Prăt mĭnh sơnăm ou ki, ‘nhŏng Ja Si Môn, Bí thư Chi bộ thôn Ha Wai, tơring Đơn Dương, dêh char Lâm Đồng hơngŭr hăm tơdrong jang tơpôl. Hơdrol jang kiơ̆ hơgrop dêh char, hŭt kâp apŭng păng hơgrop tơring, kon pơlei hơdrung Churu oei tơ̆ apŭng Đơn Dương so jei đei lơ jơhngơ̆m đon tơchĕng. Ƀôh hơdăh trong jang đơ̆ng Đảng, trong pơprŏ jang kiơ̆ đơ̆ng Teh đak păng khul kơdră tơring, hăm hơnăp jang kơdih, ‘nhŏng Ja Si Môn yak năm rim ŭnh hnam tơblang hơdăh tơgŭm ăn kon pơlei băt hlôh, pơjing đei tơdrong lăp đon kơtang. Lăp hơdrol jơ ‘năr tơbăt ƀlep 1 sơnăm jang kiơ̆ trong jang khul kơdră tơring 2 kâp, Bí thư Chi bộ Ja Si Môn iung jang dơ̆ng hơnăp jang kơdih lơ̆m tơdrong pơrô̆ pơrôp, pơtho khan ăn kon pơlei pơm kiơ̆ ƀlep trong bơ̆ jang proh hơmet, hơgrop 3 thôn: Ha Wai, Ma Đanh păng Thôn Mới hăm akŏp đei hloh 1.000 ŭnh hnam:  “Tơdrong hơgrop pơlei lơm khei ‘năr iŏk nơ̆r tơgop đơ̆ng kon pơlei, kon pơlei jĭ tôch lăp đon, pơm kiơ̆ kơjăp. Kon pơlei jang kiơ̆ đĭ jơhngơ̆m, tơgum djru kơtang trong bơ̆ jang đơ̆ng Teh đak lơ̆m khei năr kơnh thôn gô roi năr roi atŏk tơ iung hloh dơ̆ng”.

Tơring Đơn Dương, dêh char Lâm Đồng đei pơjing đơ̆ng thị trấn Thạnh Mỹ, tơring Đạ Ròn hăm tơring Tu Tra kơ apŭng Đơn Dương so. Tơring đei 33 thôn ‘noh đei truh 17 thôn hăm 300 ŭnh hnam kon pơlei. Jang kiơ̆ trong tơlĕch jang pơm kơtoei khul chĕp pơgơ̆r, pơm hơtŏk bơ̆ jang jơnei tơ̆ tơring, tơring Đơn Dương proh hơmet ming, pơjing đei 15 thôn ‘nao păng vei kơjăp đêl so 1 thôn, tơjur 17 thôn pơtêng hăm hơdrol. Ƀok Nguyễn Văn Vinh, Kơdră chĕp pơgơ̆r Hơnih bơ̆ jang Mặt trận Tổ quốc Việt Nam tơring Đơn Dương, tơbăt, lơ̆m bơ̆ jang proh hơmet dơ̆ng thôn pơlei vă rơvơn ăn chĕp pơgơ̆r, pơrô̆jang, 12 ‘nu kră pơlei, bơngai đei kon pơlei lui yom ‘noh jĭ dôm bơngai kăl hloh tơgop pơjing đei tơdrong lăp đon lơ̆m tơpôl, hơmet pơ ‘lơ̆ng jơhngơ̆m đon lui yom kơtang đơ̆ng kon pơlei kon kông hăm Đảng, Teh đak:“Kiơ̆ nhôn ƀôh hơdăh lơ lou, bơngai đei kon pơlei lui yom lơ̆m tơring Đơn Dương jĭ gơng tơroh kloh klĕch ƀar păh Kon pơlei hăm Đảng păng Teh đak. Đe sư ‘noh dôm bơngai mă nhôn lui kiơ̆, đei nơ̆r pơma trŏ lăp hơnhăk trong bơ̆ jang, khôi luơ̆t đơ̆ng Đảng păng teh đak truh hăm kon pơlei, mă kăl hăm kon pơlei kon kông. Đe sư ‘noh jĭ bơngai hơdăh ang rang ‘lơ̆ng vă kon pơlei kiơ̆ yok rok jơ̆ng”.

