Dôm năr pơyan Puih khei 8 âu, Hà Nội ƀrŭng ƀrăng Hla Kơ ƀrê, sơnglŏng jơk. Jơhngâm đon roi hưch hanh ƀiơ̆ mưh pơgơ̆r dôm ‘măng pơtâp pơhrăm yak pơrŏ tơ̆ trong glung đơ̆ng khul linh tơ̆ Cham xă Ba Đình. Tơ̆ dôm jăl trong khul yak pơrŏ năm brih, kon pơlei akŏm tôch lơ đơ̆ng pơgê hrôih. Đei lơ bơngai đơ̆ng dôm dêh char hơtăih truh đơ̆ng năr hơdrol bơih păng iung đơ̆ng hrôih lĕch tơ̆ trong chă anih ‘lơ̆ng hlŏh vă năng khul linh yak pơrŏ năm brih.

Boăl Mai Hương truh đơ̆ng Quảng Ninh tơroi: “Inh iung đơ̆ng 5h30, nhôn iung đơ̆ng hrôih vă gơh chă đei anih ‘lơ̆ng hlŏh, kŭm hăm rim bơngai hue lăng tơ̆ trong glung, năng đe khul linh yak pơrŏ năm brih”.

Jơ pơtâp hơdai mă 2 pơgơ̆r gơmăng 24/8 âu ki, hăm tơdrong vang akŏm đơ̆ng hlŏh 16.300 ‘nu linh, đei 43 grŭp yak, 18 khul dơ̆ng; 6 grŭp gre kơnong đơ̆ng khul linh kon pơlei Việt Nam păng 8 Grŭp gre gĭt kăl kơ Công an. Mă loi, hăm tơdrong vang akŏm đơ̆ng khul linh dôm teh đak boăl Nga, Lào păng Campuchia vang tơgop pơm pơ ‘lơ̆ng hlŏh dơ̆ng trong jang tơbôl đơ̆ng khul linh Việt Nam.

Hưch hanh dơ̆ng lơ̆m khul  “Drŏ kăn pơm linh roi tơbăt” vang yak pơrŏ ‘măng mă âu, Thiếu tá Nguyễn Thị Mùi, roi tơƀôh jơhngâm đon hơiă đơ̆ng rŏng lơ khei vang pơtâp pơhrăm vă gơ̆h hơyak ‘lơ̆ng rŏ tơ̆ cham xă Ba Đình: “Hơyak năm tơ̆ cham xă Ba Đình, oh ƀôh tôch hưch hanh, nhen đei tơiung dơ̆ng jơhngâm pran pơm ăn hơyak jơ̆ng roi ‘lơ̆ng. Năm brih anih đe lăng, nhôn hue muh măt tơ̆ păih Cham xă, mă loi ‘nŏh hue lăng tơ̆ Pơsat Ƀok Hô, hăm ƀĕnh jơhngâm đon hiôk chơt, ƀĕnh tơdrong hưch hanh”.

Jơ pơtâp hơdai sơng đei tơdrong tơrek truh tôch dêh đơ̆ng kon pơlei tơ̆ Anih tơm păng tơmoi chă tơmang lăng. Tơ̆ dôm trong glung anih khul linh năm brih, hla kơ đei hơtol ƀrông ƀrang, 'yơ 'yơ̆r nơ̆r bơngai lăng greu tơkĕch. Hơyak jơ̆ng pran kơtang, tơdrong dơ̆ng pơrĕng 'lơ̆ng rŏ đơ̆ng khul linh, công an păng khul kon pơlei hlôi tơiung dơ̆ng jơhngâm đon hưch hanh kơ hơdrĕch hơdrung, tơƀlŏk dơ̆ng chăl iung tơblăh kơtang nuih mơng đơ̆ng teh đak, hơyak năm pran kơjăp lơ̆m tơdrong pơjing păng vei lăng teh đak. Lơ kon pơlei đơ̆ng dôm dêh char, pơlei tơm hơtăih, ƀăt lăp đei hloi bơngai đơ̆ng teh đak đe đei măt đơ̆ng hrôih vă dơ̆ng lăng jơnăr tôch gĭt kăl âu.

Jơ pơtâp hơdai ‘măn đei lơ tơdrong hưch hanh, chơt hơiă lơ̆m jơhngâm đon kon pơlei, đon roi lui păng čhôk ‘nă kơ Khul linh kon pơlei, Công an kon pơlei păng jơhngâm pran đơ̆ng tơguăt mĭnh ƀơ̆r đon đơ̆ng hơdrĕch hơdrung Việt Nam.