Tơ̆ 'măng hop akŏm, rim bơngai tang măt akŏm hơlen, sơkơ̆t tơdrong jang hơtŏk mŭk drăm – tơpôl, vei sơđơ̆ng tơpôl sơnăm 2025 păng pơma đam, tơchơ̆t trong jang, sơnong jang ăn sơnăm 2026. Kiơ̆ tơroi đơ̆ng Hơnih jang vei lăng kon pơlei dêh char, lơ̆m sơnăm 2025, mă ƀơm lơ tơnap tap, mă kăl noh tơdrong răm đơ̆ng 'mi kial kơsô̆ 13 păng dôm 'măng 'mi kial đak hơbông tih pơrăm hloh 12.000 tih hlj, mŭk drăm – tơpôl kơ Đăk Lăk adoi oei đei yua sơđơ̆ng.

Dêh char đei 12/16 tơchơ̆t jang mŭk drăm – tơpôl păng đei jơnei nhen pơkăp; rim 'nu bơngai jang đei yua hloh 80 triu hlj; tơmơ̆t lơ̆m jên mong teh đak đei 16.500 tih hlj; tơmam tĕch ăn teh đak đe đei 2,8 tih đôlar, tŏk 26% pơtêng hăm sơnăm 2024. Dôm tơdrong jang joh ayŏ - tơpôl pơtoi đei tơrĕk, pơyua ăn tơpôl đei vei sơđơ̆ng, kơsô̆ unh hnam hin dơnuh tơjur đơ̆ng 3% tŏk tơ̆ kơpal, gah unh hnam hin dơnuh lơ̆m tơring kon pơlei kon kông tơjur hloh 4%. Tơpôl tơ̆ tơring đei vei kơjăp sơđơ̆ng.