Hơnih jang kơmăy kơmŏk găh Pơbăh Pleiku (xăh Bờ Ngoong, dêh char Gia Lai) đei Thủ tướng teh đak kĭ ăn trong jang tơmơ̆t jên jang đơ̆ng khei 9/2019. Tơdrong jang đei teh să vă jê̆ 200 hek tar, akŏm jên tơmơ̆t jang hloh 500 ti hlak jên, yua đơ̆ng Grŭp jang Kơmăy kơmŏk Kơsu Việt Nam pơm tơ ‘ngla tơmơ̆t jên jang. Tơdrong tơm ‘noh jĭ jang đang jăl jang 1 lơ̆m sơnăm 2022 păng pơm tơƀĕnh hơnih jang kơmăy kơmŏk lơ̆m dang 5 sơnăm. Mă lei, truh dang ei tơdrong jang oei tam mă gơh bơ̆jang yua đơ̆ng tơhlăk lơ̆m pơm hla ar, hơmet ming teh.

Tơ̆ jơ hơlen lăng teh ‘nao âu, Bí thư Anih jang Đảng dêh char Gia Lai Hồ Quốc Dũng hlôi athei tơ ‘ngla tơmơ̆t jên jang athei jang đang hơnih hơmet ‘lơ̆ng đak ‘mê̆ ‘mach păng dôm hơnih jang nai lơ̆m dang 4 khei, hơdai hăm jang hơdai kơjăp hăm dôm anih jang vă tŭn hrĕnh tơdrong jang. Ƀok Lê Trung Kiên, Kơdră dơnơm vei lăng Kŏng ti Kơ su Chư Sê - anih jang kơtă tơlĕch jang tơdrong jang - roi tơbăt:

“Lăp đơ̆ng rŏng nơ̆r athei đơ̆ng kơdră chĕp kơ̆l dêh char, kŏng ti hlôi iŏk đei tơdrong pơtho đơ̆ng Khŭl vei lăng Hơnih mŭk drăm Gia Lai. Nhôn gô tơlĕch jang dôm tơdrong jang tơ̆ jih, hơmet ming tơdrong jang tơmơ̆t jên jang mă trŏ lăp hăm tơdrong hơgăt khôi luơ̆t, hơdai hăm hăm ‘noh hơnơ̆ng apĭnh dêh char kĭ ăn trong jang tơmơ̆t jên jang păng tơtĕnh ming man vă tơmơ̆t tơdrong jang lơ̆m bơ̆jang.”

Tơ̆ phường Pleiku, tơdrong jang hơnih kơdrơ̆m bri brăh CK54 đei băt hơdăh ‘noh jĭ tơkhoă vă tŭn hơtŏk tơiung anih kơdrơ̆m, hơdai hăm jing tơdrong ‘lơ̆ng gĭt kăl ăn anih jang tơmang lăng păng pơvih pơvăn. Tơdrong jang đei teh să 240 hek tar, kơsô̆ kon pơlei tơchĕng hơdrol dang 17.000 ‘nu, trong vă jang hơtŏk tơiung anih kơdrơ̆m ‘lơ̆ng rŏ hăm anih jang kăl ‘nao, akŏm lơ tơdrong đei yua găh tĕch mơdro, pơtho pơhrăm, ngôi pơchơt păng tơplŏng kơdâu. Ƀok Đặng Toàn Thắng, Kơdră Anih vei lăng kon pơlei phường Pleiku, roi tơbăt, tơring tŏk bŏk hơdrin jang hơdai hăm dôm anih jang ƀơm truh vă jang đang pơđĭ tơdrong jang vă tơtom tơlĕch jang lơ̆m năr Quốc khánh vă jê̆ truh.

“Hơnih kơdrơ̆m bri brăh CK54 đei tơlĕch jang gô jing hơnih hơiă, jing tơkhoă tơgop pơtrŭt hơtŏk tơiung mŭk drăm - tơpôl kơ tơring. Đei lơ tơdrong jang hơdăh nhen cham golf 18 bơlôh, hơnih tĕch mơdro, siêu thị răt tơmam vă jê̆ 5 hek tar, cham ngôi pơhiơ̆ đak, hnam tơmoi ƀĭch pơdơh tih ‘lơ̆ng 5 hơnglŏng, hơnih hop akŏm tơm... Hăm hơnih ‘lơ̆ng, tŏ ‘mi kial pơdơh lăp ‘lơ̆ng, tơdrong jang gô jing hơnih sơng tơmơ̆t jên jang, tơmang lăng păng vă kơ băt”.

Kŭm lơ̆m ‘măng bơ̆jang âu ki tơ̆ dôm xăh phường păih Pơmơ̆t dêh char, Bí thư Anih jang Đảng dêh char Gia Lai hlôi năm hơlen lăng yan âu tơ̆ 1,2 tơdrong jang tih nai nhen cham golf Đăk Đoa, hơnih tơmang lăng joh ayŏ - hơnih kơdrơ̆m bri brăh groi hơngo Pleiku păng hơnih akŏm hnam tơmoi ƀĭch pơdơh tih ‘lơ̆ng - cham golf FLC tơ̆ Đăk Đoa. Kơdră chĕp kơ̆l dêh char Gia Lai athei rim anih jang, tơring jang hơdai ‘lơ̆ng pơdreo hla ar trŏ luơ̆t vă tơlĕch jang dơ̆ng tơdrong jang ‘nâu.

Tơdrong dêh char Gia Lai tơlĕch jang dơ̆ng lơ tơdrong jang lê̆ đunh gô tơgŭm hơmet ‘lơ̆ng tơmam tơring păih Pơmơ̆t, pơjing dôm trong jang tŏk ‘nao păng hơtŏk ‘lơ̆ng jơnei iŏk yua teh păng jên tơmơ̆t jang lơ̆m dêh char.