Dêh char Lâm Đồng hrei ou đei 49 hơdrĕch hơdrung vang hơrih sa, lơ̆m ou kon kông tơmơ̆t hloh 17% măt bơngai kon pơlei. Lơ̆m dêh char đei 883 ‘nu bơngai đei kon pơlei lui yom kơtang păng gơnang kơjăp kơ kon pơlei pơla. Khei năr ou ki hơnăp jang kơ kră pơlei, dôm bơngai đei kon pơlei lui yom tơ̆ Lâm Đồng sa roi tơƀôh hơdăh mưh đe sư ‘noh jĭ dôm bơngai pơm juk yuưk trong hơlou lơ̆m iung jang kiơ̆ ‘măng pơgơ̆r hơgrop tơring, jang kiơ̆ khoa hoưk kih thuơ̆t lơ̆m choh jang sa, vei kơjăp sơđơ̆ng tơring, tơ iung pơjing tơgoăt tơgoăl hơdrĕch hơdrung. ‘Nhŏng Ban Niêng Ha Dang, hơdrung K’Ho kơtŏng Lạch, phương Lang Biang – Đà Lạt, tơbăt, gơnơm đei kră pơlei chă pơtho khan kon pơlei pơnam jang sa atŏk tơ iung mŭk drăm ŭnh hnam, pơlei pơla roi năr roi sơđơ̆ng dơ̆ng kơjăp:“Hăm tơdrong sơđơ̆ng lơ̆m pơlei pơla, hơnăp jang kơ kră pơlei ‘noh jĭ tôch gĭt kăl. Kră pơlei tơ̆ ou jĭ dôm bơngai kon pơlei lui yom hloh lơ̆m tơdrong pơtho khan ăn hơdruh tơdăm, đơ̆ng noh pơlei pơla vei lăng sơđơ̆ng, mă kăl tơdrong sar bar tơpôl, pơlong hao gre, et sa prăt măng, tơtông klĕ. Kră pơlei jĭ gơng tơroh kloh klĕch hăm khul bơ̆ jang vei lăng sơđơ̆ng kơ phương vang vei lăng năng tông sơđơ̆ng dơ̆ng dơ̆ng kơjăp ăn tơring”.  

Hơrih sa atŭm hăm kon pơlei, băt hlôh ƀôh hơdăh jơhngơ̆m đon hơpơi ‘meh vă đơ̆ng rim kon pơlei, rim kră pơlei, bơngai đei kon pơlei lui yom tơ̆ Lâm Đồng jĭ gơng tơroh kơjăp tơgoăt dih băl hơ iă nơ̆r Đảng hăm jơhngơ̆m đon kon pơlei. Mŏ Cil Bri, Kơ iĕng Kơdră chĕp pơgơ̆r Hơnih vei lăng Kon kông păng Lui khop dêh char Lâm Đồng tơbăt, mơ̆ng, tơgoăt iŏk nơ̆r tơgop đơ̆ng kră pơlei, dôm bơngai đei kon pơlei lui yom, hơnih hlôi pơchoh trong ăn dêh char tơlĕch lơ tơdrong jang atŏk tơ iung mŭk drăm-tơpôl, vei lăng năng tông ‘lơ̆ng tơdrong oei sa joăt joe ‘lơ̆ng rŏ sơ̆ ki ƀlep hăm tơdrong yan ou păng jơnei hơ iă. Jei đơ̆ng dôm nơ̆r tơgop tơpăt đơ̆ng rim kră pơlei, bơngai đei kon pơlei lui yom, dêh char Lâm Đồng hơnơ̆ng akŏm kon jên tơmơ̆t jên jang ăn tơring atăih yăih păng tơring kon kông vă pơjing đei tơdrong hơrih sa hiôk jơnap lei lăi dih băl kơ kon pơlei pơla:“Kon pơlei kon kông păng groi kông kiơ̆ trong jĭ akŏm jang dôm tơdrong tơm, iŏk kon pơlei pơm hơnih tơm păng trong iung jang ‘noh pơm hơtok tơdrong hơrih sa hiôk jơnap jĭ ‘long pơtŏ ăn tơdrong jang jơnei. Rim tơdrong jang akŏm xek tơlang dôm tơdrong kăl nhen trong nơnăm, pơtho pơhrăm, jang pơgang, pơjing tơdrong jang sa păng atŏk tơ iung khul bơ̆ jang. Gĭt kăl hloh dơ̆ng ‘noh pơjing rơvơn vă kon kông iung jang ‘lơ̆ng, vang jang kơtang hloh dơ̆ng lơ̆m tơdrong atŏk tơ iung atŭm kơ dêh char”.

Lơ̆m tơdrong tơplih kơtang kơ pơlei pơla Lâm Đồng hrei ou, kră pơlei, bơnbgai đei kon pơlei lui yom ‘noh dôm “hơdrơ̆ng hơrih” lơ̆m pơlei pơla, jĭ hơnih gơnang kơtang kơ kon pơlei rim hơdrung. Hăm tơdrong đei lui yom păng hơnăp jang, sơnong jang hăm kon pơlei pơla, đe sư jĭ gơng tơroh kloh klech dih băl nơ̆r Đảng hăm jơhngơ̆m đon kon pơlei tơgop hơnhăk trong bơ̆ jang đơ̆ng Đảng păng Teh đak yak mơ̆t lơ̆m tơdrong hơrih, hơmet pơ ‘lơ̆ng tơgoăt tơgoăl pôm nơ̆r ƀơ̆r đon kơjăp iăp kơtang hơdrech hơdrung, vei răk tơƀăk mong tơdrong oei sa joăt joe sơ̆ ki păng tơ iung pơjing pơlei pơla roi năr roi atŏk tơ iung.