Kiơ̆ kơ ƀok Kơdră Anih tơm vei lăng Jên hu Nguyễn Văn Thắng akhan, vă jang kiơ̆ ‘lơ̆ng dôm tơdrong hơgăt mă tơdrong Tơchơ̆t tơlĕch ăn lơ̆m trong vă jang hơtŏk tơiung teh đak jăl jang 2026 - 2030, “akŏm hơmet pơ ‘lơ̆ng trong chĕp kơ̆l pơgơ̆r tôm tơdrong, hrơ̆ch trong chĕp kơ̆l pơgơ̆r” đei băt hơdăh ‘noh jĭ hơnăp jang tơm. Hăm tơdrong jang Jên hu, hơmet pơ ‘lơ̆ng mŭk drăm ‘noh jĭ hơnăp jang vă anih jang hơnơ̆ng tơplih ‘nao đon tơchĕng, bơ̆jang. Ƀok Nguyễn Văn Thắng tơroi rơđăh:

“Hơmet pơ ‘lơ̆ng tơdrong chĕp kơ̆l pơgơ̆r tôm tơtom păng tơlĕch jang đei yua dôm tơdrong tơchơ̆t đơ̆ng Đảng găh hơtŏk tơiung rim tơdrong jang mŭk drăm, bơ̆jang kiơ̆ hơ pơi ‘meh hơtŏk tơiung jing bơ̆jang păng iŏk yua hơdăh ‘lơ̆ng. Tŭn pran hơmet ming dơ̆ng vei lăng păng jên jang tơ̆ dôm anih mơdro sa Teh đak, hơtŏk ‘lơ̆ng đei yua bơ̆jang gĭt kăl ‘noh jĭ tơmơ̆t jên jang tơdrong jang vă vei sơđơ̆ng tơdrong chông ba hai vei sơđơ̆ng đei yua jên hu hai. Tơƀôh hơdăh păng hơtŏk hơnăp jang tơm kơ mŭk drăm Teh đak. Hơtŏk tơiung mŭk drăm kơdih tơpă jing 1 tơdrong ‘lơ̆ng gĭt kăl hloh đơ̆ng mŭk drăm. Tơgŭm hơtŏk tơiung pơih să anih tĕch mơdro ăn mŭk drăm tơpôl, hơp tak xăh”.

Hop akŏm XIV hơnơ̆ng tơƀôh hơdăh đon hơdrin chĭnh trĭ ‘lơ̆ng đơ̆ng Đảng lơ̆m tơdrong iŏk joh ayŏ kơ dŏ soang păng kon bơngai lơ̆m hơnih tơm kơ tơdrong jang hơtŏk tơiung teh đak. ‘Nâu ưh khan lăp jing tơdrong pơtăl ‘lơ̆ng hloh tơdrong jang đơ̆ng Đảng kiơ̆ rim jơhnơr kach mang păng Tơplih ‘nao, mă oei jing hơyak hơtŏk tơiung ‘nao lơ̆m đon tơchĕng tơdrong jang. Ƀok Nguyễn Văn Hùng, Kơdră Anih tơm vei lăng găh Joh ayŏ tơplŏng kơdâu păng Tơmang lăng tơƀôh ăn 6 grŭp trong jang vă “Hơtŏk tơiung jơhngơ̆m pran đơ̆ng joh ayŏ, kon bơngai Việt Nam- Tơdrong ‘lơ̆ng hơtŏk tơiung hrĕnh păng kơjăp teh đak lơ̆m chăl ‘nao”:

“Tơplih pran kơtang tôm tơdrong đon tơchĕng hlôh vao găh hơtŏk tơiung joh ayŏ, băt hơdăh tơmơ̆t jên jang ăn joh ayŏ ‘noh jĭ tơmơ̆t jên jang hơtŏk tơiung kơjăp kơ teh đak ăn tơ̆ hơnăp kơnh kơ hơdrĕch hơdrŭng. Kăl kơ hơtŏk loi dơ̆ng đơ̆ng khŭl jang joh ayŏ, tơdrong tơm kon bơngai kơtă pơm đei păng hơnhăk kơjă kăp gĭt joh ayŏ kơ chăl ‘nao. Lăng hơtŏk tơiung kơmăy kơmŏk joh ayŏ păng mŭk drăm pơcheh hơgei ‘noh jĭ tơdrong ‘lơ̆ng jang tŏk ‘nao, tơgop kơtă lơ̆m jang tŏk  GDP”.

