Kơsơ̆ (24/9), tơ̆ phường Buôn Ma Thuột, Anih vei lăng găh Joh ayŏ, Tơplŏng kơ dâu păng Tơmang lăng dôm dêh char Đắk Lắk, Gia Lai, Khánh Hòa, Lâm Đồng păng Quảng Ngãi pơgơ̆r Hop akŏm pơtrŭt, roi tơƀôh păng jang hơdai hơtŏk tơiung tơmang lăng. Hop akŏm vă hơtŏk loi dơ̆ng tơgoăt, hơtŏk tơmam ‘lơ̆ng kơ 6 tơring, yak truh pơjing tơmam lơ dêh char, lơ tơring đei lơ tơmam ‘lơ̆ng, hơiă, akŏm tơ̆ 4 grŭp: joh ayŏ - gru groa; cham char - vă kơbăt; tơmam sa - răt tơmam; tơmang lăng hơdai hăm hop akŏm păng tơplŏng kơdâu.

Đơ̆ng rŏng kơ roi tơƀôh tơmam ‘lơ̆ng, tơroi băl tơdrong hlôh vao pơjing tơmang lăng tơklep hăm joh ayŏ, choh jang sa; tơlĕch hơtŏk tơiung cham char bri brăh kơsô̆ lơ̆m vei lăng păng roi tơƀôh vă pơm tơdrong tơgoăt hrĕnh, rơđăh đơ̆ng anih mơdro sa păng tơmoi, Anih vei lăng găh Tơmang lăng Hà Nội păng Anih vei lăng găh Joh ayŏ, Tơplŏng kơdâu păng Tơmang lăng 5 dêh char: Đắk Lắk, Gia Lai, Lâm Đồng, Quảng Ngãi, Khánh Hòa hlôi kĭ pơkăp hla ar jang hơdai hơtŏk tơiung tơmang lăng jăl jang 2026 – 2030. ‘Nâu jĭ hơyak năm gĭt kăl, tơgop bơ̆jang kiơ̆ ‘lơ̆ng tơdrong jang hơdai, hơtŏk tơiung tơmang lăng kơjăp tơ̆ hơnăp kơnh.