Tơ̆ hop akŏm tơlĕch trong tơmât jên jang sơnăm 2026, dêh char Gia Lai pơjao kĭ pơkăp hla ar asong tơmât jên jang ăn 273 tơdrong jang, hăm jên đei kĭ pơkăp vă tơmât jang tŏk truh 850.000 ti (hơtŏ hăm hlŏh 33 ti USD). Lơ̆m noh, 144 tơdrong jang đei jên jang hlŏh 230.000 ti păng 129 tơdrong jang đei kĭ pơkăp vă tơmât hlŏh 620.000 ti hlak jên. Lơ Grŭp jang tih đei lơ tơdrong jang hăm jên jang truh rơbâu ti hlak jên nhen: VinEnergo (unh hơyuh rơgoh – đei jên jang truh 210.000 ti), Grŭp jang FLC (chă tơmang lăng, logistics - 150.000 ti), Phú Tài (tơmam ‘nao, hnam teh - 26.500 ti), păng Sun Group (chă tơmang lăng pơdơ̆h ngôi – đei jên jang truh 20.000 ti)…

Dơ̆ng tang ăn dôm anih jang oei tơlĕch lơ tơdrong jang tih tơ̆ dêh char, ƀok Trần Bá Dương, Kơdră chĕp kơ̆l Khul vei lăng, Kơdră pơgơ̆r Grŭp jang Thaco, đei nơ̆r pơma tơ̆ hop akŏm: “Tơ̆ Gia Lai, lơ̆m 7 sơnăm âu ki, tơdrong jang găh luơ̆t tơhlăk tăk, mă lei đơ̆ng rŏng kơ tơmât hơdai, dêh char Gia Lai tơdrong jang luơ̆t đei hơmet pơ ‘lơ̆ng păng jang roi ƀônh hiôk. Lơ tơdrong jang hơnơ̆ng đei tơlĕch jang, tôch gĭt kăl ‘nŏh jĭ tơdrong vang yak hơdoi tôch hơiă đơ̆ng khul kơdră tơring tơ̆ Gia Lai nhen khei ‘năr  âu ki nhôn pơkăp vă bơ̆ jang hrĕnh păng đei yoa dôm tơdrong vă jang, vang tơgop pơjing 1 tơdrong choh jang xa kơjăp ‘lơ̆ng ăn dêh char Gia Lai”.

Dôm kơsô̆ tôch hơiă tơ̆ hop akŏm pơih trong tưk tơiung jơhngâm prân vă Gia Lai jang tŏk, jang đei tơdrong jang tŏk truh 2 kơsô̆ đơ̆ng sơnăm 2026. Vă jang đei dôm nơ̆r pơkăp, ƀok Thái Đại Ngọc, Bí thư Đảng dêh char Gia Lai pơtho ăn rim khul kơdră pơgơ̆r tơring bơ̆ jang mă ‘lơ̆ng kiơ̆ trong “6 rơđăh”: rơđăh bơngai, rơđăh tơdrong jang, rơđăh jơnăr, rơđăh hơnăp jang, rơđăh tơdrong jangđei păng rơđăh tơdrong gơ̆h jang, ưh gơ̆h lkê̆ dôm tơdrong jang lăp dơ̆ng lơ̆m hla ar đĕch; Pơkăp pơjing anih jang pơm hla ar pơvih ăn kon pơlei ‘lơ̆ng hơiă, ƀônh hrĕnh, năng “tơdrong jơnei đơ̆ng anih tĕch mơdro ‘nŏh jĭ tơdrong jang tŏk kơ dêh char” păng vă hơnơ̆ng sek tơlang rim tơdrong pơm pơmat tat ăn bơngai tơmât jên jang; atŭm hăm ‘nŏh hơpơi ‘mĕh dôm anih tĕch mơdro ưh lăp tơlĕch jang trŏ khei ‘năr pơkăp đĕch mă oei jang xa đunh đai, năng kăl tơdrong juăt, jŏh ayŏ kơ dŏ xoang tơ̆ tơring păng hơtŏk tơdrong pơvei hăm anih tĕch mơdro lơ̆m dêh char vă vang jang xa roi kơjăp ‘lơ̆ng lơ̆m trong jang pơtruh tơmam jơ̆p plei teh.

