Blŭng khei 4, jơ̆p dêh char đei hloh 1.000 hectar 'long pơtăm athei tơjră hăm tŏ pơđang păng 430.000 hectar 'long pơtăm kăl đak ruih, mă lơ noh 'long pơtăm đunh sơnăm đei kơjă kăp nhen: kaphê, tiu păng hơdrĕch 'long xa plei. Kiơ̆ Anih Choh jang xa păng Cham char Đăk Lăk, đak tơ̆ dơnou lơ̆m kơsô̆ 620 dơnou mong đak kơ dêh char hlôi och đơ̆ng 10-15% pơtêng hăm khei năr ou kơ dôm sơnăm hơdrol ki, 22 dơnou đak hrơ̆ truh tơ̆ klŏng.

Dang ei Anih jang vei lăng thong pơnơ̆ Đăk Lăk tŏk bŏk oei asong đak ăn 6 anih mong đak, hăm pơkăp 'măn ruih ăn hloh 1.000 hectar 'long pơtăm. Lơ̆m noh, đei 2 dơnou mong đak tơ̆ apŭng Buôn Đôn hlôi jang keh đang, hăm hơgăt 'long pơtăm đei ruih đak noh 600 hectar, oei dôm to noh tŏk bŏk oei tơlĕch pơm jang tơ̆ dôm apŭng Lăk, Krông Năng păng thĭ xah Buôn Hồ.