Kiơ̆ dôm bơngai tang măt, jăl jang XIII, Khul kơdră chĕp kơ̆l Trung ương Đảng, Anih tơm Chinh trĭ, Ban Bí thư hơnơ̆ng vei kơjăp tơdrong mât 1 ƀơ̆r đon, drơ̆ng pôm nơ̆r, vei lăng 'lơ̆ng tơdrong hơgăt, 'moi kiơ̆ đon tơchĕng, trong jang, chĕp kơ̆l pơgơ̆r teh đak yak hlŏh rim pơmat tat, pơlong nol, jang đang 'lơ̆ng rim tơdrong jang, tơdrong tơchơ̆t đơ̆ng Hop akŏm mă XIII kơ Đảng tơlech, lơ̆m noh đei lơ tơdrong hlôi jang đang tôch 'lơ̆ng.

Pơma tơ̆ grŭp, Thủ tướng Phạm Minh Chính pơma truh ƀai hŏk gĭt kăl đơ̆ng mât 1 ƀơ̆r đon: "Tơdrong mă mônh jĭ mât 1 ƀơ̆r đon. Ưh đei mât 1 ƀơ̆r đon ‘nŏh lơ liơ gơ̆h đei nhen hrei ‘nâu. Bơ̆n khŏm jang kiơ̆, vei kơjăp tơdrong mât 1 ƀơ̆r đon tơ̆ anih jang, tơguăt kơjăp hăm apŭng plenh teh kơna bơ̆n gơ̆h iŏk đei đon lui, gơ̆h đei nơ̆r pơma ‘lơng. ‘Nŏh jĭ tơdrong tôch gĭt kăl. Tơblang tơ̆ âu ưh lăp vă ăn hơdrô̆ đĭ đăng Đảng đĕch mă đĭ đăng anih jang, tơring tơrang athei băt hơdăh tơdrong gĭt kăl đơ̆ng mât 1 ƀơ̆r đon. Mât 1 ƀơ̆r đon ‘nŏh athei băt băl, tơgŭm băl ƀât lăp athei tang ăn băl hai".

Dôm nơ̆r pơma hơnơ̆ng tơƀôh hơdăh đon hlôh vao kơjăp găh trong jang lơ̆m chăl ‘nao păng khŏm bơ̆ jang đei đon pơhnŏng hăm 2 tơdrong tơm 100 sơnăm mă Tơdrong tơchơ̆t đơ̆ng Hop akŏm mă XIII kơ Đảng hlôi chih: Đon pơhnŏng jang ƀât măt ‘nŏh sơnăm 2030 tơbăt 100 sơnăm pơjing Đảng păng jing 1 teh đak oei tŏk pơdrŏng jang hăm kơmăy kơmŏk ‘nao, iŏk yoa jô̆ păh lăp lơ. Sơnăm 2045, tơbăt 100 sơnăm pơjing  teh đak, jing teh đak xã hội chủ nghĩa pơdrŏng đei ƀôh, kon pơlei đei iŏk yoa lơ.

Vă jang đei tơdrong ‘nâu, bơngai tang măt Đỗ Tiến Sỹ, khul tang măt ăn Đảng ƀô̆ Khul kơdră  teh đak đei nơ̆r apinh: "Rŏ năng bơ̆n athei năm jrŭ ƀiơ̆ găh tơdrong jang atŏk tơiung khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ kơ teh đak, ‘mĕh thoi noh kŭm nhen nơ̆r Tổng Bí thư ‘nŏh athei hơtŏk tơdrong jang kiơ̆ Tơdrong tơchơ̆t đơ̆ng Hop akŏm mă 14 tŏk pran ƀiơ̆ pơting hăm Hop akŏm adrol ki, chih tơdăh tơdrong jang, trong jang khŏm truh vă tơlĕch jang kiơ̆ Tơdrong tơchơ̆t đơ̆ng Hop akŏm mă 14. Nhôn ƀôh tơdrong jang tŏk pran khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ kơ teh đak đei ƀơm truh tơ̆ khul jang xa, tơdrong pơvei đơ̆ng khul bơ̆jang păng trong jang vă pơjing đei jơhngâm pran ‘nao ăn tơdrong jang mŭk drăm. Lơ̆m chăl ‘nao athei tưk tơiung khoa hŏk kơmăy kơmok, tơplih ‘nao rơgei, tơplih hăm kơmăy sô̆ kơ teh đak."

