Hop akŏm đei pơgơ̆r kiơ̆ trong kơtă hơdai hăm pơih trư̆k tuyê̆n truh tơ̆ hlŏh 1.140 anih pơih pơdăh kơ dôm anih chĕp kơ̆l đảng, hăm hlŏh 12.500 'nu đảng viên vang akŏm. Tơ̆ Hop akŏm, ƀok Trần Thanh Trường, Kơdră Anih pơgơ̆r jang, Tơdrong tơchơ̆t găh Anih pơgơ̆r Trung ương iung roi tơbăt dôm tơdrong kăl lơ̆m Tơdrong hơgăt kơsô̆ 294 păng Nơ̆r pơtho kơsô̆ 06.

Mĭnh lơ̆m dôm tơdrong tih 'nŏh jĭ hơmet ming rim anih pơgơ̆r jang kơ Đảng kiơ̆ trong bơ̆ jang vei lăng 2 tăl (dêh char hăm xăh), hŭt lê̆ apŭng, lăp hăm trong hơmet ming anih jang đơ̆ng teh đak. Trung ương oei tơlĕch dơ̆ng trong jang pơlong năng, nhen tơdrong pơjing đảng ƀô̆ xăh, phường găh Anih chĕp kơ̆l Đảng dêh char, plt; chih hơdăh anih pơgơ̆r đảng tơ̆ dôm tơring gĭt kăl; atŭm hăm 'nŏh hơmet ming, hŭt lê̆ 1,2 tơdrong vă pơm 'lơ̆ng chih kơđeh, ƀônh jang kiơ̆.