Đơ̆ng ‘năr 1/12/2025 truh 10/1/2026, dôm anih jang găh Anih tơm vei lăng khul linh teh đak, Quân khu păng Anih chĕp kơ̆l pơgơ̆r khul linh dêh char krao akŏm hlŏh 204.600 ‘nu kăn ƀô̆, linh kŭm hăm vă jê̆ 6.000 tŏ gre kơmăy kơmŏk năm tơ̆ dôm tơring pŭ răm lơ đơ̆ng ‘mi kial găh Hơlĕch kơ dêh char Đắk Lắk, pơgơ̆r 331 khul jang ming man păng 140 khul chă pơm hơmet ming, jur tơ̆ tơring tơgŭm ăn rim unh hnam.

Mă hơtuch, tơdrong jang hlôi man đang 331 tŏ hnam ăn dôm unh hnam đei hnam păk, pơm hơmet ming 90 tŏ hnam tơglơ̆h; atŭm hăm ‘nŏh vang hơmet pơ ‘lơ̆ng vă jê̆ 63.220 m trong nơnăm, hơbong đak tơ̆ kơdơ, tơtom pơvih ăn tơdrong jang xa, rei pơtăm ƀa phang. Hop akŏm tơchĕng ‘lơ̆ng đon kơchăng, jang tơnăp đơ̆ng dôm khul linh păng tơdrong vang jang hơdoi kơjăp hăm tơring mưh akŏm khul jang, jên tơmam, pơgơ̆r bơ̆ jang, ming man kơjăp ‘lơ̆ng.