Jô̆ truh năr blŭng khei 6/2026, Tơdrong vă jang Hnam trương teh đak rong ‘me Jăl mĭnh păng Jăl ƀar tơ̆ 7 tơring sơlam teh đak păh Pơmơ̆t kơ dêh char Gia Lai hlôi keh đang dang 50% tơdrong ming man. Mă lei, pơđĭ 7 hnam trương dang ei oei iung jang hiơ hiơ̆ đơ̆ng 15 truh 52 năr pơtêng hăm trong tơlĕch jang.

Hơnih chĕp pơgơ̆r rim tơdrong vă jang tơmơ̆t jên jang tơ iung pơjing dêh char Gia Lai athei, đơ̆ng dang ei truh đĭ năr 30/8, rim hơnih vang iung jang lơ̆m jơ ‘năr jang kơtang, akŏm đĭ đăng khul jang, dăr lăng tơdrong jang keh đang dang yơ, tơmơ̆t dơ̆ng khul jang, kmăi kmŏk păng pơgơ̆r iung jang hơnơ̆ng vă sơđơ̆ng keh đang đĭ đăng rim tơdrong jang ming man. Rim hơnih pơchoh trong, dăr lăng kăl hơnơ̆ng dăr lăng hơnih ming man, dăr lăng kơjăp tơdrong ming man kơjăp, sơđơ̆ng ăn bơngai jang, ưh kơ lê̆ đei tơdrong ming man ưh kơjăp ‘lơ̆ng. Ƀok Phạm Xuân Điệp, Kơdră chĕp pơgơ̆r Hơnih chĕp pơgơ̆r rim tơdrong vă jang tơmơ̆t jên jang tơ iung pơjing dêh char Gia Lai tơbăt:" Đei 2 tơdrong kăl hloh ‘noh xek tơlang dôm tơdrong tơnap tap tơhlăk tơhlĭn kơ bơngai iŏk ming man tơ̆ hơnih ming man, ăn bơngai iŏk jang tơlĕch jang ‘lơ̆ng hơ iă. Mă ƀar ‘noh hơnih gô iung jang hơdoi hăm rim tơring, hơnih jang păng rim hơnih tơmơ̆t jên jang vă hơvơn khul jang tơgŭm djru vă tơmơ̆t đei lơ bơngai jang ăn bơngai iŏk jang ming man”.

Tơ̆ pơm lêh iung jang, tơngla tơmơ̆t jên jang, hơnih jang pơchoh trong dăr lăng păng rim bơngai iŏk jang hlôi kĭ pơkăp sơđơ̆ng jơ ‘năr jang, ming man ‘lơ̆ng păng sơđơ̆ng ming man, hơdrin jang keh đang kiơ̆ ƀlep nơ̆r pơrô̆ jang đơ̆ng Hơnih tơm Chinh trĭ, Khul kơdră chĕp pơgơ̆r Teh đak păng Hơnih vei lăng kon pơlei dêh char Gia Lai. Ƀok Trần Bảo, Kơ iĕng Kơdră Kŏng ty Tơmơ̆t jên jang Ming man Dacinco, hơnih iŏk ming man Hnam trương teh đak rong ‘me Jăl mĭnh păng Jăl ƀar Ia Dom tơlĕch trong jang kơ hơnih:“ Kơ ‘năr dang ei, năr ayơ jei ‘mi đơ̆ng 2 truh 3 ‘măng. Nhôn tơlĕch hloi trong iung jang ‘noh đei 5 truh 6 trong jang kiơ̆. Mă blŭng ‘noh akŏm lơ bơngai jang, dang ei mĭnh hnam trương, nhôn đei 320 ‘nu nhân công. Mă ƀar ‘noh sơđơ̆ng iung jang hơnơ̆ng, 2 truh 3 khul tơplih dih băl jang lơ̆m mĭnh măng. Kơ ‘năr ‘mi ‘noh nhôn ăn iung jang lơ̆m jơ ‘năr ưh kơ ‘mi. Adoi ăn kih sư iung jang dăr lăng kơjăp vă sơđơ̆ng ming man kơjăp ‘lơ̆ng”.

Tơdrong vă jang Hnam trương teh đak rong ‘me Jăl mĭnh păng Jăl ƀar tơ̆ dêh char Gia Lai đei kon jên tơmơ̆t jang hloh 1.516 ti hlak jên, đei tơlĕch jang tơ̆ 7 tơring sơlam teh đak ‘noh đei Ia Mơ, Ia Púch, Ia Pnôn, Ia Nan, Ia Dom, Ia Chía păng Ia O. Mưh keh đang, rim hnam trương ou gô pơvih pơvăn ăn hloh 7.000 ‘nu hŏk tro hŏk pơhrăm ‘noh đei lăm hŏk, hnam tep, hnam sŏng sa, hơnih oei sa ăn ƀok thây kô pơtho păng rim hơnih pơvih pơvăn anai. Tơdrong vă jang ou jĭ tôch gĭt kăl lơ̆m pơm hơtŏk pơtho pơhrăm ‘lơ̆ng hơ iă ăn tơring sơlam teh đak kơ dêh char Gia Lai.