Tơdrong akŏm hơvơn đei kơ hrĕng anih jang mŭk drăm, hơp tak xah lơ̆m dêh char păng khul jang mŭk drăm truh đơ̆ng Quảng Tây (Trung Quốc). Tơ̆ hop akŏm, tang măt ăn dôm anih jang mŭk drăm Việt Nam păng Trung Quốc hlôi pơma đam gah trong jang hơtŏk păng vei sơđơ̆ng, kơjăp tơdrong tĕch tơmam drăm ăn teh đak đe lơ̆m khei năr truh. Lơ̆m noh, rim anih jang mŭk drăm Việt Nam hơpơi 'meh đei iŏk tơgŭm tơtom dôm tơchơ̆t gah kih thuơ̆t, tơchơ̆t 'nao gah rơgoh 'lơ̆ng tơmam drăm xa đơ̆ng Trung Quốc. Atŭm hăm noh đei kênh tơroi tơbăt hơnơ̆ng vă tơtom hơmet pơm jang.

Gah Trung Quốc, lơ anih jang mŭk drăm akhan, Gia Lai athei tơrĕk hloh dơ̆ng gah sơđơ̆ng tơmam drăm tĕch, tơdrong 'lơ̆ng păng tơdrong pơm tơlĕch 'lơ̆ng sơđơ̆ng vă hơtŏk kơjă kăp gĭt. Tơ̆ hop akŏm, rim pah drơ̆ng nơ̆r gah pơjing kênh tơroh kơtă, vă tơjur ƀiơ̆ tơdrong pơm kơdranh đơ̆ng anih jang ou to, atŭm hăm noh hơtŏk jang hơdoi gah logistics. Lơ̆m hop akŏm, hlôi đei 7 hla bar pơkăp jang hơdoi đei kĭ pơm jang đơ̆ng anih jang mŭk drăm Gia Lai păng anih jang mŭk drăm Trung Quốc.