Kiơ̆ tơroi, sơnăm 2025, Đăk Lăk đei 4 tơchơ̆t jang mŭk drăm dơnơm hloh kơ pơkăp, lơ̆m noh tơmam drăm tĕch ăn teh đak đe tŏk hloh 26% pơtêng hăm sơnăm 2024; kơsô̆ jên mong đei yua 18.208 tih hlj, tŏk 28,56%; jang đei yua atŭm noh 80,6 triu hlj. Pơyua ăn tơpôl đei vei sơđơ̆ng hăm tơdrong keh đang 100% tơdrong pơkăp man 2.800 tŏ hnam oei tơpôl păng sut lê̆ hnam pơgia, hnam hyah hyok. Yak ah sơnăm 2026 – sơnăm pơih blŭng ăn pơkăp hơtŏk tơ-iung 2026–2030, Đăk Lăk đei jơnei pơkăp pơjing trong jang vă hơtŏk 2 kơsô̆; tơjur hin dơnuh atŭm lơ̆m jơ̆p dêh char đei đơ̆ng 3%, gah tơring kon kông tơjur đơ̆ng 4% tŏk tơ̆ kơpal; hơtŏk tenh tơdrong tơplih trong pơm jang kiơ̆ pơkăp tĕch pơdro – kŏng ngĭp – ming man.

Sơkơ̆t pơtôch hop akŏm, ƀok Tạ Anh Tuấn, Kơdră Hơnih jang vei lăng kon pơlei dêh char Đăk Lăk ră hơdah, tôm jơnŭm pơgơ̆r tơring athei tơplih đon tơchĕng, trong pơm jang păng pŭ sơnong jang truh tôch gah tơdrong hlôi tơlĕch jang, atŭm hăm noh hơtŏk tenh jên asong jang kŏng, pŭ sơnong jang hơdah hăm rim hơnih asong jang, rim tơring păng khŏm mă sek tơlang tơnăp dôm tơdrong jang mă pơm jang adar hloh kơ tơchơ̆t tơlĕch.