Kiơ̆ kơ ƀok Y Thanh Hà Niê Kđăm, Bí thư Anih jang Đảng dêh char Lâm Đồng, đon lui đơ̆ng kon pơlei hăm Đảng ‘noh jĭ tơdrong ‘lơ̆ng kơjăp vă bơ̆jang kiơ̆ jơnei dôm tơdrong hơgăt gĭt kăl mă Đảng tơlĕch ăn. Lơ̆m khei ‘năr teh đak tŏk bŏk yak mơ̆t jăl jang hơtŏk tơiung ‘nao hăm lơ tơdrong hiôk păng long nol hơdai, vă hơmet ming khŭl jang chĭnh trĭ tơring kon pơlei kon kông, ƀok Y Thanh Hà tơlĕch ăn:

“Hơtŏk loi dơ̆ng pơjing păng hơtŏk hơnăp jang khŭl lĭnh tơm dơnơm chĭnh trĭ, mă loi ‘noh jĭ bơngai đei đe lui yom lơ̆m kon kông, lui khop; băt kơjăp tơdrong Kon pơlei. Kơchăng tang găn hơdrol, iung jang, tang găn dôm khŭl tơblơ̆ teh đak, bơngai nai mơ̆t phă, pơdôr kon pơlei vang tơ jră phă Đảng, Teh đak. Jang ‘lơ̆ng tơdrong jang tơbôl Kon pơlei, mă loi ‘noh jĭ hơtŏk tơdrong joăt joe vei lăng păng tưk tơiung, chĕp vei tơdrong ‘lơ̆ng hơiă joh ayŏ kon kông, chĕp vei tơdrong joăt oei sa, hơmet ming tơdrong ‘lơ̆ng hơiă joăt joe hai hơtŏk loi dơ̆ng tơdrong tơgoăt pôm nơ̆r ƀơ̆r đon, jơhngơ̆m chhôk ‘nă hơdrĕch hơdrŭng hai, ‘nâu jĭ tơdrong tơm vă tơ jră plơ̆ dôm tơdrong ƀơm ưh kơ ‘lơ̆ng đơ̆ng găh ‘ngoăih nhen tơdrong ưh kơ ‘lơ̆ng, pơm glăi klĕch teh đak”.

Lăp đon hăm tơdrong pơgơ̆r jang “Kon pơlei ‘noh tơm, jĭ tơ ngla, jĭ tơdrong hơgăt păng tơdrong ‘lơ̆ng đơ̆ng tơdrong hơtŏk tơiung” đei tơroi lơ̆m hla ar kăl Hop akŏm, yă Nguyễn Thị Thúy Lam, Bí thư Đảng xăh Tân Khánh Trung, dêh char Đồng Tháp akhan, mĭnh teh đak pran kơtang ưh khan lăp pơtŏ hăm tơdrong jang mŭk drăm tih dăh mă jang tŏk GDP hrĕnh, mă gĭt kăl hloh ‘noh jĭ hăm tơdrong ‘lơ̆ng đơ̆ng tơdrong hơrih sa păng kơsô̆ hiôk chơt đơ̆ng kon pơlei. Tơdrong hơnŭk hơnoa lăp tơpă đei tơdrong ‘lơ̆ng ƀơ̆t rim kon pơlei đei tơdrong hơrih lơ̆m phĭ tơnŏ, hiôk hian, sơđơ̆ng păng hiôk chơt. Yă  Nguyễn Thị Thúy Lam tơroi nơ̆r tơgop:

 “‘Noh jĭ hơnih tơdrong hơrih kon pơlei đei sơđơ̆ng, hơgei. Kon pơlei ưh khan lăp tôm sŏng sa, đei hơbăn ao hrŭk đĕch mă oei đei sa yua dôm tơdrong pơvih pơvăn pơgang, pơtho pơhrăm, joh ayŏ ‘lơ̆ng hloh; đei hơrih lơ̆m hơnih hiôk ‘lơ̆ng. ‘Noh jĭ, hơnih đei Khŭl kơdră chĕp kơ̆l jê̆ kon pơlei, pơvih pơvăn ăn kon pơlei; mĭnh khŭl chĕp kơ̆l pơgơ̆r băt “bơngơ̆t tơdrong bơngơ̆t đơ̆ng kon pơlei, chơt tơdrong chơt kơ kon pơlei”. ‘Noh jĭ hơnih đei mĭnh tơpôl tơgoăt pôm ƀơ̆r đon, hơnih tơdrong ‘mêm pơlei pơla đei vei kơjăp, dôm kơjă kăp gĭt joh ayŏ joăt joe đei pôk ư păng chĕp vei”.

Đơ̆ng jơnei Hop akŏm XIV kơ Đảng, rim kang ƀô̆ đảng viên kŭm hăm Kon pơlei hơdrin tơplih ‘lơ̆ng trong jang, tơchơ̆t đơ̆ng Đảng jing dôm tơdrong jang hơdăh, iŏk đei yua yan âu păng hiôk chơt đơ̆ng kon pơlei pơm ‘long rek pơtŏ ‘lơ̆ng hloh. Đơ̆ng hơmet pơ ‘lơ̆ng tơdrong jang mŭk drăm, hơtŏk tơiung lăp ‘lơ̆ng dôm tơdrong mŭk drăm, truh hơtŏk jơhngơ̆m pran joh ayŏ, kon bơngai păng hơmet ming khŭl jang chĭnh trĭ tơ̆ tơring, đĭ đăng tă kơ yak truh tơdrong tơm pơjing 1 teh đak hơtŏk tơiung hrĕnh, kơjăp, ƀĕnh tơdrong ‘lơ̆ng păng ƀĕnh đon lui. ‘Nâu jing tơdrong gĭt kăl vă bơ̆jang kiơ̆ ‘lơ̆ng hơpơi ‘meh găh mĭnh Việt Nam pran kơtang, hơnŭk hơnoa lơ̆m chăl jang tŏk ‘nao.