Tơ̆ tơring sơlam teh đak Ia Pnôn (dêh char Gia Lai), Khul kơdră chĕp pơgơ̆r Ƀô̆ đô̆i vei lăng sơlam teh đak dêh char pơgơ̆r tơdrong jang “Khei Pêng hơdruh tơdăm-Khei Pêng sơlam teh đak” hăm lơ tơdrong jang ‘lơ̆ng hơ iă nhen pôk ăn unh hơyuh hơdăh ang rang ‘lơ̆ng, pơgơ̆r pơchơt pơ hiơ̆ ‘lơ̆ng hơ iă ăn đe hŏk tro. Mă kăl ‘noh pơm lêh pơlong “Gơgŭ tengneng hu măih” hăm 20 nơ̆r pơn, tơgŭm ăn hŏk tro Hnam trương jăl kơđeh păng Jăl ƀar Lương Thế Vinh hlôh vao hloh dơ̆ng găh sơlam teh đak, Khôi luơ̆t Tơring sơlam Teh đak Việt Nam adoi nhen hơnăp jang kơ khul Ƀô̆ đô̆i vei lăng sơlam Teh đak. Đơ̆ng ou, tơgop pơm hơtŏk jơhngơ̆m đon hlôh vao khôi luơ̆t, pơtho pơjing jơhngơ̆m đon hưch hanh hơmanh bơnê kơ teh đak păng hơnăp jang kăl lơ̆m vei lăng năng tông tơdrong pơm tơm groi teh đơ̆ng oei lơ̆m tang dŏ tơ̆ hnam trương hloi. Lơm tơdrong pơgơ̆r, hơnih oei pôk ăn kon pơlei kơ pơlei Triêl mĭnh “ Hơnih jang Ŭnh hơyuh hơdăh ang rang ‘lơ̆ng” kơjă kơjên hloh 75 triu hlak jên, atŭm hăm 50 tơnô̆ tơmam drăm ăn hŏk tro ŭnh hnam tơnap tap. Oh RơLan H’Hương, hŏk tro lăm 9, Hnam trương Jăl kơđeh păng Jăl ƀar Lương Thế Vinh tơbăt: “Ĭnh tôch hơ iă kơ yuơ đei vang năm Tơdrong pơgơ̆r Khei Pêng Hơdruh tơdăm-Khei Pêng sơlam teh đak” păng đei băt dơ̆ng găh tơring sơlam teh đak păng Khôi luơ̆t Tơring sơlam teh đak Việt Nam. Ba gô hơdrin hŏk pơhrăm mă hơgei vă tơƀôh hơdăh ăn jơhngơ̆m đon hưch hanh hơmanh bơnê kơ Teh đak kơ jơhnơr mơlôh nhôn”.

Atŭm hăm ‘noh, tơ̆ Dak Lăk, Ƀô̆ đô̆i vei lăng sơlam teh đak dêh char pơgơ̆r Hop akŏm pơma dơnuh đei hơnăn “Hơdruh tơdăm Ƀô̆ đô̆i vei lăng sơlam teh đak dêh char Dak Lăk pran kơjăp iăp kơtang kiơ̆ Đảng”, atŭm hăm pôk pơ ư rim mơngai mơlôh gơh hơgei pran kơtang sơnăm 2025. Tơ̆ jơ pơm lêh, kang ƀô̆, đoàn viên hơdruh tơdăm hlôi glơng gơvang pơkao ming tơ̆ Hơnih man tơbăt Ƀok Hô hăm Khul ƀô̆ đô̆i vei lăng sơlam teh đak, tơbăt jơhngơ̆m đon kŭp yom, hôn bơnê kơ Ƀok Hô, adoi sơkơ̆t hơdăh kơrŭn đĭ ai hơnơ̆ng hŏk pơhrăm, pơm kiơ̆ jơhngơ̆m đon ‘lơ̆ng, bơ̆ jang hơgei kơ Ƀok, atŏk kơtang jang kiơ̆ dôm tơdrong joăt joe kơ khul. Tơ̆ jơ pơma dơnuh, rim bơngai tang măt hlôi pơma tơbăt dôm trong jang hơ iă, jơnei, hơnơ̆ng sơkơ̆t hơdăh hơnăp jang pơm jŭk yŭk trong hơlou, tơchăr hơgei kơ hơdruh tơdăm lơ̆m jang kiơ̆ tơdrong jang vei lăng năng tông pơm tơngla tơring sơlam teh đak. Jơ ‘năr ou, hơnih hlôi pôk pơ ư 10 “ ‘Nu bơngai mơlôh gơh hơgei pran kơtang”, 7 “ ‘Nu bơngai mơlôh hơpơi ‘meh vă kơtang” sơnăm 2025, adoi pôk hơpăh 1 khul păng 2 ‘nu bơngai jang ‘lơ̆ng pran kơtang. Đại tá Đỗ Quang Thấm, Kơdră chĕp pơgơ̆r Đảng Hơnih chĕp pơgơ̆r Ƀô̆ đô̆i vei lăng sơlam teh đak dêh char Dak Lăk tơbăt:“Tơdrong bơ̆ jang vei lăng năng tông pơm tơm groi teh sơđơ̆ng tơring sơlam teh đak pơkoel ăn rim kang ƀô̆, ƀô̆ đô̆i, mă kăl ‘noh khul ƀô̆ đô̆i đoàn viên, hơdruh tơdăm, kăl hơnơ̆ng kơrŭn đĭ ai hơdrin pơhrăm vă đei jing gơh hơgei pran kơtang hloh dơ̆ng. Athei rim hơnih bơ̆ jang hơnơ̆ng pơrô̆ pơgơ̆r pơjing rơvơn vă đoàn viên păng rim tơdrong jang đoàn atŏk tơ iung pran kơjăp iăp kơtang jang kiơ̆ vă đei jing tơdrong kăl vă pơtho pơhrăm jơhngơ̆m đon hlôh vao ‘lơ̆ng hơ iă hloh dơ̆ng ăn khul mơlôh kơ hơnih jang."

