Tơdrong jang pơm trong gre kơdâu hrĕnh Hoài Nhơn - Quy Nhơn găh trong gre kơdâu hrĕnh Bắc - Nam păih Hơlĕch dang ei đĭ jang đang pơđĭ tơdrong jang ming man. Khŭl vei lăng tơdrong jang 85 tơbăt tŏk bŏk pơm pơkeh dôm hla ar tuch luch vă ăn jăl trong âu gơh yak vih vơ̆t hloi lơ̆m năr Tết Nguyên đán. ‘Nhŏng Nguyễn Trọng Quân  - Kŏng nhơ̆n jang Kŏng ti Cổ phần 479 Hoà Bình chơt hơiă ƀơ̆t hơdai hăm khŭl ki sư - kŏng nhơ̆n jang kŏng ti hlôi jang đang hơnăp jang, tơgop hơnhăk tơdrong jang đang hrôih.

“Pơma atŭm tơdrong jang đơ̆ng nhôn kŭm tôch kơ gleh hrat, đei tơdrong bơngơ̆t truh đơ̆ng păih kang ƀô̆ ‘noh pơma atŭm nhôn tôch kơ hơdrin jang hơnơ̆ng hơtŏk thim jơ jang păng jơ kơmăng vă kơ sư tom tơdrong jang tŏk bŏk jang kơna ‘nhŏng oh oei kơtă jang păng hơdrin vă jang đang ‘lơ̆ng hơnăp jang đơ̆ng kơpal pơjao”.

Đei măt tơ̆ trong gre kơdâu hrĕnh Chợ Mới - Bắc Kạn, Đại tá Võ Khắc Hùng, Phŏ Yŏng vei lăng khŭl lĭnh Binh đoàn 12, Kŏng ti tơm Ming man Trường Sơn tơbăt: Trong năm klĕch hơnih krê hơmơt, kông krang, mơmat tat, hăm kơjung 28,8 km, akŏm jên tơmơ̆t jang hloh 5.750 ti hlak jên. Dôm bơngai lĭnh ƀô̆ đô̆i ƀok Hồ tŏk bŏk hơdrin tŭn hrĕnh tơdrong jang.

“Ƀô̆ đô̆i Trường Sơn nhôn tôch kơ chơt hơiă ‘nă hal, đei Đảng, teh đak pơjao tôch kơ lơ tơdrong jang tơm, nhen dôm tơdrong jang pơm trong gre kơdâu hrĕnh. Nhôn băt hơdăh ‘nâu jĭ tơdrong jang tơm khŏm iŏk jang “3 ‘măng jang pơgê, kơsơ̆, kơmăng păng klăih song 4 khŭl ƀlep nhen jơhngơ̆m đon khŭl lĭnh vă jang đang”.

Hơnăn dôm anih mơdro sa Việt vang tơgop lơ̆m tơdrong hơgăt jang đang hloh 3.000 km trong gre kơdâu hrĕnh âu hlôi đei Kơdră Anih tơm vei lăng găh Ming man Trần Hồng Minh lơ ‘măng tơƀlŏk, hăm đon lui păng chhôk ‘nă, nhen: Phương Thành, Đèo Cả, Sơn Hải, Lizen, Vinaconex, Trường Sơn… Dôm anih mơdro sa hlôi bơ̆jang kiơ̆ ƀlep nơ̆r pơkăp, iŏk yua khoa hŏk kơmăy kơmŏk, jang tŏk lơ, tŏk grŭp jang, ƀơ̆t lăp athei chu pŭ tơ jur lơi, pŭ lôh yua kơ bơ̆jang dôm tơdrong jang. Hơdrô̆ nhen, ƀok Phạm Văn Khôi, Kơdră Grŭp jang vei lăng Kŏng ti Phương Thành tơroi, anih mơdro sa kơ sư vang jang 4 tơdrong jang pơm trong gre kơ dâu hrĕnh. Lơ̆m noh, đei 2 tơdrong jang jăl jang 2 ‘noh đei Vũng Áng - Bùng păng Vân Phong - Nha Trang.