Đơ̆ng dôm tơdrong iŏk đei tơ̆ hop akŏm, Bí thư Đảng dêh char Gia Lai Thái Đại Ngọc pơma hơdăh đon pơhnŏng khŏm pơm ăn dôm nơ̆r pơkăp jing dôm tơdrong jang đei tơpă tơ̆ yăn âu, hơnhăk ba iŏk yoa ‘lơ̆ng ăn tơdrong jang tŏk mŭk drăm, tơpôl: "Gia Lai pơkăp hơnơ̆ng yak hơdoi, pơjing tơdrong ‘lơ̆ng hlŏh ăn anih tĕch mơdro, tơmât jên jang hơđơ̆ng jơhngâm jang xa, tĕch mơdro, vang jang tŏk păng jơnei hơdai. Nhôn hơpơi ‘mĕh păng lui, Gia Lai ưh lăp jing anih truh tôch ‘lơ̆ng, sơđơ̆ng đĕch mă oei jing anih tưk tơiung đei lơ tơdrong vă jang, đon tơchĕng jing đei tơpă tơ̆ yăn âu, vă dôm bơngai tơmât jên jang gơ̆h jang tŏk jing dôm anih tĕch mơdro năm hơdrol lơ̆m tơdrong jang xa đơ̆ng kơdih."

Truh akŏm păng pơgơ̆r Hop akŏm, Phó Thủ tướng Hồ Quốc Dũng tơchĕng ‘lơ̆ng dôm tơdrong adrin đơ̆ng Gia Lai; tơdrong iŏk đei tơ̆ hop akŏm ăn ƀôh đon lui đơ̆ng khul bơngai tơmât jên jang hăm trong vă jang tŏk đơ̆ng dêh char. Phó Thủ tướng athei dêh char sơng iŏk jên jang đei trong rơih lăp ‘lơ̆ng kiơ̆ "3 ưh" (‘nŏh ưh đei tơplih cham char vă jang tŏk pran, ưh đei iŏk tơdrong jang iŏk yoa lơ bơngai/kơmăy kơmŏk so, ưh đei iŏk anih tơmât jên jang ưh kơ pran) păng tơgŭm ăn dôm tơdrong jang FDI chăl ‘nao nhen AI, kơchơ̆t bán dẫn.

Atŭm hăm ‘nŏh, Phó Thủ tướng athei Gia Lai năng kăl anih jang mŭk drăm kơdih ‘nŏh jĭ jơhngâm pran vă jang tŏk pran, hơtŏk tơdrong hơmet ming trong pơm hla ar kiơ̆ "pơjing tơdrong ‘lơ̆ng, pơvih pơvăn" iŏk tơdrong lăp đon đơ̆ng anih tĕch mơdro pơm ‘long pơtŏ păng hơnơ̆ng pơkăp yak hơdoi hăm anih tĕch mơdro, hơmet tơtom dôm tơdrong pơmta tat ăn bơngai tơmât jên jang:

“Hlôh vao kơjăp đon jang tŏk mŭk drăm kơdih jing 1 jơhngâm pran gĭt kăl hlŏh ăn anih jang mŭk drăm. Pơjing tơdrong ‘lơ̆ng vă anih tĕch mơdro kơdih jang tŏk roi tih, roi ‘lơ̆ng; pơlung jơhngâm pơjing dôm anih tĕch mơdro pơjei băl roi pran, atŭm hăm ‘nŏh hơtŏk tơdrong jang hơdoi đơ̆ng anih tĕch mơdro lơ̆m teh đak hăm naih jang FDI, dar deh vang jang xa roi ‘lơ̆ng lơ̆m trong pơm hơtŏk kơjă tơmam păng vang pơtruh tơmam jơ̆p plei teh. Bơ̆n athei pơma tơpăt, jang mă ‘lơ ‘lŏ, jang truh kĕh, jang khŏm đei vă hơnhăk Gia Lai bơ̆n jang tŏk pran tơ̆ hơnăp kơnh.".

Hăm dôm nơ̆r pơkăp tôch pran đơ̆ng khul kơdră pơgơ̆r kŭm hăm đon lui păng tơdrong vang yak hơdoi đơ̆ng khul tĕch mơdro, Hop akŏm tơlĕch trong tơmât jên jang sơnăm 2026 ưh lăp hơnhăk ba dôm kơsô̆ ‘lơ̆ng hơiă ăn Gia Lai đĕch, mă oei pơih đei đon hơmĕng găh 1 chăl jang tŏk pran kơjăp dơ̆ng. Đơ̆ng noh, Gia Lai oei dar deh tơƀôh hơdăh anih dơ̆ng jĭ anih truh tôch hơiă đơ̆ng jên tơmât jang, năm truh đon pơhnŏng jang tŏk hrĕnh, đei yoa păng mât hơdai jrŭ xă lơ̆m trong pơm hơtŏk kơjăp tơmam jơ̆p plei teh tơ̆ hơnăp ning mônh kơnh.