Hrei ou Đoàn Hơdruh tơdăm Ƀô̆ đô̆i vei lăng sơlam teh đak dêh char Dak lăk đei 19 khul đoàn. Hơdruh tơdăm rim hơnih kơrŭn đĭ ai iung jang hơdoi hăm tơring iung jang tơ iung pơjing tơdrong jang sa tơpôl, tơ iung pơjing tơring tơrang ‘nao, tơgŭm djru Kon pơlei tơring sơlam teh đak ‘moi kiơ̆ rim tơdrong jang nhen “Ba oh năm tơ̆ hnam trương-Kon mŏm Kơđông ƀô̆ đô̆i vei lăng Sơlam teh đak”, “Ƀok thây kơlong jơk”, “ATM đak rơgoh sơlam teh đak”, “Ŭnh hơyuh hơdăh ang rang ‘lơ̆ng tơring sơlam”…

Jơ ‘năr ou, Hơnih Đoàn dêh char Dak Lăk hlôi pơgơ̆r Pơm lêh tơbăt 95 sơnăm Năr pơjing Đoàn Hơdruh tơdăm Cộng sản Hồ Chí Minh hăm hơnăn “Hơdruh tơdăm rim hơdrung Dak Lăk-Hơpơi ‘meh vă kơtang atŏk tơ iung atŭm lơ̆m teh đak”, adoi pôk hơpăh 56 ‘nu bơngai jang pran kơtang jăl jang 2020 - 2025. Tang măt ăn rim jơhnơr kang ƀô̆ Đoàn păng Hơ ioh vang năm tơƀơ̆p dih băl hăm hơnăn “Hơdruh tơdăm rim hơdrung Dak Lăk-Hơpơi ‘meh vă kơtang atŏk tơ iung atŭm lơ̆m teh đak”, tơgop lang să jơhngơ̆m đon kiơ̆ yok rok jơ̆ng joăt joe, pơm hơtŏk hơnăp jang kơtang păng hơpơi ‘meh vă plang ăn. Jơ ‘năr ou, Khul kơdră chĕp pơgơ̆r Đoàn dêh char pôk hơpăh ăn 56 khul, rim bơngai jang ‘lơ̆ng; Pôk tơmam bơnê Lý Tự Trọng sơnăm 2026 ăn kơ mŏ Lê Hiếu Vy, Bí thư Đoàn Hnam trương Jăl Pêng Ngô Gia Tự. ‘Nhŏng Lương Minh Tùng, Bí thư Đoàn dêh char Dak Lăk sơkơ̆t hơdăh:“ ‘Nou jĭ jơ ‘năr pơgơ̆r hop akŏm chinh trĭ tôch gĭt kăl kơ khul Đoàn, vă rim boăl hơdruh tơdăm, hơ ioh kiơ̆ yok rok jơ̆ng jơhngơ̆m đon ‘lơ̆ng, bơ̆ jang pran kơtang kơ đe ‘nhŏng pơmai yak hơdrol, jang kiơ̆ ‘lơ̆ng tơdrong jang kơdih, hơdrin đei pôk tơmơ̆t lơ̆m khul Đoàn; adoi hơmet pơ ‘lơ̆ng hơnih jang Đoàn, vang iung jang tơ iung pơjing Đảng, khul kơdră tơring roi năr roi pran kơjăp iăp kơtang.”

Dôm tơdrong pơgơ̆r ‘lơ̆ng hơ iă, tơpă ƀlep lơ̆m Khei Hơdruh tơdăm sơnăm ou ưh khan lăp tơƀôh hơdăh sơnong jang, hơnăp jang pơm jŭk yŭk trong hơlou, năm iung jang kơ hơdruh tơdăm rim hơdrung Tây Nguyên, mă oei tơgop pơm hơtŏk jơhngơ̆m đon hlôh vao kĕch mang, pơm hơtŏk jơhngơ̆m đon ‘mêm kơ eng teh đak, hơnăp jang hăm kon pơlei pơla, vang tơ iung pơjing păng vei lăng năng tông kơjăp iăp kơtang pơm tơm tơ-‘ngla tơring sơlam teh đak lơ̆m chăl hle.