Hơlơ̆k dơ̆ng tơ̆ tơring Pơbăh, truh hăm tơring thong đak Tơmăn đak krong Cửu Long, ƀok Trần Văn Thi, Kơdră Anih vei lăng tơdrong jang Mỹ Thuận- bơngai tơklep hăm tơdrong jang trong nơnăm gre kơdâu vă jê̆ 30 sơnăm - mơ̆ng sư tơroi găh dôm khei ‘năr rơbâu kŏng nhơ̆n, ki sư jang trong hơdrin jang đang dôm tơdrong jang tơm kơ teh đak, hăm jơhngơ̆m jang, đon gơh hơgei đơ̆ng dôm bơngai chĕp hơnăp jang “năm hơdrol pơih trong” tơ̆ dôm jăl trong gre kơdâu hrĕnh, đơ̆ng Cần Thơ truh Cà Mau:

“Hăm khŭl ki sư, kŏng nhơ̆n bơngai Việt Nam, nhôn tơlĕch jơhngơ̆m pơjei băl vă jang đang dôm tơdrong jang hrôih tơmơ̆t lơ̆m bơ̆jang vă pơyua ăn kon pơlei pơyua ăn teh đak păng kŭm jing vă pơtrŭt jang tŏk mŭk drăm. Kŭm hăm tơdrong ming man trong nơnăm ăn teh đak ‘noh tơdrong jang kơmăy kơmŏk đơ̆ng khŭl jang đơ̆ng vei lăng truh roi tơƀôh truh iŏk jang kŭm đei hơtŏk tơiung. Nhôn chơt hơiă dơ̆ng lăng jăl jang hơtŏk tơiung đơ̆ng anih jang păng kŭm hăm tơdrong hơtŏk tơiung kơ teh đak, nhôn ƀôh chhôk hơiă dêh”.

Kơhrĕng rơbâu kon bơngai, hăm jơhngơ̆m đon pơjei băl “ ‘mi pă lăng prăng pă leng, bơ̆jang pă pơdơh năr lêh, têt, jang kơmăng, jang kơ ‘năr” vă hơnhăk dôm tơdrong jang pơm trong gre kơdâu hrĕnh đang ƀlep tơdrong pơkăp. Apĭnh pơtruh nơ̆r đơ̆ng PGS.TS Trần Chủng, Kơdră Khŭl dôm Bơngai tơmơ̆t jên jang pơm trong nơnăm Việt Nam ƀơ̆t tơroi găh jơhngơ̆m jang, tơdrong hŭt jơhngơ̆m đơ̆ng dôm bơngai jang đei dôm tơdrong kăp gĭt:

“Bơ̆n kăl athei tơƀôh jơhngơ̆m đon bơnê hăm dôm bơngai jang tơdrong jang găh trong nơnăm mă Ƀok Hồ sơ̆ pơma ‘noh “Jang trong”. “Jang trong mơmat dêh văi”. Gleh hrat dêh. Kơna bơ̆n bơnê kơ đe sư. Bơnê kơ dôm bơngai “jang trong ‘nao” năr ‘nâu hlôi pơm ăn kơ bơ̆n dôm trong gre kơdâu hrĕnh hơnơ̆ng, pơtrŭt tơdrong hơtŏk tơiung mŭk drăm, vei sơđơ̆ng ăn kon pơlei păng ‘lơ̆ng hăm cham char.”

Hloh 3.500km trong gre kơdâu hrĕnh đĭ pơm đang, pơih ăn tơdrong ‘lơ̆ng ‘nao ăn hơtŏk tơiung teh đak păng đei dơ̆ng đon lui lơ̆m tơdrong hơgăt 5.000km trong gre kơdâu hrĕnh lơ̆m sơnăm 2030. Tơ̆ rŏng dôm jăl trong să hiôk ‘noh đak pơ uh, đon hơgei păng jơhngơ̆m jang kơjăp đơ̆ng kơ hrĕng rơbâu ki sư, kŏng nhơ̆n, bơngai lĭnh Trường Sơn păng dôm anih mơdro sa Việt Nam bơ̆jang pă pơdơh lêh, têt, măng năr tơ̆ hơnih jang. Dôm jăl trong năr ‘nâu ‘noh jĭ trong ‘lơ̆ng ăn tơ̆ hơnăp kơnh - vă Việt Nam jang tŏk kơjăp, năm hrĕnh hloh, năm hơtăih hloh lơ̆m tơdrong jang yak mơ̆t lơ̆m chăl jang tŏk đơ̆ng hơdrĕch hơdrŭng.