Kiơ̆ bơngai tang măt Trần Phước Sơn, khul Đảng ƀô̆ plt Đà Nẵng vă jang đei dôm tơdrong jang găh mŭk drăm đei tơlĕch truh sơnăm 2030, trong vă jang truh sơnăm 2045 athei chih hơdăh trong jang tŏk ‘nao, hơmet ming anih jang mŭk drăm, hơtŏk tơdrong jang hăm kơmăy kơmŏk ‘nao, iŏk khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ pơm jơhngâm pran:

"Athei pơm hơdăh nơ̆r pơma păng trong vă jang tŏk ‘nao. ‘Nâu jĭ trong jang tŏk atŭm, tơmât hơdai ‘lơ̆ng tơdrong pơtruh tơmam păng ‘mĕh vă tơmam, ‘moi kiơ̆ tơdrong tơplih ‘nao rơgei, khoa hŏk kơmăy kơmŏk, trong pơgơ̆r jang, bơngai jang rơgei păng mŭk drăm kơsô̆. Mă 2 ‘nŏh chih hơdăh 3 tơdrong vă jang mŭk drăm tơm ‘nŏh jĭ hơmet ming anih jang, tơdrong jang kiơ̆ trong jang hăm kơmăy kơmŏk ‘nao rơgŏh ‘lơ̆ng păng jang hăm kơmăy sô̆. Hơmet ming tơring jang tŏk ‘moi kiơ̆ tơdrong pran ‘lơ̆ng, pơjing tơring jang mŭk drăm păng anih jang mŭk drăm tơ̆ đak dơsĭ. Hơmet ming trong jang xa đơ̆ng anih tĕch mơdro, khul bơngai jang vă pơm hơtŏk tơdrong đei yoa, ‘lơ̆ng păng kơsư̆k pơjei."

Dôm bơngai tang măt akhan, ‘măng mă blŭng Tơdrong vă jang đei tơlĕch hloi lơ̆m Hla ar chih kăl. Tơdrong ‘nŏh ăn ƀôh đon pơhnŏng ưh lăp dơ̆ng ƀât trong vă jang đĕch, mă oei jing tơdrong bơ̆ jang hrơ̆ch ‘lơ̆ng lơ̆m tơpôl. Tơdrong vă jang ‘nŏh sư tơƀôh hơdăh đon hơpơi ‘mĕh jang tŏk.

Bơngai tang măt Phan Văn Mãi, khul bơngai tang măt Đảng ƀô̆ Quốc hội đei nơ̆r pơma: "Athei pơjing trong jang gĭt kăl atŏk tơiung tơring jang mŭk drăm tơm kơ teh đak, lơ̆m noh akŏm ăn 2 tơring jang mŭk drăm tơm găh Tu păng găh Pơbăh. Kơlih yoa tơdrong pran, ‘lơ̆ng đơ̆ng 2 tơring âu oei tôch lơ. Mưh mŭk drăm đei jang kiơ̆ trong tơproh ‘nŏh tơring âu đei trong jang hơdoi jing tơring jang xa tih ‘nŏh sư pơm hơtŏk đei kơjă, tơdrong ‘lơ̆ng vă jang tŏk. Tơdăh 2 tơring đei 1 trong jang đunh đai ‘lơ̆ng, jang tŏk trŏ trong, lăp ‘lơ̆ng ‘nŏh ưh jor gô tưk tơiung đei teh đak".

Dôm nơ̆r pơma tơ̆ grŭp oei drơ̆ng nơ̆r năm truh trong pơjing tơpôl Việt Nam ‘lơ̆ng hơiă, gơ̆h hơgei, hiôk sơđơ̆ng păng jang tŏk pơdrŏng. Tơdrong tơm blŭng a ‘nŏh hơmet ming tơpôl mă ‘lơ̆ng kiơ̆ đơ̆ng năng kăl khôi luơ̆t, hơmet ming trong pơm hla ar; tang găn xa pơjĭp, pơhuach kư̆ kă, dôm tơdrong pơm glăi; pơjing khul kăn ƀô̆ "tơpăt ‘lơ̆ng, jang tơnăp, pơ̆n tơchĕng, pơ̆n jang, pơ̆n chĭu pŭ" vă "luơ̆t teh đak" gơ̆h năm hơdoi hăm "jơhngâm đon kon pơlei"./.