai jang đơ̆ng Anih vei lăng bri tang găn sar bar Ialy (apŭng Chư Păh, Gia Lai) hŭl hang hơ ‘mrih hơmrăh oei chong hơmet ‘ngiĕt pơm trong găn unh xa mơ mrok tơ̆ bri 239. Tơ̆ dôm anih jê̆ mir roh, mă loi hăm bri 'long oei iơ iĕ, hơnơ̆ng đei khul jang 'long vei lăng, hơlen năng kon pơlei mât lĕch tơ̆ bri, hơtâp kơƀang roi tơbăt tang găn unh xa bri.

Ƀok Lê Công Huấn, Phŏ Kơdră Anih vei lăng bri 'long tang găn sar bar Ialy ăn tơbăt: “Khul jang vei lăng bri akŏm tôm bơngai jang. Teh mir roh kon pơlei jê̆ bri ‘nŏh nhôn tơtă ăn kon pơlei mưh sŏh mir athei roi tơbăt ăn khul vei lăng bri. Khul vei bri tơlĕch trong jang hơdoi hăm kon pơlei. Yoa kơplăh âu tôch hơmơt. ‘Ngoăih kơ ‘nŏh, khul oei pơm hla ar pơjao ăn tơpôl kon pơlei vei lăng bri vă hơtŏk tơdrong gak vei lăng, dăr joang, sek tơlang dôm tơdrong ƀơm truh tơ̆ bri ‘long”.

Dang ei, kơhrĕng rơbâu ha bri tơ̆ dôm apŭng lơ̆m dêh char Gia Lai oei tơjră hăm tơdrong krê unh xa tôch dêh. Lơ̆m noh, apŭng Chư Păh đei hlŏh 7.169 ha, akŏm tơ̆ dôm xăh Hòa Phú, Nghĩa Hưng, Chư Đang Ya, Đăk Tơ Ver, Ia Khươl păng thĭ trơ̆n Phú Hòa găh tơring tôch hơmơt đei unh xa bri. Mă loi 'nŏh jĭ bri ‘long hơnglo 3 hlak hla, yoa hla 'long kro hơlŭng hơƀơ̆l, ƀônh đei unh xa hlŏh.

Vă pơm tơjur ƀiơ̆ tơdrong krê kơ unh xa, đơ̆ng blŭng pơyan phang, dôm tơring hơmet pơ ‘lơ̆ng Khul pơgơ̆r tang găn unh xa bri, tơlĕch lơ trong tơjră. Khul jang kơpal hơtŏk tơdrong tơroi tơbăt, pơtho tơƀôh ăn kon pơlei yoa unh mă 'lơ̆ng, vei lăng 'lơ̆ng unh lơ̆m dôm khei pơhang pơđang. Dôm anih vei lăng bri jang hơdoi hăm khul kơdră tơring păng khul vei bri pơgơ̆r năm roi tơbăt tơ̆ pơlei pơla; tơtă ăn kon pơlei đei mir roh jê̆ bri lê̆ sŏh mir kư̆ kă, hơdai hăm 'noh hơtâp kơƀang roi tơbăt krê kơ unh xa tơ̆ lơ bri kăl. 

Ƀok Nguyễn Ngọc Ny, Phŏ Kơdră Anih vei lăng bri 'long apŭng Chư Păh, ăn tơbăt, kiơ̆ đơ̆ng hơlen năng, lơ̆m apŭng đei 18 ƀôt bri tôch hơmơt unh xa, hăm hlŏh 14.000 ha bri. Dôm tơring âu jê̆ tơring kon pơlei oei xa, đei mir roh tơter bri kơ na tôch hơmrơ đei unh xa bri: “Tơdrong tơm đa đei unh xa bri ‘nŏh yoa đe iŏk yoa unh ưh kơ ‘lơ̆ng. Krê hlŏh ‘nŏh hăm bri ‘long ‘nao pơtăm, tam mă jing bri, hla, ‘ngiĕt kro lơ, tôch hơmơt. Tơdrong vei lăng, tang găn unh xa bri athei kơchăng tơlĕch jang mă ‘lơ̆ng vă găn tôch ai unh xa bri, athei năng tơdrong ‘nâu kăl hlŏh. Trong jang tơm ‘nŏh jĭ tang găn kăl hloh, mưh đei unh xa athei akŏm jơhngâm pĭt pơđĭ hloi”.

Hăm tơdrong kơchăng đơ̆ng dôm khul jang vei lăng bri, tơdrong tang găn unh xa bri tơ̆ dôm dêh char Tây Nguyên tŏk bŏk đei bơ̆ jang tôch kơjăp vă vei lăng ‘lơ̆ng bri ‘long, găn tôch ai hiong răm đơ̆ng unh xa bri tơdăh đei.