Ƀlep ƀơ̆t tơbăt 78 sơnăm Năr Kơdră Hồ Chí Minh tơlĕch nơ̆r krao hơvơn pơjei băl ‘mêm kơ teh đak (11/6), pơgê 10/6 tơ̆ Anih jang kơ ƀok Kơdră teh đak, Tổng Bí thư, Kơdră teh đak Tô Lâm tơƀơ̆p muh măt 100 ‘nu bơngai tang măt kơ tơdrong jang “Tơdrong ‘lơ̆ng tơpăt” yua đơ̆ng Radiô nơ̆r pơma Việt Nam bơ̆jang. Dôm bơngai tang măt truh đơ̆ng lơ tơring, sơnăm pha ra băl, tơdrong jang păng tơdrong hơrih pha ra băl, mă lei tă kơ đei atŭm jơhngơ̆m đon hơrih ‘mêm mơnat, vang pơdŏng, ling lang tơgŭm tơpôl.

Tang măt kơdră chĕp kơ̆l Đảng, Teh đak, Tổng Bí thư, Kơdră teh đak Tô Lâm pư ư kơ dôm tơdrong jang ‘lơ̆ng hơiă, pơma hơdăh ‘nâu jĭ dôm kơjă kăp gĭt ‘mêm mơnat gĭt kăl tơgop păr ang tơdrong joăt joe ‘mêm băl đơ̆ng hơdrĕch hơdrŭng. Hơdai hăm athei rim anih tơm, anih jang, tơring hơnơ̆ng tơplih ‘nao tơdrong jang pơjei băl ‘mêm kơ teh đak kiơ̆ trong hơdăh ‘lơ̆ng, đei yua, tơklep hơnăp jang hơtŏk tơiung teh đak păng pơvih ăn kon pơlei; hơtŏk ‘lơ̆ng tơdrong pơvih pơvăn, vei lăng tơdrong hơrih sa kon pơlei păng tơtom hơmet pơ ‘lơ̆ng dôm tơdrong mơmat tat, tơhlăk tơhlĭn tơ̆ tơring.